აღნიშნული პროექტის დასრულების შემდეგ კი, წყალი უწყვეტ რეჟიმში მიეწოდება როგორც ჩოხატაურს ასევე, სოფელ ჩაისუბანსა და მის მიმდებარე დასახლებებს. სამუშაოებს რეგიონული განვითარებისა და ინფრასტრუქტურის სამინისტრო, მუნიციპალური განვითარების ფონდთან ერთად ახორციელებს.
აღნიშნული პროექტი ითვალისწინებს წყალმომარაგების სისტემის სრულ რეაბილიტაციას: 2000 კუბურ მეტრიანი წყლის რეზერვუარის მშენებლობას, საქლორატოროს მოწყობას, მაგისტრალური მილსადენისა და წყლის მილების გაყვანას, წყალსადენი ჭების მონტაჟს.
საქართველოს რეგიონული განვითარებისა და ინფრასტრუქტურის მინისტრმა რამაზ ნიკოლაიშვილმა, პრეზიდენტის რწმუნებულთან გურიის რეგიონში ვალერიან ჩიტაიშვილთან და მუნიციპალური ფონდის დირექტორთან ლევან ჭიჭინაძესთან ერთად ჩოხატაურში მიმდინარე წყალმომარაგების სისტემის რეაბილიტაციის პროცესი მოინახულა” _ ეს ინფორმაცია მუნიციპალური განვითარების ფონდმა, ფეისბუქის ოფიციალურ გვერდზე 2012 წლის 30 სექტემბერს გამოაქვეყნა.
მოგვიანებით, ტელევიზიით და პრესით, ჩოხატაურის წყალსადენის რეაბილიტირებულ პროექტს პიარი რამდენჯერმე გაუკეთდა, თუმცა, ჩოხატაურს 24 საათიანი წყალმომარაგება დღემდე არ აქვს. უფრო მეტიც, ორი დღეა ჩოხატაურს წყალი საერთოდ არ მიეწოდება. გაერთიანებული წყალმომარაგების ოზურგეთისა და ჩოხატაურის სერვისცენტრის ხელმძღვანელის ვანო ტაბატაძის ინფორმაციით, ამის მიზეზი საფილტრავის გაჭედვა გახდა:
_ საფილტრავი გაიჭედა და ტრაქტორი გავუშვით გასაწმენდად. ამან წყლის ამღვრევა გამოიწვია. მალე იქნება წყალი, იგი უკვე სისტემაშია გაშვებული. ამღვრევის გამო ვერ გავუშვით გუშინ…
_ ბატონო ვანო, ექნებათ თუ არა ჩოხატაურლებს 24 საათიანი წყალმომარაგება?
_ არა. წყალს ჩავრთავთ 9 საათზე და გავთიშავთ 11 საათზე. 11 საათის შემდეგ წყალს სოფელ ხიდისთავს მივაწვდით. ასე მოვილაპარაკეთ (?!).
_ ბატონო ვანო, ჩოხატაურის წყალმომარაგების სარეაბილიტაციო სამუშაოები გასულ წელს დასრულდა და ამაში 3 მილიონი ლარი დაიხარჯა. გვპირდებოდნენ, რომ ჩოხატაურს 24 საათიანი წყალმომარაგება ექნებოდა, თუმცა, 12 საათიც კი არ აქვთ…
_ თქვენ ჩემზე კარგად იცით. მე გუშინ დავინიშნე და ”ვაფშე” წავალ აქედან. სად შემიძლია ამდენი ნერვიულობა. მე დავხარჯე მაგი ფული, მე გავაკეთე? მე ავაშენე? არ იცით ვინ გააკეთა?
_ კი ვიცით, რომ დავით ბაქრაძის სიმამრმა, ლერი მეტრეველმა შეასრულა სამუშაოები, მაგრამ ამ ეტაპზე პასუხს სერვისცენტრის ხელმძღვანელს ვთხოვთ… იქნებ იცით სხვა ვინმე, ვინც პასუხს გაგვცემს შეკითხვებზე.
_ პასუხი გითხარით _ წყალი გავწმინდე და გამოვუშვი მეთქი.
_ ბატონო ვანო, გეუბნებით დაზუსტებულ ინფორმაციას, რომ ამ პაპანაქება სიცხეში წყალი 6 საათითაც კი არ მიეწოდება მოსახლეობას…
_ პირობას გაძლევთ, რომ წყალი 9 საათიდან საღამოს 11 საათამდე უწყვეტად იქნება. თუ არ იქნება, მაშინვე დამირეკეთ, _ გვითხრა ტაბატაძემ.
პ.ს. მასალა დასაბეჭდად მზად იყო, როცა ტაბატაძე დაგვიკავშირდა და გვითხრა, რომ წყალი უკვე მოდიოდა. ტაბატაძე პასუხისმგებლობას იღებს, რომ ჩოხატაურში წყალი დილის 9 საათიდან საღამოს 11 საათამდე იქნება. თუმცა, უცნობია ვინ იღებს პასუხისმგებლობას სტატიის დასაწყისში აღნიშნულ ინფორმაციაზე და როდის ექნება ჩოხატაურს, 3 მილიონიანი, 24 საათიანი წყალმომარაგება.
