საქართველოს პრემიერ-მინისტრმა ირაკლი ღარიბაშვილმა თანამდებობა დატოვა. "გურია ნიუსის" მიერ დილით გავრცელებული ინფორმაცია ღარიბაშვილმა საგანგებო ბრიფინგზე ამ წუთებში ოფიციალურად დაადასტურა.
_ ჩემო ძვირფასო თანამემამულენო. ყველა ადამიანს აქვს თავისუფალი არჩევანის საშუალება. დღემდე თითეული ჩემი ნაბიჯი გამომდინარეობდა იმ პასუხისმგებლობიდან, რასაც არჩევანი მაკისრებდა. მე მეამაყება, რომ წილად მხვდა პატივი ამეღო უდიდესი პასუხისმგებლობა ქვეყნისა და ერის წინაშე, _ აღნიშნა ღარიბაშვილმა.
მისივე თქმით მისთვისთვის ხელისუფლებაში ყოფნა თვითმიზანი არასოდეს ყოფილა:
_ ეს არის საშუალება, რომ ვემსახურო ჩვენს ქვეყნას და ხალხს. ეს არის ჩვენი პოლიტიკური მრწამსი. თამადებობები დროებითია, _ განაცახადა ღარიბაშილმა.
შეგახსენებთ, რომ დილით, „გურია ნიუსს“ წყარომ მიაწოდა ინფორმაცია, რომლის თანახმადაც, პრემიერის გადადგომა, წუხელ ბიძინა ივანიშვილთან შეთანხმდა.
ღარიბაშვილი პრემიერ-მინისტრის პოსტს იკავებდა 2013 წლის 20 ნოემბრიდან დღემდე. არის პოლიტიკური პარტია „ქართული ოცნება _ დემოკრატიული საქართველოს“ თავმჯდომარე.
იგი საქართველოს მე-11 პრემიერი იყო.
ირაკლი ღარიბაშვილი დაიბადა 1982 წლის 28 ივნისს. 1999 წელს დაამთავრა დედოფლისწყაროს N1 საშუალო სკოლა. 1999-2004 წლებში სწავლობდა ივანე ჯავახიშვილის სახელობის თბილისის სახელმწიფო უნივერსიტეტში საერთაშორისო სამართლისა და საერთაშორისო ურთიერთობების ფაკულტეტზე. სწავლის პარალელურად (2001–2002 წლებში), სტაჟირება გაიარა საქართველოს პარლამენტის საგარეო ურთიერთობათა კომიტეტში.
2002-2004 წლებში ირაკლი ღარიბაშვილი სწავლობდა სორბონის (პარიზი, საფრანგეთი) უნივერსიტეტში – Paris I – პოლიტიკური მეცნიერებების ფაკულტეტზე, საერთაშორისო ურთიერთობების სპეციალობით.საქართველოში დაბრუნების შემდეგ, 2005 წელს, ირაკლი ღარიბაშვილმა ივანე ჯავახიშვილის სახელობის თბილისის სახელმწიფო უნივერსიტეტში საერთაშორისო ურთიერთობების მაგისტრის ხარისხი მიიღო.
2004–2005 წლებში მუშაობდა „ქართუ ჯგუფის“ კომპანია ბურჯში. 2005-2008 წლებში იყო სააქციო საზოგადოება „ქართუ ჯგუფის“ პრეზიდენტის თანაშემწე; 2006 წლიდან 2012 წლის 14 თებერვლამდე იყო საერთაშორისო საქველმოქმედო ფონდ „ქართუს“ გამგეობის თავმჯდომარე; 2006 წელს ირაკლი ღარიბაშვილი იყო საქართველოში სან-მარინოს რესპუბლიკის საპატიო კონსულის პირადი წარმომადგენელი; 2007-2012 წლებში იყო სააქციო საზოგადოება „ბანკი ქართუს“ სამეთვალყურეო საბჭოს წევრი.
2012 წლის 15 თებერვლიდან, იგი იყო პოლიტიკური პარტია „ქართული ოცნება – დემოკრატიული საქართველოს” დამფუძნებელი წევრი და პარტიის სარევიზიო კომისიის ხელმძღვანელი.
2012 წლის 1 ოქტომბერს, საპარლამენტო არჩევნებში გამარჯვების შემდეგ, ირაკლი ღარიბაშვილი გახდა პარლამენტის წევრი, პარტია „ქართული ოცნება — დემოკრატიული საქართველოს“ პროპორციული სიით.
2012 წლის 25 ოქტომბერს ირაკლი ღარიბაშვილი საქართველოს შინაგან საქმეთა მინისტრად დაინიშნა.
31 წლის შინაგან საქმეთა მინისტრი, ირაკლი ღარიბაშვილი, საქართველოს მომავალ პრემიერ–მინისტრად ბიძინა ივანიშვილმა 2013 წლის 2 ნოემბერს დასახელდა, პარლამენტმა კი 20 ნოემბერს დაამტკიცა.
წყაროს მტკიცებით, ღარიბაშვილს დროებით გიორგი კვირიკაშვილი შეცვლის, რომელიც "ქართულ ოცნებას" პრემიერ-მინისტრად სურს და როგორ ამბობენ, სწორედ მის კანდიდატურას წარუდგენენ პარლამენტს.
თუმცა, აქ ერთი დეტალია საინტერესო _ გიორგი კვირიკაშვილს დედა გარდაეცვალა და დაკრძალვა ხვალაა. ამის გამო, როგორც წყარო ამბობს, ღარიბაშვილის გადადგომა პარასკევს უნდა გახმაურებულიყო, თუმცა მოვლენები მას შემდეგ დაჩქარდა, რაც გავრცელდა ინფორმაცია, რომ ღარიბაშვილი მოსამართლე ლევან მურუსიძეს ლობირებს.
