მისივე თქმით, წელს ციტრუსის მოსავალი იმდენად კარგი დარჩა, რომ ხელისუფლებას თავი აშკარად ასტკივდა. ყველაფერი ეს კი არამარტო ციტრუსის მოსავლის მიღებისათვის ხელსაყრელი გარემოთია განპირობებული: აქ მთავარი როლი ითამაშა სწორედ იმან, რომ ხალხი დარწმუნებული იყო რუსეთის ბაზრის გახსნაში, ასევე დარწმუნებული იყო რეალიზაცია გასულ წლებზე უფრო ორგანიზებული და მასშტაბური იქნებოდა.
“ასეთი ვარაუდის საფუძველს აშკარად იძლეოდა სხვადასხვა პოლიტიკოსთა უსაფუძვლო და უპასუხისმგებლო გამოსვლები, რომლებშიც არაორაზროვნად იკვეთებოდა რუსეთის ბაზრის გახსნა და ის სიკეთეები რაც ყველაფერ ამას მოყვებოდა. ასეთ ინფორმაციით გაჯერებულ ფონზე მოსახლეობამ სერიოზული დანახარჯები და სამუშაოები გასწია ციტრუსის მოსავლის მიღებისათვის. ზოგმა კრედიტი აიღო, ზოგმაც უკანასკნელი დანაზოგი სწორედ ამ იმედით ჩადო, როგორც შემდგომში აღმოჩნდა, ფაქტიურად, უპერსპექტივო საქმეში.
საბოლოო ჯამში მოსავლის აღებისა და დაპირებების შესრულების დროს მეციტრუსეებს, არა რუსეთის ბაზარი, არამედ სააკაშვილის მიერ რამდენიმე წლის წინ ქობულეთში გახსნილი ციტრუსის გადამამუშავებელ საწარმო შერჩათ! ეს საწარმო აჭარის მანდარინს ვერ აუდის და იქ ჩასული გურულების მანდარინი მანამდე ლპება, სანამ პატრონი სხვადასხვა ინსტანციაში დარბის და მოწყალების სახით 12 თეთრად მანდარინის ჩაბარებაში დახმარებას ითხოვს.
სრულიად განსხვავებული სიტუაციაა საქართველოს სხვა რეგიონებში არსებულ სასოფლო-სამეურნეო პროდუქციის რეალიზაციასთან მიმართებაში. მაგალითად, კახეთში მევენახეებს დასეტყვილ და აუღებელ მოსავალში მისცეს კომპენსაცია, ასევე დოტაციაზეა ჩაბარებული ყოველი კილოგრამი ყურძენი. სააკაშვილის ხელისუფლებაც კი საგანგებო შტაბებს ქმნიდა და კანონიერი თუ უკანონო გზებით ცდილობდა და ახერხებდა მოსავლის მთლიანად, თანაც ხელსაყრელ ფასში, რეალიზაციას.
რატომ ხდება კახეთში ის, რაც გურიაში არ ხდება? მერწმუნეთ, ხელისუფლებას ყურძნის რეალიზაცია ისევე, “აინტერესებს”, როგორც ციტრუსის, მაგრამ აშკარაა, რომ იგი მოქმედებს მხოლოდ მეციტრუსეებისაგან ან მევენახეებისაგან სავარაუდო ზეოწლის ადეკვატურად. ყველას გახსოვთ, ალბათ, ის პერიოდი, როდესაც 2006-07 წლებში ყურძნის რეალიზაცია ჩავარდა, მთელი კახეთი გამოვიდა – ზოგმა ვენახის აჩეხვით, ზოგმაც უფრო მეტ-ნაკლები რადიკალური პროტესტით მთელი ქვეყანა აიყოლია და ერთერთი მთავარი საფუძველი გახდა იმ ანტისახელისუფლებო დემონსტრაციებისა, რომელსაც კინაღამ გადაყვა სააკაშვილის ხელისუფლება. ამის შედეგად ყურძნის ჩაბარება-რეალიზაციაში ყველაფერი მოგვარდა.
მანამ, სანამ ხელისუფლება არ იგრძნობს მეციტრუსეებისაგან სერიოზულ ზეწოლას, არამგონია ვინმემ ყურადღება მიაქციოს მათ პრობლემებს. აქედან გამომდინარე, მოვუწოდებ ყველა მეციტრუსეს არ გადაყაროს არცერთი კილოგრამი არა რეალიზებული ციტრუსი და არასერიოზული დაპირებების სანაცვლოდ მადლიერი მეციტრუსეებისაგან მიართვას ხელისუფლებას პირდაპირ ადმინისტრაციაში.
ასევე მივმართავ ხელისუფლებაში ბიზნესიდან მოსულებს – ეგებ უშველოთ რაიმე მეციტრუსეებს და თქვენს მიერ ბიზნესში მიღებული გამოცდილება მოახმაროთ. თუ რა თქმა უნდა ეს თქვენ გეხებათ და ამ საკითხზეც პროკურატურას თუ არ უნდა მივმართოთ?!”, _ ამბობს თამარ ნადირიძე.
