რას უმიზნებს საავადმყოფოს დირექტორად “დაწინაურებული” კახა ასკურავა

ნი გაზეთი ჯერ კიდევ თვეების წინ წერდა გურიაში მოსალოდნელ სახელისუფლო ცვლილებებზე. კულუარებში ხმები მას შემდეგ გამძაფრდა, რაც რეგიონში “ბახმაროს სკანდალმა” იფეთქა, რომელმაც, საბოლოოდ, მხოლოდ პოლიციის მაღალჩინოსნების თანამდებობები შეიწირა. იყო საუბარი იმის შესახებაც, რომ გურიის მოქმედი გუბერნატორი ამ სკანდალს შეეწირებოდა, ამას დაემატა რეგიონში წლის ბოლოს მნიშვნელოვნად გაუარესებული კრიმინოგენური ვითარება და მანამდე ქრთამის აღებისა თუ სხვადასხვა მაქინაციების გამო ჩინოსნების დაკავება.

მას შემდეგ, რაც სკანდალების ფონზე, ურეკში, ჩიტაიშვილის მიერ გადახდილი ქორწილის დეტალები გავახმაურეთ, გუბერნატორი ჩვენზე განაწყენდა, ხოლო ხელისუფლება _ მასზე. თუ ჩიტაიშვილს განაწყენების საფუძველი არ ჰქონდა, ხელისუფლების მაღალ ეშელონებში, მათი თქმით, სამართლიანად იყვნენ აღშფოთებულები _ ლამის ყოველდღე ჩინოსნებს უჭერენ და რა ექორწილნადიმებოდაო. ჩიტაიშვილის მდგომარეობა განსაკუთრებით ინფრაქსტრუქტურისა და რეგიონული მართვის მინისტრის, რამაზ ნიკოლაიშვილის კომენტარებმა დაამძიმა _ გურიის ყოფილმა გუბერნატორმა რეგიონის დღევანდელი მაღალჩინოსნების შეფასებისას აღნიშნა, რომ ზოგის მუშაობა მოსწონს, ზოგის _ არა და იქვე დაამატა: “მაგალითად, გიორგი გოგუაძე საქართველოში ერთ–ერთი საუკეთესო გამგებელიაო“. დაგვეთანხმებით, ასეთი განმარტება მოქმედ გუბერნატორს მინიმუმ უხერხულ მდგომარეობაში აგდებდა. ჭორის მოყვარულებს კი “გაახსენდათ“, რომ ლანჩხუთის გამგებლით ჩიტაიშვილის ჩანაცვლების შესახებ კულუარებიდან ხმებმა არაერთხელ გამოჟონა.

თუმცა, როგორც გურიის ადმინისტრაციიდან სახელისუფლო წყარომ გვაცნობა, ნიკოლაიშვილის განცხადება სულაც არ გამოვიდა დარტყმა გუბერნატორზე _ ვალერი ჩიტაიშვილს სხვა სახელისუფლო მხარდამჭერებიც აღმოაჩნდა და როგორც გვითხრეს, ამ ეტაპზე მის “გაქანებას” ვერავინ მოახერხებს. ჩიტაიშვილს რომ სერიოზული ლობი ჰყავს მთავრობაში, იქიდანაც ჩანს, რომ გურიაში, ალბათ, ყველაზე სკანდალური წლის შემდეგაც, ის თანამდებობას ინარჩუნებს.

