“ეს გამგებლის თხოვნაა და ბრძანებაც!”

საპარლამენტო არჩევნების მოახლოებასთან დაკავშირებით, ხელისუფლებამ ხმების მოსაგროვებლად საკმაოდ ძველი ხერხი განაახლა _ დაიწყო საჯარო დაწესებულებებში კიდევ უფრო მეტი მოქალაქის დასაქმება.

“ქვა რომ ისროლო, თავში ახლახან დასაქმებულს მოხვდება, იმდენადაა გაბერილი შტატები,” _ ამბობს ჩვენი წყარო.

_ ოზურგეთის მუნიციპალიტეტის ზედამხედველობის, მიწის, ქონების მართვის, გურიის საგანგებო სიტუაციათა მართვის და სახანძრო სამსახურში, ოზურგეთის მუნიციპალიტეტის დასუფთავების სამსახურში, მუნიციპალიტეტის გამგეობაში ახლად შექმნილ სოფლის მეურნეობის სამსახურში უამრავი ახალი თანამშრომელი მიიღეს. თითოეულ სამსახურსა და ა(ა)იპ-იებში, თითქმის ყოველდღე ახალ თანამშრომლებს იღებენ, _ გვარწმუნებს იგივე წყარო და დასძენს, რომ “თითო დასაქმებულს, საარჩევნოდ, სულ მცირე, 20 ხმის “მოტანა” ევალება ხელისუფლებისთვის. ამ მეთოდით თუ იმუშავეს, არჩევნებს მარტო მაგით მოიგებენ”.

წყაროს თქმით, ოზურგეთის მუნიციპალიტეტის საბიუჯეტო სამსახურებში და ა(ა)იპ-იებში შედიან ხელისუფლებისგან შეგზავნილი მოქალაქეები და დასაქმებულებს ეუბნებიან: ეს გამგებლის თხოვნაცაა და ბრძანებაც, თქვენი საცხოვრებელი უბნის მიხედვით, უნდა აღწეროთ, ვინ არის ხელისუფლების მომხრე და დაუწეროთ პლუსი, ვინც არაა მომხრე, მას _ მინუსი! “გაშიფრულ” ადამიანებზე ჩვენ კი ვიმუშავებთო, _ უთხრა “გურია ნიუსს” წყარომ. მისივე თქმით, ოზურგეთის მუნიციპალიტეტის სოფლების რწმუნებულებს სპეციალურ შეხვედრაზე ხელისუფლებამ ულტიმატუმი წაუყენა: “ხელფასი იმიტომ მოგიმატეთ, რომ არ გაბედოთ, თქვენს სოფელში ვინმე ოპოზიციურად განწყობილი მცხოვრები იყოსო”.

იმის გარკვევას, თუ რამდენად შეესაბამებოდა სინამდვილეს ჩვენი წყაროს მიერ მოწოდებული ინფორმაცია, “გურია ნიუსი” ორი დღის განმავლობაში ცდილობდა და პასუხის ოზურგეთის მუნიციპალიტეტის გამგებლის მოვალეობის შემსრულებლის, ილია ვაშაყმაძისგან ელოდა, რომელმაც აშკარად აარიდა თავი პასუხს და პრესსამსახურთან გადაგვამისამართა. გამგეობის პრესსამსახურის ხელმძღვანელმა, იზა დარჩიამ “გურია ნიუსს” უთხრა, ჩემზე რაც არის დამოკიდებული, ყოველთვის პირნათლად ვასრულებ, უბრალოდ, გამგებლის გადატვირთული გრაფიკის გამო, მასთან შეხვედრა ვერ მოვახერხეო. ამის შემდეგ, ვაშაყმაძეს და დარჩიას ვუთხარით, რომ სტატიას კომენტარის გარეშე დავბეჭდავდით. რამდენიმე წუთში, ილია ვაშაყმაძე თავად დაგვიკავშირდა და გვითხრა:

_ მე თუ ვინმეს ვასაქმებ და ჩვენ თუ ვინმეს ვასაქმებთ, თქვენ კი ამაში ცუდს ხედავთ, ძალიან გასაკვირია. რა თქმა უნდა, ეს არ არის არჩევნებთან დაკავშირებული. ეს იქნება არჩევნების მერეც, რადგან ადამიანებს სჭირდებათ დასაქმება. ჩემი მიდგომა ასეთია _ მაქსიმალურად გადაიჭრას პრობლემა, რომელიც არსებობს. თქვენ თუ სხვანაირად ამბობთ და ისე ხსნით, რომ ეს დასაქმებები არჩევნებს უკავშირდება, ეს არის აბსურდი, რაზეც კომენტარს არ გავაკეთებ.

