"რთველი 2014" კახეთში დასასრულს უახლოვდება. ამ დროისთვის გადამუშავებულია 116 ათას ტონაზე მეტი ყურძენი, რეგიონის მოსახლეობის შემოსავლებმა კი რეკორდულ მაჩვენებელს _ 155 მლნ ლარს გადააჭარბა.
"ეს არის უპრეცედენტო ციფრები. მიუხედავად იმისა, რომ დაზიანდა ყურძენი და საუბარი იყო მოსავლის ნაკლებობაზეც, სტატისტიკა სხვა რამეს აჩვენებს. შემოსავლების ზრდის ტენდენცია, ვფიქრობთ, მომავალშიც გაგრძელდება", _ ასე შეაფასა "რთველი 2014" სოფლის მეურნეობის მინისტრმა ოთარ დანელიამ.
რთველით კმაყოფილები არიან მევენახეებიც, რომლებსაც წელს დაკრეფილ 1 კილოგრმა რქაწითელში, 1 ლარზე ნაკლები არ აუღიათ, ხოლო საფერავის ფასმა 3,40 ლარსაც მიაღწია. მეწარმეების წახალისება, მეტი გადაეხადათ გლეხისთვის, საქართველოს პრემიერ-მინისტრის განკარგულებამ განაპირობა, რომლის მიხედვითაც, სუბსიდირებას მხოლოდ ის მეწარმე მიიღებდა, რომელიც კილოგრამ ყურძენში ლარზე მეტს გადაიხდიდა.
"ძალიან კარგი რთველი გვქონდა წელს კახელებს, ფასიც _ შესაბამისი. კმაყოფილები ვართ. არანაირი პრობლემა ჩაბარების დროს არ გვქონია", _ ამბობენ მევენახეები.
წინა წელთან შედარებით, გაზრდილია ღვინის ექსპორტის მაჩვენებელიც _ ღვინის ეროვნული სააგენტოს მონაცემებით, 2014 წლის 9 თვეში (იანვარ-სექტემბერი) მსოფლიოს 39 ქვეყანაში ღვინის ექსპორტმა 42 800 528 (0,75 ლიტრი) ბოთლი შეადგინა, რაც 62%-ით მეტია წინა წლის შესაბამისი პერიოდის ანალოგიურ მაჩვენებელთან შედარებით. ქართული ღვინის საექსპორტო ბაზრების პირველი ხუთეული შემდეგნაირად გამოიყურება: რუსეთი, უკრაინა, ყაზახეთი, პოლონეთი და ბელარუსი, სადაც რუსეთი ლიდერობს 65%-ით ექსპორტის მთლიან მოცულობაში. ღვინის ექსპორტმა რუსეთში, 2014 წლის პირველი 9 თვის მონაცემებით, 27 937 836 ბოთლი შეადგინა. საექსპორტო ქვეყნების ათეულშია ჩინეთი, ლატვია, ლიტვა, ესტონეთი და აზერბაიჯანი. ღვინის ექსპორტმა თანხაში 137 104 668 აშშ დოლარი შეადგინა, რაც 64%-ით აღემატება 2013 წლის შესაბამისი პერიოდის ანალოგიურ მაჩვენებელს. ამასთან, სექტემბრის მდგომარეობით, 14 ქვეყანაში ექსპორტირებულია 8 787 177 (0, 5ლ) ბოთლი ბრენდი. 2014 წლის განვლილ 9 თვეში, ბრენდის ექსპორტმა თანხაში 29 043 599 აშშ დოლარს მიაღწია, რაც 41%-ით აღემატება გასული წლის შესაბამისი პერიოდის ანალოგიურ მაჩვენებელს. ბრენდის ექსპორტიორ ქვეყნებში კვლავ ლიდერობს უკრაინა, სადაც იანვარ-სექტემბრის მდგომარეობით, ექსპორტმა 4 281 222 ბოთლი შეადგინა, მეორე ადგილს 3 976 884 ბოთლით რუსეთი იკავებს.