სამაგიეროდ, იგივეს ვერ ახერხებს ვიცე–გუბერნატორი კახა ასკურავა _ მან უკვე დატოვა თანამდებობა და ოზურგეთის ცენტრალურ საავადმყოფოს ჩაუდგა სათავეში. ასკურავა იუსტიციისა და განათლების ექს–მინისტრის ნიკა გვარამიასა და მთავარი პროკურორ ის მურთაზ ზოდელავას კადრად მიიჩნევა. გურიის ვიცე–გუბერნატორად მან 3 წლის განმავლობაში იმუშავა. თავად ამბობს, რომ ეს არ არის არც “მოშორება” და არც “ჩამოლაბორანტება” _ უბრალოდ, ჩემი პროფესიით მუშაობა გადავწყვიტეო. ჩვენ ჯერ კიდევ რამდენიმე თვის წინ ვწერდით, რომ ასკურავა საავადმყოფოს დირექტორი გახდებოდა. მაშინ მან ინფორმაცია არ დაადასტურა. როგორც ჩვენმა წყარომ გვითხრა, წარმოშობით ლანჩხუთელ ჯანდაცვის მინისტრს _ სანდრო ურუშაძეს ლანჩხუთელ ასკურავასთან ნაცნობობა აკავშირებს და მას შემდეგ, რაც ოზურგეთის საავადმყოფოში სტუმრად მისულმა მინისტრმა მენეჯმენტი დაიწუნა, ხოლო შემდეგ ხელფასმიუღებელმა პერსონალმა მასთან წერილი აფრინა, ურუშაძემ ასკურავას საავადმყოფოს დირექტორობა შესთავაზა. თუმცა, ინტრიგა და პასუხგაუცემელი კითხვები აშკარად დარჩა _ როგორ უნდა შესთავაზო ვიცე–გუბერნატორს საავადმყოფოს დირექტორობა ან რატომ სურდა თავად ასკურავას “პროფესიით მუშაობა“? წყაროს თქმით, ეს ასკურავას ჯანდაცვაში კარიერისთვისაა აუცილებელი. თუ ეს სიმართლეა, ასკურავა პოლიტიკიდან ჯანდაცვაში “ძირეულად” გადაინაცვლებს, სადაც “ერთ ადგილს” გავლენიანი მეგობრები უთუოდ გაუხერხებენ. ოზურგეთის საავადმყოფო კი საამისოდ ტრამპლინი იქნება.

ასკურავას ადგილი უკვე დაიკავა ლაშა შაფაქიძემ, რომელიც გუბერნატორის თანასოფლელია და წყარო ამტკიცებს, მეგობრები არიანო. ეს კიდევ ერთხელ მიუთითებს, რომ ჩიტაიშვილმა გავლენები შეინარჩუნა. მოქმედი ხელისუფლების ბევრი მაღალჩინოსნისაგან განსხვავებით, ჩიტაიშვილი ოპოზიციასთანაც კი არასდროს გადასულა ზღვარს, იგი ყოველთვის ინარჩუნებდა სიმშვიდეს, თუმცა, უკვე თავს უფლებას აძლევს, ჟურნალისტის კითხვებს სისულელეები უწოდოს და ეს მაშინ, როცა ჩამოყალიბებულ კითხვაზე “დაბნეულ” პასუხს თავად სცემს.

რას უპირებს რამაზ ნიკოლაიშვილი შექებულ გამგებელ გოგუაძეს? ჩვენი წყაროს ინფორმაციით, მინისტრს იგი მოადგილედ ან მინიმუმ, სამინისტროში გადაჰყავს. ლანჩხუთის ხელისუფლებაში ამის შემდეგ რამდენიმე ცვლილებასაც მოელიან _ საკრებულოს თავმჯდომარე რევაზ ჩიტიძე გამგებელი გახდება, ხოლო მოადგილე ზვიად აფხაზავა საკრებულოს თავმჯდომარედ დაწინაურდება. ასეთი გადანაწილება ჯერ კიდევ ადგილობრივ არჩევნებამდე იგეგმებოდა, მაგრამ ნიკოლაიშვილის კადრ გოგუაძეს ვერაფერი მოუხერხეს. ჩიტიძე მარიკა ვერულაშვილის კადრად მიიჩნევა და მისი პოლიტიკაში დაბრუნება ვერულაშვილს უკავშირდება.

