“არანაირი კანონი არ არეგულირებს პრეზიდენტის გადაწყვეტილებას, შეწყალების კომისია არის საკონსულტაციო და სარეკომენდაციო ორგანო, რომელსაც შეიძლება დაეყრდნოს პრეზიდენტი, თუმცა გაითვალისწინებს თუ არა კომისიის დასკვნებს ქვეყნის პირველი პირი, ეს უკვე მისი საქმეა. როცა შემოდის განცხადებები, მუშაობას იწყებს სპეციალური 3 კაციანი ჯგუფი, რომელ ჯგუფსაც განცხადებები შეაქვთ კომპიუტერში და გამოითხოვს ციხიდან ამ განცხადებების ავტორთა საქმეებს-განაჩენს, დახასიათებას,სცნობსა ჯანმრთელობის მდგომარეობაზე. აგვისტოს მერე ამ გამოთხოვის საფუძველზე კომისიაში შემოვიდა 1500 საქმე. შემდეგ კანცელარიიდან მიდის მოთხოვნა შსს სამინისტროში არის თუ არა ბრალეულობა მოხსნილი, ვის აქვს სასჯელის ნახევარი უკვე მოხდილი. მერე ის სამკაციანი კომისია აკეთებს სიას და შეწყალების კომისია იწყებს განხილვას. კომისიის სხდომამდე მე ვკითხულობ ყველა საქმეს, ვახარისხებ და ისე მიმაქვს კომისიამდე. ჩვენ ვიცით, რა მუხლების მიხედვით არ ვაძლევთ შეწყალების თანხმობას. ესაა-მკვლელობა, გაუპატიურება, განსაკუთრებით დიდი ოდენობით ნარკოტიკების გასაღება, მძიმე ფორმის ყაჩაღობა, ავტოკატასტროფა, მოკლედ ყველა დანაშაული, რომელიც ადამიანის სიკვდილით დასრულდა. შეწყალების კომისია საერთოდ არ იხილავს ტრეფიკინგს, ოჯახურ ძალადობას და ასევე არ იხილება 43-ე პრიმა მუხლი-თავისუფლების აღკვეთა. ასე გადავარჩიე 165 საქმე, თუმცა კომისიის წინაშე წარვადგნე მთლიანად 460 საქმე, რათა დანარჩენ საქმეებზეც ყოფილიყო მსჯელობა.
შეწყალების კომისიის სხდომა მიმდინარეობს 6-7 საათი, ასე რომ ჰარი-ჰარალეზე გადაწყვეტილებას არ ვიღებთ. 165 საქმიდან 48 საქმე ეხებოდა ქალებს, 7 საქმე -არასრულწლოვანებს. 48 საქმიდან თანხმობა შეწყალებაზე მიეცა 7 პატიმარს, რომლებიც მთლიანად გათავისუფლდნენ, 4 პატიმარს კი გაუნახევრდა სასჯელი. 7 არასრულწლოვანიდან განთავისუფლდა 3 პატიმარი, ერთს კი გაუნახევრდა სასჯელი. საბოლოო ჯამში განთავისუფლებული იქნა 161 პატიმარი, 33-ს გაუნახევრდა სასჯელი, ხოლო განსაკუთრებით მძიმე საქმის მქონე 127 პატიმარს მივეცით საშუალება პრეზიდენტის შეწყალების გამოყენების. ამ 127 პატიმარში იყო 7 პატიმარი, რომელთაც ბრალად ედებათ გაუფრთხილებლობის გამო გარდაცვალება, მაგრამ არსებულ საბუთებზე დაყრდნობით ამ 7 პატიმრიდან ორ ქალბატონს მივეცით რეკომენდაცია, თუმცა იმ პატიმრების გვარები, რომლებიც სააკაშვილმა შეიწყალა, არ ეწერა ჩვენს მიერ წარდგენილ სიაში. მე ნამდვილად არ ვიცი ვინ არის ის 250 შეწყალებული პატიმარი. საოცარია, როგორ შეიძლება შეიწყალო პატიმარი, რომელიც ციხეშიც კი არ ზის და გაქცეულია”, _ განაცხადა თევდორაძემ.
ელენე თევდორაძემ აღნიშნა ისიც, რომ ბოლო 8 წლის განმავლობაში პროკურატურაში იცხრილებოდა როგორც შეწყალების კომისიის მიერ გადაცემული, ისე საპატრიარქოს მიერ გადაცემული სიები.