საქართველოს პრემიერ-მინისტრის განცხადებით, ღვინის ექსპორტის ზრდა მევენახეებისთვის სტიმულის მომცემია. ამით ისინი უფრო დაინტერესდებიან ვაზის გაშენებით.
მთავრობის მეთაურმა, ღვინის პოპულარიზაციის მიზნით, ქართული ღვინის დღე დააწესა. ეს თარიღი წელს პირველად 4 ოქტომბერს აღინიშნა და იგეგმება, რომ მომავალში ტრადიციად დამკვიდრდეს.
ირაკლი ღარიბაშვილმა ამ დღესთან დაკავშირებით კახეთში, ყვარლის რაიონში, მინისტრებთან ერთად ყურძნის დაკრეფაში მიიღო მონაწილეობა და რთველის შედეგებიც შეაჯამა:
"დღეს ერთგვარად რთველის სიმბოლური შეჯამება გვაქვს და მიმაჩნია, რომ წელს საუკეთესო რთველი და საუკეთესო წელი იყო, ვინაიდან გლეხები, მევენახეები ძალიან ბედნიერები, კმაყოფილები არიან. ამ ეტაპზე, კახეთში 115 ათასი ტონა ყურძენია მოკრეფილი, ამაში რაჭის მოსავალი არ შედის. მევენახეების შემოსავლებმა, ჯამში, 155 მილიონი ლარი შეადგინა. ეს უპრეცედენტო, წარმატებული რთველია. და რაც მთავარია, ეს დიდი მოტივაცია, სტიმულის მიმცემია გლეხებისთვის. 4 ათას ჰექტარზე უკვე გაშენდა ახალი ვენახი, რაც სწორედ იმაზე მიუთითებს, გლეხს გაუჩნდა მოტივაცია და სურვილი, რომ ვენახი გააშენოს. არიან ოჯახები, რომლებმაც 10, 20, 50 და 100 ათასი ლარის შემოსავალი მიიღეს. სოფლებში ეს ძალიან დიდი დახმარებაა," _ განაცხადა საქართველოს პრემიერ-მინისტრმა.
პრემიერ-მინისტრის ინიციატივით დაწესებული ქართული ღვინის დღის ორგანიზატორები არიან: საქართველოს სოფლის მეურნეობის სამინისტრო, სსიპ ღვინის ეროვნული სააგენტო, ალავერდის ეპარქია, ასოციაცია "ქართული ღვინო" და საქართველოს სომელიეთა ასოციაცია.
მთავრობის მეთაური რთველში მონაწილეობასთან ერთად, ალავერდის სამონასტრო კომპლექსში საზეიმო დოღს დაესწრო და შეკრებილ საზოგადოებას სიტყვით მიმართა. ირაკლი ღარიბაშვილმა იმედი გამოთქვა, რომ მომავალში ღვინის დღე ნამდვილ ეროვნულ დღესასწაულად იქცევა:
"ამ დღის დაწესება ღვინის კულტურის უძველესმა და უნიკალურმა ისტორიამ გადაგვაწყვეტინა. ქართველი კაცისთვის, გადაჭარბების გარეშე შეიძლება ითქვას, რომ ვაზი და ღვინო ქართველობის იდენტობის ტოლფასია. ქართული მეღვინეობის ისტორია ქართველი ხალხის ისტორიასთან არის გადაჯაჭვული. სწორედ საქართველოშია კულტურული მევენახეობის უძველესი ნაკვალევი", _ განაცხადა ღარიბაშვილმა.
პრემიერ-მინისტრმა ღვინის დაყენების უნიკალურ, ათასწლოვან ტექნოლოგიაზეც ისაუბრა და აღნიშნა, რომ მთავრობის გადაწყვეტილებით, ღვინის მუზეუმი აშენდება, რომელშიც თავმოყრილი იქნება ქართული ღვინის მთელი ისტორია.