თუ გოგუაძეს ნიკოლაიშვილი თავისთან წაიყვანს, გამგებლის გუნდი ამას დაწინაურებად ჩათვლის, ხოლო მისი ოპონენტები _ დაქვეითებად. მართალია, მინისტრის მოადგილეობა ან თუნდაც სამინისტროში გადასვლა გამგებლისთვის აშკარად დაწინაურებაა, მაგრამ არ უნდა დაგვავიწყდეს, რომ გოგუაძე ქვეყანაში ერთ–ერთ გავლენიან გამგებლად მიიჩნევა და მისი გურიიდან გადაყვანა პირდაპირ ნიშნავს, რომ ლანჩხუთური გავლენები მარიკა ვერულაშვილის გუნდის ხელში გადავა.

ჩვენ კომენტარისთვის რამაზ ნიკოლაიშვილს დავუკავშირდით, მაგრამ მინისტრმა გვითხრა, რომ ესტონეთში იმყოფება და ჩვენს კითხვებს მოგვიანებით უპასუხებდა. მოგვიანებითაც დავურეკეთ, მაგრამ იგი ისევ დაკავებული იყო.

ჩვენ გურიის გუბერნატორს ვალერი ჩიტაიშვილსაც დავუკავშირდით:

_ ბატონო ვალერი, რას უკავშირდება კახა ასკურავას ნაცვლად ლაშა შაფაქიძის დანიშვნა?

_ კახა ასკურავა არის გამოცდილი კადრი, ის იყო გამგებლის მოადგილე, წლების მანძილზე არის ვიცე–გუბერნატორი და ახლა ჩაიბარა ოზურგეთის საავადმყოფო…

_ ანუ გინდათ თქვათ, რომ ეს დაწინაურებაა? ასკურავა კარიერაში წინ მიიწევდა, ახლა კი…

_ ვერ დაგეთანხმებით. მთავარია, საქმე გააკეთო პროფესიონალურად. ვთვლი, რომ საავადმყოფოში გვჭირდება ძლიერი მენეჯერი.

_ ახალი ვიცე–გუბერნატორი მართლა თქვენი მეგობარია?

_ როცა მე შემოქმედის საკრებულოს თავმჯდომარე ვიყავი, ის იყო მდივანი და აქედან ვიცნობ. შემდეგ, როცა მე რაიონში გადმოვედი, ლაშა გახდა საკრებულოს თავმჯდომარე, მერე წლების მანძილზე თბილისში მუშაობდა. თითქმის ერთი წელია, ოზურგეთის გამგეობაში მუშაობს და მიმაჩნია, რომ ის ღირსეულად იმუშავებს ახალ თანამდებობაზე.

_ ამ ადამიანებს ასეთი ცვლილებები თავად შესთავაზეთ?

_ დიახ.

რაც შეეხება ასკურავას ახალ სამსახურს, იგი უკვე წარუდგინეს ოზურგეთის საავადმყოფოს პერსონალს. აწ უკვე ექს–ვიცეგუბერნატორს დასაწყისიდანვე სკანდალები არ ასცდება _ სამედიცინო ცენტრში ოპტიმიზაციის პროცესები უნდა დაიწყოს და შემცირებები ახალ დირექტორს არც თუ კარგ სამსახურს გაუწევს. ასკურავა ამბობს, რომ ყველაფერს გააკეთებს, სამედიცინო ცენტრის ფეხზე დასაყენებლად: _ ეს ჩემთვის არის გამოწვევა. მაქვს პრეტენზია, რომ მენეჯერის პოსტზე მუშაობას წარმატებით გავართმევ თავს. თუ ვერ შევძლებ, სახლში წავალ, მაგრამ დარწმუნებული ვარ, კოლექტივთან ერთად ყველაფერი გამომივა. კიდევ ერთხელ ვაცხადებ გულწრფელად, რომ ამას არ ვთვლი დაქვეითებად, არც არავის მოუთხოვია საავადმყოფოს დირექტორად გადასვლა. ჩემი სურვილი იყო, შემოთავაზებაც მივიღე და დავთანხმდი, _ ამბობს ასკურავა.