წყაროსვე თქმით, ერთ-ერთი ვერსიით, პოლიცმაისტერის თანამდებობიდან გათავისუფლება, მამის _ თამაზ ურიდიას მიერ, ჩოხატაურის ერთ-ერთ უბანში უკანონოდ სამი ჰექტარი ჩაის ნაკვეთის შემოღობვას უკავშირდება. მეორე ვერსიით კი, თვენახევრის განმავლობაში მიმდინარეობდა მის გათავისუფლებაზე საუბარი, რის მიზეზი განაწყენებული მოქალაქეების მიერ სამმართველოს უფროსის სახელზე შესული განცხადებები ყოფილა.
გია ურიდია ერთ-ერთი მაღალჩინოსანი ძალოვანია, რომელიც ბახმაროს სკანდალს გადაურჩა და სხვა სამართალდამცავი მაღალჩინოსნებისგან განსხვავებით, შეძლო თანამდებობის შენარჩუნება, თუმცა რის სანაცვლოდ, ეს, ჯერჯერობით, უცნობია. ჩვენი წყაროს ინფორმაციით, ბახმაროს ტყეების სკანდალი სწორედ ოზურგეთის პოლიციის აწ უკვე ყოფილი უფროსის გია ურიდიასგან “გასკდა”, რის საფუძველზეც კონსტიტუციური უსაფრთხოების დეპარტამენტმა მოკვლევა დაიწყო. ამის გამო, მას თურმე, სოლიდური პრემიაც გამოუწერეს და მაიორის ჩინიც მისცეს. ჩვენი წყარო ამტკიცებს, რომ ურიდიამ ამ გახმოვანებით არასასურველი კადრები მოიცილა და მინისტრის კარზეც პოზიციები გაიმყარა, თუმცა, თუ დავუჯერებთ ხმებს მისი გათავისუფლების შესახებ, დროებით.
ურიდია რამდენიმე წლის წინ ურეკის ქვეგანყოფილების უფროსად დაინიშნა. მან ქურდული სამყაროს წევრის, შაქრო კალაშოვის ახლობელს ქონება ჩამოართვა, პრეზიდენტის ფავორიტი გახდა და იგი მიხეილ სააკაშვილმა ღირსების ორდენითაც დააჯილდოვა. ამის შემდეგ ოზურგეთის პოლიციის უფროსის თანამდებობა დაიკავა.
ჩოხატაურის მუნიციპალიტეტის საკრებულოს ეთიკის კომისიის თავმჯდომარე თამაზ ურიდია “გურია ნიუსთან” საუბარში უარყოფს გავრცელებულ ინფორმაციას: _ ეს ინფორმაცია ტყუილია და რეალობას არ შეესაბამება. მე უკანონოდ არაფერს გავაკეთებ. შეგიძლიათ, გადაამოწმოთ ლეგალიზაციის კომისიაში. და კიდევ _ ჩემი შვილი სამსახურიდან არ გაუთავისუფლებიათ, _ გვითხრა თამაზ ურიდიამ, თუმცა, ჩვენი კიდევ ერთი წყარო ამტკიცებს, რომ გია ურიდია ნამდვილად დააქვეითეს და სამხარეო პოლიციაში ერთ-ერთ დაბალ თანამდებობაზე გადაიყვანეს.