_ ბატონო ილია, ეს ჩვენი მოსაზრება არ არის, ეს არის თქვენ მიერ დასაქმებული ადამიანებისგან გამოსული ინფორმაცია, რომლის გადამოწმებასაც თქვენთან უკვე ორი დღეა, ვცდილობთ.

_ ვინ ამბობს ამას? მითხარით, კონკრეტულად.

_ ვერ გეტყვით.

_ მაშინ მითხარით, ვინ დავასაქმეთ ისეთი, ვინც უღირსია და ამბობს, რომ მხოლოდ საარჩევნოდ დავასაქმეთ? ჩვენ არავის არ ვასაქმებთ არაპროფესიონალს. ადამიანი, რომელიც დაკისრებულ მოვალეობას შეასრულებს, ყოველთვის დავასაქმებთ.

_ ბატონო ილია, თქვენ ხომ ბრძანდებით ერთიანი ნაციონალური მოძრაობის ოზურგეთის რაიონული ორგანიზაციის თავმჯდომარე?

_კი, ბატონო.

_ იმ ინფორმაციასაც უარყოფთ, რომ თქვენ მიერ ჩატარებულ თათბირებზე სოფლის რწმუნებულებს უკვე გარკვეულ საარჩევნო დავალებებს აძლევთ, რომ თავიანთ სოფლებში პოლიტიკური პოზიციის მიხედვით “გაშიფრონ” ადგილობრივი მცხოვრებნი?

_ თათბირებს ვატარებ, რა თქმა უნდა, აბა, რას ვშვები? მე სოფლის რწმუნებულებს გარკვეულ დავალებებს ვაძლევ, ისეთს, როგორიც უნდა მიიღოს გამგებლისგან სოფლის რწმუნებულმა. მაგალითად, უნდა მიაქციონ ყურადღება სოფელს, უნდა გაითავისონ თავიანთ სოფლებში მცხოვრებთა გულისტკივილი და პრობლემები. მე კვლავაც დიდხანს გავაგრძელებ ასეთ რიტმში მუშაობას, შეხვედრებს და მითითებებს.

რესპუბლიკური პარტიის წევრი, მარინე სუნგულია “გურია ნიუსთან” საუბარში, გავრცელებულ ინფორმაციასთან დაკავშირებით ამბობს: _ ხელისუფლებისგან მსგავსი უზნეო ქმედებები ახალი არ არის, მაგრამ ვფიქრობ, უკვე იმდენად შეცბუნებული არიან, რომ ქცევას ვეღარ აკონტროლებენ. ადამიანებს, რომლებიც საჯარო სამსახურებში დაასაქმეს, მუდმივად ახსენებენ, რომ თუ მათი “მამა და მარჩენალის” თხოვნა-ბრძანებებს არ შეასრულებენ, ლუკმა-პურს დაკარგავენ. ვფიქრობ, რომ ეს საზოგადოების უდიდესი შეურაცხყოფაა. ეს ქმედება ძალიან ჰგავს ავადსახსენებელ 30-იან წლებს, როცა მეგობრების და მეზობლების დასმენას აიძულებდნენ საზოგადოებას. მე იმის ილუზია არ მაქვს, რომ ხელისუფლება ზნეს შეიცვლის, მაგრამ საზოგადოებამ, ვფიქრობ, ეს გამოწვევა შეურაცხყოფად უნდა მიიღოს, ქართველი კაცის ისტორიულად ცნობილ ღირსებაზე უარი არ თქვას და მოიქცეს ისე, როგორც მორალი მოითხოვს.