ჩოხატაურის მუნიციპალიტეტის საკრებულომ რეგლამენტი დაამტკიცა. რეგლამენტით დადგენილი უფლებამოსილების შესაბამისად, საკრებულო განსაზღვრავს მუნიციპალიტეტის განვითარების სტრატეგიასა და ძირითად მიმართულებებს, აკონტროლებს ადგილობრივი თვითმმართველობის აღმასრულებელი ორგანოს და თანამდებობის პირთა საქმიანობას, იღებს გადაწყვეტილებებს ადგილობრივი მნიშვნელობის საკითხებზე.
საქართველოს ორგანული კანონის _ "ადგილობრივი თვითმმართველობის კოდექსის" შესაბამისად, საკრებულო თავის უფლებამოსილებებს ახორციელებს მუნიციპალიტეტის ადმინისტრაციულ-ტერიტორიული ორგანიზებისა და მისი იდენტობის განსაზღვრის, ორგანიზაციული საქმიანობის, მუნიციპალიტეტის საკადრო პოლიტიკის განსაზღვრის, აღმასრულებელი ორგანოების საქმიანობის რეგულირებისა და კონტროლის, თვითმმართველი ერთეულის განვითარების დაგეგმვის, საფინანსო-საბიუჯეტო, მუნიციპალიტეტის ქონების განკარგვისა და მართვის, სოციალურ, კეთილმოწყობისა და საყოფაცხოვრებო-კომუნალურ, მიწათსარგებლობის და ბუნებრივი რესურსებით სარგებლობის, მუნიციპალიტეტის ტერიტორიის დაგეგმარების, ტრანსპორტისა და საგზაო მეურნეობის, აღრიცხვის, ინოვაციური განვითარების მხარდაჭერისა და ინფორმატიზაციის სფეროებში.
საკრებულოს უფლებამოსილებები საკმაოდ ვრცელია _ მუნიციპალიტეტში ადმინისტრაციული ერთეულების შექმნა და გაუქმება, მათი საზღვრების დადგენა/შეცვლა; მუნიციპალიტეტის შექმნის/გაუქმების, ადმინისტრაციული ცენტრის დადგენის/შეცვლის და ადმინისტრაციული საზღვრის შეცვლის შესახებ შუამდგომლობების წარდგენა; ადგილობრივი თვითმმართველობის სიმბოლოების _ გერბის, დროშისა და სხვა სიმბოლოების დადგენა და მასში ცვლილებების შეტანა; თვითმმართველი ერთეულის საპატიო წოდებებისა და ჯილდოების შემოღებისა და მათი მინიჭების წესების დადგენა; ისტორიულად ჩამოყალიბებული უბნის, ამა თუ იმ ზონის, მიკრორაიონის, წყაროს, მოედნის, პროსპექტის (გამზირის), გზატკეცილის, ქუჩის, შესახვევის, ჩიხის, გასასვლელის, სანაპიროს, ესპლანადის, ბულვარის, ხეივნის, სკვერის, ბაღის, პარკის, ტყე-პარკის, ადგილობრივი მნიშვნელობის ტყის, სასაფლაოს, პანთეონის, შენობა–ნაგებობა, სატრანსპორტო სისტემის ობიექტის სახელდება; "გეოგრაფიული ობიექტების სახელდების შესახებ" საქართველოს კანონის მე-10 მუხლის შესაბამისად, გეოგრაფიული ობიექტების სახელდება; დასახლებებში არსებული შენობა-ნაგებობების ნუმერაციის წესის დადგენა; გადაწყვეტილების მიღება სხვა თვითმმართველ ერთეულებთან ერთად არასამეწარმეო (არაკომერციული) იურიდიული პირის შექმნის, მასში გაწევრიანების ან წევრობიდან გამოსვლის შესახებ.
საკრებულოს უფლებამოსილებას ასევე განეკუთვნება: მუნიციპალიტეტის საკრებულოს თავმჯდომარისა და თავმჯდომარის მოადგილის არჩევა და თანამდებობიდან გადაყენება;
მუნიციპალიტეტის საკრებულოს კომისიის შექმნა, კომისიის თავმჯდომარის არჩევა და თანამდებობიდან გადაყენება, კომისიის პერსონალური შემადგენლობისა და დებულების დამტკიცება და მათში ცვლილებების შეტანა; მუნიციპალიტეტის საკრებულოს დროებითი სამუშაო ჯგუფების შექმნა და გაუქმება, დროებითი სამუშაო ჯგუფების პერსონალური შემადგენლობის დამტკიცება და მასში ცვლილების შეტანა; საკრებულოს წევრის უფლებამოსილების ცნობისა და მისი უფლებამოსილების ვადამდე შეწყვეტის შესახებ გადაწყვეტილებების მიღება; მუნიციპალიტეტის საკადრო პოლიტიკის განსაზღვრის, აღმასრულებელი ორგანოების საქმიანობის რეგულირებისა და კონტროლის სფეროში საკრებულოს უფლებამოსილებას განეკუთვნება:ადგილობრივი თვითმმართველობის აღმასრულებელი ორგანოებისა და თანამდებობის პირების საქმიანობის კონტროლი, მათი ანგარიშების მოსმენა და შეფასება; გამგებლისათვის უნდობლობის გამოცხადება საქართველოს ორგანული კანონით "ადგილობრივი თვითმმართველობის კოდექსი" დადგენილი წესით; ადგილობრივი თვითმმართველობის მოხელეთა დამატებითი საკვალიფიკაციო მოთხოვნების დადგენა; ადგილობრივი თვითმმართველობის მოხელეთა საკონკურსო-საატესტაციო კომისიის თავმჯდომარის დანიშვნა.
