პარლამენტის პრესსამსახურის ინფორმაციით, პროექტის თანახმად წესდება დროებითი ნორმა, რომლის მიხედვით საინვესტიციო ფონდების საზედამხედველო ორგანოს უფლებამოსილებებს 2014 წლის 1 მარტამდე საქართველოს ეროვნული ბანკი განახორციელებს.
დარგობრივი ეკონომიკისა და ეკონომიკური პოლიტიკის და რეგიონული პოლიტიკისა და თვითმმართველობის კომიტეტებმა საქართველოს პრეზიდენტის მიერ რატიფიცირებისთვის წარმოდგენილი “ამერიკის შეერთებულ შტატებსა და საქართველოს შორის დახმარების შესახებ ხელშეკრულების (ინფრასტრუქტურისა და ეკონომიკური შესაძლებლობების გაუმჯობესებისა და იძულებითი გადაადგილებული პირების მხარდაჭერისათვის)” ცვლილება ნომერ სამი” განიხილეს.
აღნიშნული ცვლილება პროექტის დასრულების თარიღის (31.12.2014) 2017 წლის 30 სექტემბრამდე გაგრძელებას ითვალიწინებს. USAID-ის საგრანტო თანხა 109 560 599 აშშ დოლარიდან 124 633 774 აშშ დოლარამდე იზრდება. შესაბამისად, გაიზარდა საქართველოს მონაწილეობის კონტრიბუცია 24 376 437 აშშ დოლარიდან 27 858 654 აშშ დოლარამდე.
კომიტეტებმა რატიფიცირებისთვის წარმოდგენილი კიდევ ერთი – “საქართველოსა და აზიის განვითარების ბანკს შორის სასესხო ხელშეკრულებაში შესატანი ცვლილებები განიხილეს.
დარგობრივი ეკონომიკისა და ეკონომიკური პოლიტიკის კომიტეტის სხდომაზე დღის წესრიგით გათვალისწინებული რამდენიმე საკითხი განიხილეს. მათ შორის, “ინტელექტუალურ საკუთრებასთან დაკავშირებულ სასაზღვრო ღონისძიებათა შესახებ” საქართველოს კანონში ცვლილების შეტანის თაობაზე” კანონპროექტი, რომელიც პირველი მოსმენით, ფინანსთა მინისტრის მოადგილემ გიორგი თაბუაშვილმა წარადგინა.
პროექტის მიზანია ისეთი ცვლილებების შეტანა, რომლის მიხედვითაც შემოსავლების სამსახური ინტელექტუალური საკუთრების ობიექტების საბაჟო მიზნებისათვის რეგისტრაციის განმახორციელებელი ორგანო ხდება. მის კომპეტენციაში შევა ინტელექტუალურ საკუთრებასთან დაკავშირებული სასაზღვრო ღონისძიებების ჩამოყალიბება. წარმოდგენილი კანონპროექტის თანახმად, დგინდება დიზაინზე განსაკუთრებული უფლებების დარღვევით წარმოებული პროდუქციის სპეციალურ სასაზღვრო ღონისძიებათა გამოყენების წესი.
ცვლილების თანახმად, ინტელექტუალური საკუთრების ობიექტის მფლობელთა უფლებების დაცვას სსიპ – საქპატენტის ნაცვლად, სსიპ – შემოსავლების სამსახური განახორციელებს.
კომიტეტის წევრებმა საქართველოს მთავრობის მიერ საკანონმდებლო ინიციატივის წესით წარმოდგენილი “სახელმწიფო ქონების შესახებ” საქართველოს კანონში ცვლილების შეტანის თაობაზე” კანონპროექტი პირველი მოსმენით განიხილეს, რომელიც მიზნად ისახავს სახელმწიფო ქონების, მათ შორის სასოფლო-სამეურნეო დანიშნულების მიწის ნაკვეთების სარგებლობაში გადაცემის პოლიტიკის ახლებურად განსაზღვრას, აგრეთვე საქართველოს მთავრობის უფლებამოსილებების დაკონკრეტებას სახელმწიფო ქონების განკარგვასა და სარგებლობაში გადაცემასთან დაკავშირებით. პროექტით გაუქმდა რეგულაცია, რომლის მიხედვითაც შესაძლებელი იყო აუქციონზე გატანილი სახელმწიფო საკუთრებაში არსებული, იჯარით გაუცემელი სასოფლო-სამეურნეო დანიშნულების მიწის ნაკვეთის საწყისი საპრივატიზებო თანხის შემცირება. თუმცა, საქართველოს მთავრობის დადგენილებით გათვალისწინებულ განსაკუთრებულ შემთხვევებში საწყისი საპრივატიზებო საფასური შესაძლოა განისაზღვროს კანონით დადგენილ ღირებულებაზე ნაკლებ ფასად. აგრეთვე, სახელმწიფო საკუთრებაში არსებულ, პრივატიზებას დაქვემებარებულ სასოფლო-სამეურნეო დანიშნულების მიწებზე გავრცელდება სახელმწიფო ქონებით სარგებლობასთან დაკავშირებული რეგულაციები.
სხდომაზე კომიტეტის მიერ საკანონმდებლო ინიციატივის წესით წარმოდგენილი “დამოუკიდებელი ეროვნული მარეგულირებელი ორგანოების შესახებ” საქართველოს კანონში ცვლილების შეტანის თაობაზე” და მისგან გამომდინარე კანონპროექტები განიხილეს. მოქმედ კანონებში ცვლილებების განხორციელება იმ საკონსტიტუციო ცვლილებებმა განაპირობა, რომელიც ძალაში 2013 წლის ოქტომბრის მორიგი საპრეზიდენტო არჩევნების შედეგად არჩეული პრეზიდენტის მიერ ფიცის დადების მომენტიდან უნდა ამოქმედდეს.
კომიტეტმა რატიფიკაციისთვის კიდევ ერთი, “უნგრეთის რესპუბლიკის მთავრობასა და საქართველოს მთავრობას შორის სახმელეთო გზებით მგზავრების და ტვირთის საერთაშორისო ტრანსპორტირების შესახებ” შეთანხმება განიხილა.
დღესვე, კომიტეტის წევრებმა მოქალაქე ნუგზარ კიკნაძის მიერ წარმოდგენილი “საქართველოს საგადასახადო კოდექსში ცვლილების შეტანის შესახებ” და “საერთაშორისო გამჭვირვალობა-საქართველოს” მიერ წარმოდგენილი “საქართველოს საბიუჯეტო კოდექსში ცვლილების შეტანის შესახებ” და “სახელმწიფო შესყიდვების შესახებ” საქართველოს კანონში ცვლილების შეტანის თაობაზე” საკანონმდებლო წინადადებები განიხილეს.
