ლანჩხუთის მუნიციპალიტეტის სტიქია უტევს. დაზიანებულია გზები, ხიდები, საცხოვრებელი სახლები. ქალაქის უმეტესი ქუჩები წყლითაა სავსე.
ლანჩხუთის მუნიციპალიტეტის გამგებლის ზაზა ურუშაძის ინფორმაციით განსაკუთრებით მძიმე მდგომარეობაა სოფელ ნიგოეთში, სადაც რამდენიმე სახლია დატბორილი:
_ნოგოეთში სანიაღვრე არხები ამოივსო და სახლებში წყალი შევარდა. ანალოგიური მდგომარეობა გვაქვს სოფელ შუხუთში, ნიგვზიანში, გვიმბრალაურში. გვიმბრალაურში ძლიერმა ქარმა ხეებიც მოგლიჯა და ამან დამატებითი პრობლემები შექმნა. ნინოშვილში, გოგუაძეების საცხოვრებელ სახლს სახურავი აქვს გადახდილი და მეწყერია ჩამოწოლილი.
ღრმაღელეში ქარისგან მოგლეჯილმა ხეებმა გზა და სანიაღვრე არხები ჩაკეტა და წყალი გზაზე მოედინება.
რთული მდგომარეობაა სოფელ აკეთში. საბავშვო ბაღის შენობას ძლიერმა ქარმა სახურავი გადახადა, მნიშვნელოვნად დაზიანდა გზები. აკეთში წინა სტიქიის დროს დაზიანებული მონაკვეთების აღდგენა ამ დღეებში უნდა დასრულებულიყო, თუმცა, ადიდებულმა დმინარემ ჩატარებული სამუშაოები მნიშვნელოვნად დააზიანა, _ გვითხრა ურუშაძემ, რომლის ინფორმაციით გაწმენდითი სამუშაოები ამ წუთებში აქტიურად მიმდინარეობს.
სტიქიამ სერიოზული ზარალი მიაყენა ქალაქ ლანჩხუთს. დაიტბორა რკინიგზის მიმდებარე ტერიტორიაზე არსებული საცხოვრებელი სახლები. დიდი მოცულობის ნიაღვარმა დააზარალა აღმაშენებლის, დოლიძის, კვირკველიას ქუჩაზე მცხოვრები მოსახლეობა.
ზაზა ურუშაძის თქმით, ამ ეტაპზე მუნიციპალიტეტი სტიქიას საკუთარი ძალებით უმკლავდება:
_ ამ ეტაპზე ჩვენი ძალებით ვმუშაობთ. თუკი წვიმა შეჩერდება შევძლებთ დახმარების გარეშე გამკლავებს, მაგრამ თუ იწვიმა, მაშველი ძალა ნამდვილად დაგჭირდება. საკმაოდ რთული მდგომარეობა გვაქვს, _ გვითხრა ურუშაძემ.