მუნიციპალიტეტის საკრებულოს დებულებაში პირველად გაჩნდა ერთი მნიშვნელოვანი ჩანაწერი, რომელიც შეზღუდული შესაძლებლობის მქონე პირებს ეხება.
საკრებულოს აქვს შეზღუდული შესაძლებლობის მქონე პირთა სოციალურ-საყოფაცხოვრებო მომსახურების წესებისა და პირობების დადგენის უფლება. ასევე აქვს უფლება ადგილობრივი მნიშვნელობის ობიექტებზე შეზღუდული შესაძლებლობის მქონე პირებისთვის, ბავშვებისა და მოხუცებისთვის სათანადო ინფრასტრუქტურის განვითარებისთვის, ადაპტირებისა და აღჭურვისთვის ღონისძიებები დაგეგმოს და შესაბამისი პროგრამა დაამტკიცოს.
გარდა ამისა, კიდევ ერთი სიახლე ის არის, რომ ჩოხატაურის საკრებულომ გარე რეკლამის განთავსების წესიც მიიღო და რეგლამენტის თანახმად, "რეკლამის შესახებ" საქართველოს კანონის მე-6 მუხლის შესაბამისად, გარე რეკლამის განთავსების ნებართვის შემოღების შესახებ გადაწყვეტილების მიღება და გარე რეკლამის გავრცელების გეგმის დამტკიცება მის კომპეტენციაში შედის.
დებულებაში ისიც წერია, რომ საკრებულოს სხდომის მიმდინარეობისას დაუშვებელია საკრებულოს სხდომაზე დამსწრე პირების მიერ მობილური ტელეფონებით სარგებლობა.
რაც შეეხება უშუალოდ საკრებულოს წევრებს; საკრებულოს წევრი არის საქართველოს ორგანული კანონის "საქართველოს საარჩევნო კოდექსის" შესაბამისად, ადგილობრივი თვითმმართველობის ორგანოში არჩეული პირი.
საკრებულოს წევრი სარგებლობს თავისუფალი მანდატით და მისი გაწვევა დაუშვებელია. თავისი მოვალეობის შესრულებისას იგი არ არის შეზღუდული ამომრჩევლებისა და მისი წარმდგენი პოლიტიკური გაერთიანებების განაწესებითა და დავალებებით. თავისუფალი მანდატი საკრებულოს წევრს არ ათავისუფლებს ამომრჩევლებთან მუშაობისა და მასთან დაკავშირებული პასუხისმგებლობისგან.
საკრებულოს წევრი ვალდებულია: მონაწილეობა მიიღოს საკრებულოს სხდომებსა და საკრებულოს კომისიათა მუშაობაში; შეხვდეს მოქალაქეებს; არ გამოიყენოს პირადი ინტერესებისთვის თავისი უფლებამოსილება ან/და მასთან დაკავშირებული შესაძლებლობა;
დებულებაში საკრებულოს წევრის უფლებამოსილების გახორციელებასთან დაკავშირებული ხარჯების ანაზღაურების საკითხიც გაიწერა.
საკრებულოს წევრს, საკრებულოს მიერ ინდივიდუალური ნორმატიული ადმინისტრაციულ–სამართლებრივი აქტით განსაზღვრული ლიმიტის ფარგლებში ადგილობრივი თვითმმართველი ერთეულის ბიუჯეტიდან უნაზღაურდება საკრებულოს წევრის უფლებამოსილების გახორციელების მიზნით გაწეული ხარჯები, რომლის ზღვარი 400 ლარით განისაზღვრა.
_ 400 ლარი ზღვარია. შესაძლებელია, ზოგმა 300 მიიღოს, ზოგმა _ უფრო ცოტა. ეს მათ მუშაობაზეა დამოკიდებული. დეპუტატმა, ამ თანხის მისაღებად უნდა წარმოადგინოს მოსახლეობასთან შეხვედრის ოქმები, დაესწროს საკრებულოს სხდომებს. წინააღმდეგ შემთხვევაში, გატარდება სანქციები და თანხა დაექვითებათ, _ აღნიშნა ჩვენთან საუბრისას ჩოხატაურის საკრებულოს თავმჯდომარემ ზაალ მამალაძემ.
აღსანიშნავია, რომ უფლებამოსილების თანხას არ მიიღებენ საკრებულოში მომუშავე თანამდებობის პირები. საქართველოს და შესაბამისად ჩოხატაურის პრაქტიკაში, ეს პირველი შემთხვევაა, როცა საკრებულოს თანამდებობის პირი, ხელფასთან ერთად სადეპუტატო უფლებამოსილების თანხას არ მიიღებს.როგორც ზაალ მამალაძე ამბობს, ეს არის კოალიციის და გურიის გუბერნატორის რეკომენდაციაც და წინასაარჩევნოდ გაცემული დაპირებების შესრულებაც:
_ ჩვენ ხელისუფლებაში მოვედით საქმის საკეთებლად და არა ხელფასებისთვის, დამატებითი სარგოებისთვის ბიუჯეტის დასახარჯად. ჩოხატაურზე ზრუნვა, ზედმეტი თანხების გარეშეც შეიძლება. ჩვენი გუნდი ამ საკითხში ერთსულოვანია და ყველა ჩვენგანი ყველაფერს გააკეთებს იმისთვის, რომ გაცემული დაპირებები აუცილებლად შესრულდეს. ეს შემთხვევაც ამის ერთ-ერთი დასტურია, _ აღნიშნა მამალაძემ.
