“თავშესაფრის ბინადრებს და ორგანიზატორებს ძალადობის საფრთხე დაემუქრა. მას შემდეგ, რაც ფართო საზოგადოებისათვის გახდა ცნობილი, რომ თბილისში უსახლკარო ოჯახებისთვის თავშესაფარი გაკეთდებოდა, ამ ადამიანებზე ამჯერად მაინც ყურადღების მიქცევის ნაცვლად, ფოკუსში ორგანიზაცია “იდენტობა” მოექცა. სახელმწიფოსა და ეკლესიის წარმომადგენელთა მხრიდან გაკეთდა რიგი უპასუხისმგებლო, ანტისახლმწიფოებრივი, მიზანმიმართულად მცდარი და სიძულვილით მოტივირებული განცხადებები. როგორც ჩანს, საქართველოს მოქალაქეთა ერთი ნაწილი კვლავ ვერ აცნობიერებს პრობლემის სერიოზულობას ან მიზანმიმართულადაა შეცდომაში შეყვანილი. შედეგად, სახეზეა მდგომარეობა, როდესაც დახმარების ნაცვლად, ყველაზე მიუსაფარი ადამიანებისთვის კვლავ რეალურია სიცივით თბილისის ქუჩებში გარდაცვალების საფრთხე. მრავლად გაისმა თავშესაფარსა და ორგანიზატორებზე თავდასხმის მუქარა. 17 მაისის გამოცდილების გათვალისწინებით, ეს ამ ეტაპზე შეუძლებელს ხდის უსახლკარო ოჯახების დახმარების პროცესის მშვიდობიან და პროფესიონალურ ორგანიზებას. “იდენტობას” დაუკავშირდნენ ბინათმესაკუთრეთა ამხანაგობის წარმომადგენლები, რომლებიც მათ საცხოვრებელ კორპუსში თავშესაფრის განთავსებას არ დაუშვებენ. მათი განცხადებით, თუ თავშესაფარი დაგეგმილ ადგილზე გაიხსნებოდა, ისინი ყოველდღიურად შეუქმნიდნენ მის ფუნქციონირებასა და მის მაცხოვრებლებს პრობლემებს. საქართველოს მართლმადიდებლური ეკლესიის რიგმა წარმომადგენლებმა და სხვა აგრესიულად განწყობილმა დაჯგუფებებმა, მათ ვინც 17 მაისს ადამიანთა სიძულვილის წინააღმდეგ მიმართული აქცია ძალადობრივად ჩაშალა, საჯაროდ განაცხადეს რომ არ დაუშვებდნენ აღნიშნული თავშესაფრის ფუნქციონირებას. საქართველოს საკანონმდებლო და აღმასრულებელი ხელისუფლების და მათთან ერთად მედიის წარმომადგენლები კვლავ ლეგიტიმურ მხარედ წარმოაჩენენ ამ მოძალადე დაჯგუფებებს. ვვარაუდობთ, რომ თუ თავშესაფარზე თავდასხმა განხორციელდებოდა, რისი მუქარაც მრავლად გაისმა, სახელმწიფო ზუსტად ისევე არ აღკვეთდა და არ გამოიძიებდა ამ დანაშაულებებს, როგორც ეს 17 მაისის შემდეგ ჩადენილ დანაშაულთა შემთხვევაში მოხდა. მიუხედავად იმისა, რომ ჩვენი ინიციატივა სამართლებრივად გამართულია და არ არსებობს კანონი, რომელიც ჩვენ თავშესაფრის დაარსებასა და მართვას აგვიკრძალავდა, ჩვენ ახლა ვერ ვიქნებით დარწმუნებულნი, რომ თავშესაფრის ბენეფიციარების უსაფრთხოება დაცული იქნება”, _ ნათქვამია სპეციალურ განცხადებაში.
სწორედ 17 მაისის ერთ–ერთი მონაწილე, ევგენი მიქელაძე არ უარყოფს, რომ “იდენტობის” მიერ თავშესაფარის გახსნას არ დაუშვებს. მეტიც, “ეროვნული ფრონტის” ლიდერის განცხადებით, “იდენტობის” ჩანაფიქრი ატარებს სატანისტურ მიზნებს.
