მურმან დუმბაძე “ქართული ოცნებიდან” გარიცხეს

ბათუმის მაჟორიტარი დეპუტატი  "ქართული ოცნების" პოლიტსაბჭოზე მიღებული გადაწყვეტილების თანახმად პარტიიდან გარიცხეს.

 აჭარის უმაღლესი საბჭოს სამ დეპუტატს _  ალექსანდრე ჩიტიშვილს, მედეა ვასაძეს და ჯემალ ფუტკარაძეს საყვედური გამოუცხადეს.

ამის შესახებ განცხადება "ქართული ოცნების" თავმჯდომარემ ირაკლი ღარიბაშვილმა გააკეთა. მთავრობის მეთაურის განმარტებით, დუმბაძე გაფრთხილების მიუხედავად, უხეშად ერეოდა აჭარის მთავრობის საქმიანობაში.

რაც შეეხება ჩიტიშვილს, ვასაძეს და ფუტკარაძეს, ღარიბაშვილის თქმით, უმაღლესი საბჭოს დეპუტატებმა განცხადებები, რომელიც აჭარის მთავრობის საქმიანობას ეხებოდა,  პარტიასთან შეუთანხმებლად გააკეთეს.

"პარტიის პოლიტსაბჭოს გადაწყვეტილებით, ყველა ის საკითხი, რომელსაც აჭარის უმაღლესი საბჭოს ფრაქცია "ქართული ოცნების" წევრები აყენებენ, დეტალურად იქნება შესწავლილი და საჭიროების შემთხვევაში შესაბამისი რეაგირება მოჰყვება", – განაცხადა კოალიციის ლიდერმა.
პრემიერ-მინისტრის განცხადებით, პარტია "ქართული ოცნება – დემოკრატიული საქართველოს" სამდივნომ ბათუმის მაჟორიტარი დეპუტატის, პარლამენტის ვიცე-სპიკერის, მურმან დუმბაძის ქმედებებზეც იმსჯელა.
"სამწუხაროდ, მურმან დუმბაძე ცდილობდა, უხეშად ჩარეულიყო აჭარის მთავრობის საქმიანობაში. ჯერ კიდევ ბიძინა ივანიშვილმა არაერთხელ გააფრთხილა იგი სიტყვიერად, აღარ ჩაერულიყო აჭარის მთავრობის საქმიანობაში. ჩვენი მთავარი მონაპოვარი არის ის, რომ მოხდა ხელისუფლების რეალური გადანაწილება, მკაფიოდ გამიჯნულია პრეზიდენტის, პარლამენტის, მთავრობის, მათ შორის, აჭარის მთავრობის და აჭარის უმაღლესი საბჭოს ფუნქციები. სამწუხაროდ, მურმან დუმბაძის ქმედებები ძალიან სერიოზულ კითხვებს ბადებდა ჩვენში. მისი მცდელობა, რომ საკუთარი გავლენის ქვეშ მოექცია, როგორც აჭარის უმაღლესი საბჭო, ისე აჭარის მთავრობა, უშედეგოდ დასრულდა. ორი წლის შემდეგ და არაერთი გაფრთხილების მიუხედავად, იგი აგრძელებდა მსგავს დესტრუქციულ მოქმედებას. ამიტომ, ჩვენ გავაანალიზეთ მისი ქმედებები და, სამდივნოს გადაწყვეტილებით, იგი გარიცხულია პარტია „ქართული ოცნებიდან", – აღნიშნა ირაკლი ღარიბაშვილმა.