დღეს ოზურგეთში საქართველოს პარლამენტის ჯანდაცვისა და სოციალურ საკითხთა კომიტეტის თავმჯდომარე, დიმიტრი ხუნდაძე, მისი მოადგილე მირიან წიკლაური, დემოგრაფიული აღორძინების ფონდის თავმჯდომარე თამარ ჩიბურდანიძე და საქართველოს პარლამენტის წევრი ზვიად კვაჭანტირაძე იმყოფებოდნენ. მათ საზოგადოებას გააცნეს იმ დემოგრაფიული ფონის შესახებ, რომელიც არსებობს საქართველოში. შეხვედრა ქალაქ ოზურგეთის მერმა, ბეგლარ სიორიძემ გახსნა.
“ეს შეხვედრა მიზნად ისახავს მოსახლეობის ინფორმირებას საქართველოში არსებული დემოგრაფიული პრობლემების და ამასთანავე, ჯანდაცვისა და სოციალურ სფეროში განხორციელებული წარმატებული პროექტების შესახებ. _ თქვა ბეგლარ სიორიძემ.
თამარ ჩიბურდანიძის ინფორმაციით, გურია ეს არის უმძიმესი დემოგრაფიული პრობლემის წინაშე რეგიონი.
"გურია საქართველოში არის მეორე რეგიონი რაჭა-ლეჩხუმის შემდეგ სადაც – სიკვდილიანობა მკვეთრად აღემატება შობადობას. ჩვენი შეხვედრის თემა და მიზანია მოსახლეობის ინფორმირება იმ უმძიმესი პრობლემის შესახებ, რასაც ჰქვია საქართველოს დემოგრაფიული მდგომარეობა. ორი წლის წინ, როდესაც ახალი პოლიტიკური გუნდი მოვიდა პოლიტიკაში, რა თქმა უნდა დაიწყო პრიორიტეტებზე მუშაობა თუ რაზე, რა თემებზე უნდა დაწყებულიყო ქვეყანაში ძირეული ცვლილებები და სიღრმისეული მუშაობა. ერთ-ერთ პრიორიტეტულ საკითხად გამოიკვეთა დემოგრაფიული მდგომარეობა, რომლის ინიციატორი იყო დიმიტრი ხუნდაძე, რომელმაც მაშინდელ პრემიერ-მინისტრთან ბიძინა ივანიშვილთან შეათანხმა და პირველად დაფუძნდა დემოგრაფიული აღორძინების ფონდი“, _ თქვა თამარ ჩიბურდანიძემ.
დიმიტრი ხუნდაძემ კი ვრცლად ისაუბრა თუ რა კეთდება სახელმწიფოში ამ პრობლემების მოსაგვარებლად.
"გამოგიტყდებით, რომ ჩემი პასუხისმგებლობა არის გაათმაგებული იმიტომ, რომ გურია ჩემათვის არის განსაკუთრებული. მე გურიის წარმატება ძალიან მახარებს ისევე, როცა რაიმე პრობლემის წინაშე დგას კონკრეტულად ეს რეგიონი. დღეს იმის გამო ჩამოვედით, რომ რეალური ინფორმაცია მოგაწოდოთ“, _ განაცხადა დიმიტრი ხუნდაძემ.
შეხვედრას, რომელიც ალექსანდრე წუწუნავას სახელობის დრამატულ თეატრში გაიმართა, უფრო მეტად საჯარო მოხელეები და თანამდებობის პირები ესწრებოდა.
“გურია ნიუსი“ ამ თემასთან დაკავშირებით ვიდეო და ტექსტურ მასალას მოგვიანებით შემოგთავაზებს.