“საკანონმდებლო დონეზე უნდა აიკრძალოს ლგბტ პროპაგანდა და შემდეგ ამ კანონის საფუძველზე ყველა ორგანიზაცია, რომელიც ამ ფასეულობების დამკვიდრებას ეცდება. ამ საკითხზე ჩვენ ხელმოწერების შეგროვებასაც დავიწყებთ. რაც შეეხება “იდენტობის” მზაკვრულ ჩანაფიქრს, ქართული საზოგადოების უდიდესი ნაწილი ამას არ დაუშვებს. თუ სახელმწიფო ვერ აცნობიერებს, რომ წესებს ადგენენ არა გარკვეული ეკონომიკური კლანები ოკეანეთის გაღმიდან, არამედ ქართველი ხალხი, მაშინ ჩვენ გავაგებინებთ და შედეგი მძიმე იქნება. ჩვენ ვაპირებთ სამართლებრივი გზით ამ პრობლემის მოგვარებას, მაგრამ თუ სახელმწიფო მხარს არ დაგვიჭერს, უკვე ჩვენით ვიმოქმედებთ. “ეროვნული ფრონტი” ღიად აცხადებს, რომ არასდროს შეეგუება მსგავსი ორგანიზაციების იდეების გატარებას და 17 მაისი მონაგონი იქნება”.
“იდენტობის” წინადადებას უარყოფითი რეაქცია მოჰყვა სასულიერო პირების მხრიდანაც. დავით სერგეენკომ კი აღნიშნა, რომ ასეთი იდეის განხორციელება არ უნდა მოხდეს იზოლირებულად, ის უნდა იყოს კომპლექსური, თუმცა “გურია ნიუსთან” საუბრისას, “იდენტობის” წარმომადგენელმა, ირაკლი ვაჭარაძემ აღნიშნა, რომ მათი ერთადერთი მიზანია უსახლკაროები ზამთრის ცივ დღეებში ქუჩაში არ დარჩნენ და თავშესაფარი ჰქონდეთ.
“მათი მიზანი მხოლოდ ერთია, ამ თავშესაფრის ბინადრებში დანერგონ და გაავრცელონ ის, რასაც ქართველი ხალხი ვერ შეეგუება, მათი მიზანია ტრადიციების მოშლა, ხოლო რაც შეეხება საპატრიარქოს და სახელმწიფოს, სწორედ მათი ბრალია „იდენტობა“ და მისი მსგავსი ორგანიზაციები საზოგადოების შეცდომაში შეყვანას რომ ცდილობენ. იმ პირობებში, როცა ქვეყანაში ამდენი სოციალურად დაუცველი ადამიანია, როცა უსახლკაროებისთვის ქაშუეთის უკან კარავია გაშლილი და უამრავი ბავშვი ქუჩაში ათენებს, მილიონების ხარჯვა ეკლესიების მშენებლობაზე ჩვენთვის პირადად მიუღებელია. სახელმწიფომ და ეკლესიამ უნდა გაააქტიურონ სოციალური პროექტები”.
ამ ეტაპისათვის “იდენტობის” მიერ თავშესაფრის აღარ აშენების შესახებ ოფიციალური განცხადების გარდა კომენტარები არ გაკეთეულა. ცნობილია მხოლოდ, რომ ორგანიზაციის ოფისში მიტანილი დახმარებები და თანხა გადაეცემათ იმ ადამიანებს, რომელთა დახმარებასაც აპირებდა “იდენტობა”.
“მიღებულ შემოწირულობებს, რომელიც დღეისათვის თანხის სახით არის 939 ლარი, ასევე მოქალაქეების მიერ ოფისში მოტანილ ტანსაცმელა, ჩვენ გადავცემთ იმ უსახლკაროებს, რომელთა დახმარებასაც ვგეგმავდით, ან სხვა დაწესებულებას, თუ არსებობს ასეთი ან უახლოეს პერიოდში ჩამოყალიბდება”, _ განაცხადა ირაკლი ვაჭარაძემ.
