ოზურგეთში, გაგარინის ქუჩის #8 კორპუსის მცხოვრებლებმა "გურია ნიუსს" მიმართეს და დახმარება ითხოვეს, რომ ხელისუფლებამ ყურად იღოს მათი გასაჭირი: "გაგვიკეთონ გზა, წყალი. მოდით, გადაიღეთ ის ქუჩა, სადაც ბატონი ალეკო მამეშვილი ცხოვრობს და მერე დაათვალიერეთ და გადაიღეთ ჩვენი ქუჩა", _ აცხადებდნენ ისინი.
_ გადაიღეთ ყველაფერი! რომ შემოუხვიეთ, ის ქუჩაც გადაიღეთ, გთხოვთ! სადარბაზო რას ჰგავს, უწყლობით ვიხრჩობით, უპატრონოდ ვართ, ნახეთ, როგორ და საიდან ვეზიდებით წყალს. სამართალი არ უნდა არსებობდეს? წყალი არ გვაქვს 21-ე საუკუნეში! პატრონი არ ჰყავს გაგარინის ქუჩას. როცა ვჭირდებოდით, მაშინ ხომ მოდიოდნენ დღეში რამდენჯერმე? ალბათ, აწი აწრიალდებიან, საარჩევნოდ. ისე ვართ გამწარებული, ცენტრალური ქუჩის გადაკეტვაც გვინდოდა. როგორ არ უნდა შეგეცოდოს ადამიანები, კილომეტრიდან რომ ეზიდებიან წყალს? _ ამბობდნენ გაგარინის ქუჩის მცხოვრებლები.
მათი თქმით, გაზი შემოიყვანეს ქუჩის მეორე მხარეს და მათი ქუჩა დატოვეს: _ გაზის "ბაიბური" არ ისმის. ჭერი გაგვიკეთეს ბინაში და ნახეთ, როგორ გადახურეს! საწვიმარი მილიც გასკდა, წყალი ჩადის ოთახებში. მეორე სართულიც ლპება. ასეთ დღეში ვართ, დღეს უცებ შევიკრიბეთ, გავმწარდით და შეგაწუხეთ. თუ არ მოგვაქცევენ ყურადღებას, აუცილებლად გადავკეტავთ ცენტრალურ ქუჩას და მთელ საქართველოს დავანახებთ, რომ ოზურგეთში ხალხი უკანასკნელ პირობებში ცხოვრობს, თანაც ქალაქში.
მოსახლეობა განსაკუთრებით ბრაზობს წყლის გადასახადის გამო: _ ყველა ოჯახს სთხოვენ გადასახადს, წყალი კი არ მაქვს, რატომ გადავიხადო ფული?
_ თუ მიმართეთ ვინმეს დახმარებისთვის?
_ საკრებულოს თავმჯდომარეს, ალეკო მამეშვილს მივმართეთ რამდენიმე დღის წინ. დაგვპირდა, მოვა წყალიო და არაფერი, გაიარა და წავიდა. ასე როგორ უნდა აგვიგდონ?! თან ჩვენი მეზობელია, რა ვიცი, ყოველ შემთხვევაში, ადრე ასე იყო, თვითონ ამბობდა, ჩემი მეზობლები ხართო…
_ ადრე როდის?
_ წინა არჩევნებისას. რომ მოვიდოდა შეხვედრებზე, თქვენ ჩემი მეზობლები ხართო, გვეუბნებოდა. გვპირდებოდა, დაგეხმარებით, ყველანაირად მხარში დაგიდგებითო, მაგრამ მოდის მომდევნო არჩევნები და ასე ვართ მაინც.
ლუიზა ხომერიკი: _ სადარბაზო კატასტროფულ მდგომარეობაშია, ეზო მოუწესრიგებელი, წყალი არ გვაქვს, შუქი ხშირად გვეთიშება, გზა საშინელ მდგომარეობაშია, ზაფხულში _ მტვერი და ზამთარში _ ორმოები, ანტისანიტარიაა. სახლში ჭერი რომ ჩამომივარდა, მივედი მამეშვილთან და დახმარება ვთხოვე. რა შემომთავაზა, იცით? _ 50 ლარი. 50 ლარად, ჭერს კი არა, საღორეს ვერ შელესავს კაცი. ალეკო მამეშვილი გამდიდრდა, გვერდზე აღარ იხედება, ყოველდღე რესტორანიდან გამოსულს ხედავენ, ქეიფობს, რა ენაღვლება?! დღეს მაგათია ცხოვრება, გაჭირვებული ხალხი კი ლუკმა-პურს ვერ შოულობს.
ამ საკითხთან დაკავშირებით ოზურგეთის მუნიციპალიტეტის საკრებულოს თავმჯდომარემ, ალეკო მამეშვილმა "გურია ნისუთან" ასეთი კომენტარი გააკეთა: _ გაგარინის ქუჩის მცხოვრებლების პრობლემები ჩემთვის უცხო არ არის. იგეგმება მათ ქუჩაზე, როგორც წყლის სისტემის რეაბილიტაცია, ასევე გზის გაკეთება.