ირაკლი ღარიბაშვილმა დოღში გამარჯვებულს ერეკლე მეფის ხმლის ასლი გადასცა; პრემიერ-მინისტრსა და ალავერდის მიტროპოლიტ დავითს ღვინის ეროვნული სააგენტოს თავმჯდომარემ ლევან დავითაშვილმა საფერავის ბოკალის ორი ექსკლუზიური ნიმუში უსახსოვრა.
ავსტრიელი ოსტატის გეორგ რიდელის მიერ შექმნილი საფერავის ბოკალის პრეზენტაცია ქართული ღვინის დღის ფარგლებში თბილისში, სასტუმრო "მერიოტ თბილისში" გაიმართა, რომელსაც თბილისის მერი დავით ნარმანია და ღვინის ეროვნული სააგენტოს თავმჯდომარე დაესწრნენ; საფერავის დასაგემოვნებლად ექსკლუზიური ბოკალი მსოფლიოს წამყვანმა ბრენდმა, 300-წლიანი ისტორიის მქონე ავსტრიულმა საგვარეულო კომპანია "რიდელმა" შექმნა. ღვინის ეროვნული სააგენტოს განცხადებით, ამით საფერავი ღირსეულ ადგილს დაიმკვიდრებს მსოფლიოს 20-მდე წამყვანი ჯიშების ექსკლუზიური ბოკალების კოლექციაში.
თბილისსა და კახეთში ღვინის დღესთან დაკავშირებით გამართულ ღონისძიებებს უამრავი სტუმარი _ სამთავრობო, არასამთავრობო, კერძო სტრუქტურებისა და დიპლომატიური კორპუსის წარმომადგენლები, ადგილობრივი მცხოვრებლები და ტურისტები სტუმრობდნენ.
დღესასწაულში აქტიურ მონაწილეობას იღებდნენ ქართული ღვინის კულტურის პოპულარიზაციის მიზნით შექმნილი ახალგაზრდული მოძრაობის 200-ზე მეტი წარმომადგენელი, ასევე ივანე ჯავახიშვილის სახელობის თბილისის სახელმწიფო უნივერსიტეტის, ტექნიკური უნივერსიტეტის და კავკასიის უნივერსიტეტის სტუდენტები.
სიონის ქუჩაზე, "ქარვასლის" წინ მოეწყო ქართული ღვინოების დეგუსტაცია. ამასთან, დეგუსტაცია და სხვადასხვა სანახაობითი ღონისძიება თელავის ცენტრში, იუსტიციის სახლის წინ, ერეკლეს მოედანზეც გაიმართა.
"რთველი 2014" დაიწყო რაჭაშიც. რთველის საკოორდინაციო შტაბი ქალაქ ამბროლაურში გაიხსნა. შტაბის გახსნას ღვინის ეროვნული სააგენტოს თავმჯდომარე ლევან დავითაშვილი, სოფლის მეურნეობის სამინისტროსა და ადგილობრივი ხელისუფლების წარმომადგენლები დაესწრნენ.
რაჭაში ყურძნის მიღება-გადამუშავების მზადყოფნა გამოთქვა და დარეგისტრირებულია 14 ღვინის კომპანია. წელს, წინასწარი პროგნოზით მუჯურეთულისა და ალექსანდროულის სავარაუდო მოსავალი 800-900 ტონას შეადგენს.
ღვინის ეროვნული სააგენტოს განცხადებით, მკაცრად კონტროლდება, რომ რეგიონში არ მოხვდეს სხვა ზონიდან შემოტანილი ყურძნის ჯიშები, რათა დაცული იყოს "ხვანჭკარას" ხარისხი.
ისევე, როგორც კახეთში, საკოორდინაციო შტაბი რაჭაშიც 24-საათიან რეჟიმში მუშაობს და შარშანდელის მსგავსად, ჩაბარებული ყურძენი, სპეციალური კომპიუტერული პროგრამის მეშვეობით, ერთიან ელექტრონულ ბაზაში აღირიცხება. მოქმედებს "ცხელი ხაზი" _ 2 47 01 01, რომელიც 24 საათის განმავლობაში ემსახურება დაინტერესებულ პირებს.
(R)
