მოგვიანებით აღმოჩნდა, რომ ივანიშვილის ჯარიმის სახით გადახდილი ფული, სახელმწიფოს სტიქიით დაზარალებული ოჯახებისთვის არ გადაუხდია, რასაც დაზარალებული ოჯახების მხრიდან საპროტესტო აქციაც კი მოჰყვა.
მაშინდელი უმრავლესობის ლიდერები აცხადებდნენ, რომ თუ ვის და რას მოახმარს ჯარიმის სახით გადახდილ თანხას, სახელმწიფოს გადასაწყვეტია და არა ივანიშვილის. დღეს კი, პრემიერმინისტრის პრესსამსახურმა გაავრცელა განცხადება, სადაც ნათქვამია, რომ აღსრულების ეროვნულმა ბიურომ ბიძინა ივანიშვილს უკან დაუბრუნა გადახდილი 80 მილიონი ლარი. აღსრულების ეროვნულმა ბიურომ, ჯარიმის სახით გადახდილი თანხის უკან დაბრუნების მიზეზად, საქმისწარმოებაში დაშვებული პროცედურული დარღვევა დაასახელა.
თუ რამდენად კანონიერია ჯარიმის სახით გადახდილი თანხის უკან დაბრუნება, მაშინ, როცა სასამართლოს გადაწყვეტილება ძალაში რჩება, “გურია ნიუსმა” კომენტარი კოალიცია “არჩევნის თავისუფლებისთვის” წევრს ირაკლი მელაშვილს და ექსპერტს, ლევან ალაფიშვილს სთხოვა.
ირაკლი მელაშვილი: _ აქ სრულ ლაფსუსთან გვაქვს საქმე; კანონით, არჩევნები რომ დამთავრდება, თუ არ დადასტურდა დანაშაული, დაჯარიმებულ პირს ჯარიმის თანხა შეიძლება უკან დაუბრუნდეს. მაგრამ გაურკვეველია, თუკი გამოძიება გრძელდება, მაშინ რატომ დაბრუნდა ეს თანხა უკან?! არ ვიცი, რითი ხელმძღვანელობდა აღსრულების სამსახური ამ გადაწყვეტილების მიღების დროს. ფაქტი ერთია: ივანიშვილმა ეს თანხა ჩარიცხა იმისთვის, რომ დახმარებოდნენ კახეთის რეგიონს. ძალიან უცნაურია, როცა ადამიანს აჯარიმებენ და თანხა მიიმართება არა ბიუჯეტში, არამედ რაღაც ცალკე ანგარიშზე, სადაც ფული ჩერდება. ეს, ზოგადად, წამგებიანია – ფულმა ჯობია იტრიალოს, მითუმეტეს, თუ ბიუჯეტის სასარგებლოდ არის ამოღებული თანხა; ეს 80 მილიონი კი არაფერში არ იქნა “დასაქმებული” _ არც საბიუჯეტო ხარჯებში, არც სხვა რამე ხარჯებში, რაც სრული აბსურდია.
_ შეიძლება თუ არა აღიძრას სისხლის სამართლის საქმე აღსრულების ბიუროს მიმართ ამ კონკრეტულ ფაქტზე?
_ არა, აღსრულების ბიურო ამ შემთხვევაში არაფერ შუაში არ იქნება. რადგან გადაწყვეტილება ამის თაობაზე მიიღო კონტროლის პალატამ, შემდეგ, კონტროლის პალატის გადაწყვეტილების საფუძველზე – სასამართლომ. აღსრულების ბიურო მხოლოდ სასამართლოს გადაწყვეტილებებს ასრულებს. აქედან გამომდინარე, ეს აღსრულების ბიუროს საკითხი არ არის. ეს არის სასამართლოს და კონტროლის პალატის პასუხისმგებლობის საკითხი. გასარკვევია, როგორ იქნა გადაწყვეტილება მიღებული ამ ფულის უკან დაბრუნების შესახებ.
ლევან ალაფიშვილი: _ ეს წმინდა კანონდარღვევა თუ არა, კანონით მანიპულირებაა. სასამართლო გადაწყვეტილება და აღსრულების პროცესი ძალიან დიდი ხნით ადრე, ზაფხულის პერიოდში დაიწყო და დასრულდა. შესაბამისად, კანონმდებლობით, ამ ტიპის ჯარიმები ექვემდებარება ბიუჯეტში გადახდას. მართალია, აღსრულების ბიურო არის საჯარო სამართლის იურიდიული პირი და ამოღებული თანხის დროებითი რეგულირება ხდება იქ ანგარიშზე, მაგრამ იმავე კანონმდებლობით, ყოველთვიურად გარკვეული თანხები უნდა მიემართებოდეს ბიუჯეტში; ეს არის აღსრულების ბიუროს ვალდებულება. თუ ამ ყველაფერს შევაჯერებთ, გამოდის, რომ აღსრულების პერიოდში, აღმასრულებელმა, რომელსაც დიდი აღსასრულებელი არც არაფერი ჰქონდა, თუკი ნებაყოფილობით გადაიხადა ადამიანმა ჯარიმა, თანხა უნდა მიემართა ბიუჯეტში, მაგრამ არ მიმართა ანუ დაარღვია კანონი.
რა სიტუაცია გვაქვს დღეს?! ერთის მხრივ, სახელმწიფოს, კანონიერ ძალაში შესული გადაწყვეტილება არ გაუუქმებია ჯერჯერობით. მეორეს მხრივ, თანხა უკან დააბრუნა!
_ როგორც პრემიერმინისტრის პრესსამსახურის განცხადებაში წერია, მიზეზი სააღსრულებო საქმისწარმოების პროცესში დაშვებული პროცედურული დარღვევები ყოფილა…
_ არავითარ შემთხვევაში. როგორი პროცედურული დარღვევაც არ უნდა იყოს, ეს თანხის უკან დაბრუნების საფუძველი არ არის. ეს მანიპულირების კარგი მაგალითია; მიეთითებინათ, თუ რაში გამოიხატა ეს პროცედურული დარღვევა… ნებისმიერ შემთხვევაში, პროცედურული დარღვევა თანხის უკან დაბრუნების საფუძველი არ არის _ პროცედურული დარღვევა სასამართლო გადაწყვეტილებაზე მაღლა ვერ დადგება.
დღეს, რეალურად, სააღსრულებო ბიურო, რომლის წარმოებაში კვლავ რჩება ეს საქმე, ვალდებულია, ბიძინა ივანიშვილს, “ქართუ ჯგუფს” თუ “ქართულ ოცნებას” გაუგზავნოს შეტყობინება და ხელახლა დაიწყოს აღსრულების პროცედურები, იმიტომ, რომ კვლავ ვიმეორებ: ამ განცხადებაში ამბობენ, საააღსრულებო საქმე შეწყვეტილი არ არის.