საქართველოში უახლოეს დღეებში ჰაერის ტემპერატურის მატებაა მოსალოდნელი. გარემოს ეროვნული სააგენტოს მოკლევადიანი ამინდის პროგნოზის ბიურის ხელმძღვანელის, დოდო გვაზავას თქმით, დღეს ქვეყნის ზოგიერთ რაიონში შესაძლოა მცირე ხანმოკლე წვიმა აღინიშნოს ელჭექით, თუმცა ხვალიდან ჰაერი საგრძნობლად დათბება. ამის შესახებ დოდო გვაზავამ “გურია ნიუსს” განუცხადა.
“დასავლეთ საქართველოს სანაპირო რაიონებში ტემპერატურა +30… +31 გრადუსი იქნება, შიდა რაიონებში — +31… +33 გრადუსი, ხოლო მთასა და მაღალმთიანეთში — +26, +31 გრადუსამდე.
აღმოსავლეთ საქართველოში ყველაზე მაღალი ტემპერატურა შიდა ქართლში დაფიქსირდება (+32, +34°C). კახეთში მოსალოდნელია +31, +33°C, სამცხე-ჯავახეთში — +31°C, ხოლო მცხეთა-მთიანეთში — +26°C”,_ ამბობს გვაზავა ჩვენთან საუბრისას.
დოდო გვაზავას თქმით, ხვალ, 7 აგვისტოს, ქვეყნის უმეტეს ნაწილში უნალექო ამინდია მოსალოდნელი.
“დასავლეთ საქართველოში, კოლხეთის დაბლობზე და მის მთაგორიან ტერიტორიაზე ჰაერის ტემპერატურამ შესაძლოა +37 გრადუსამდე მოიმატოს. სანაპირო ზოლში +31… +33 გრადუსია მოსალოდნელი. ტემპერატურა მოიმატებს მთიან და მაღალმთიან რაიონებშიც.
რაც შეეხება აღმოსავლეთ საქართველოს, მცხეთა-მთიანეთსა და სამცხე-ჯავახეთში შესაძლოა მცირედით მოიღრუბლოს. მაქსიმალური ტემპერატურა შიდა ქართლში +35°C იქნება, ქვემო ქართლში — +35… +36°C, კახეთში — +32… +34°C, ხოლო სამცხე-ჯავახეთში — +29… +34°C.
მაღალი ტემპერატურა 8 აგვისტოსაც შენარჩუნდება”,_ ამბობს გვაზავა.
დოდო გვაზავას თქმით, 9 აგვისტოდან დასავლეთ საქართველოში ტემპერატურა რამდენიმე გრადუსით დაიკლებს და იწვიმებს. აღმოსავლეთ საქართველოში კი დღის მეორე ნახევარში მოსალოდნელია მცირე წვიმა ელჭექით, თუმცა მაღალი ტემპერატურა ჯერ კიდევ შენარჩუნდება.
10 აგვისტოდან კი აღმოსავლეთ საქართველოშიც ტემპერატურა 1-2 გრადუსით დაიკლებს. მოსალოდნელია ზომიერზე მეტი ხანმოკლე წვიმა ელჭექით და იმატებს სეტყვის ალბათობაც.
ჩვენს კითხვაზე, თუ როგორი ამინდი იქნება ბახმაროში?
სინოპტიკოსის ცნობით, კურორტ ბახმაროში 7-8 აგვისტოს შუადღის საათებში ჰაერის ტემპერატურა +25… +27 გრადუსამდე მოიმატებს, ხოლო ღამით +7… +10 გრადუსი დაფიქსირდება. 9 აგვისტოდან კი ბახმაროშიც ტემპერატურის კლებაა მოსალოდნელი.
