ავარიული სკოლები და შეწყვეტილი სწავლა

თუმცა ვერ გვეუბნებიან როდის მოხდება ამ სკოლების სრული რეაბილიტაცია: _ ეტაპობრივად, _ ასეთია ჩინოვნიკთა პასუხები პრობლემატურ შეკითხვებზე.
პრეზიდენტის თქმით, სწორედ ეს სამინისტრო მიიჩნევა ქვეყანაში მთავარ რეფორმატორად, თანაც, წარმატებულ რეფორმატორად. არ ვიცით, რას ეძახის დღევანდელი ხელისუფლება წარმატებულ რეფორმებს, მაგრამ ის კი ვიცით, რომ ჩოხატაურში რამდენიმე სკოლა ძალიან ავარიულია. უფრო მეტიც, გასულ კვირას, ქვაბღის საჯარო სკოლის შენობა პედაგოგების და მოსწავლეების სიცოცხლეს საფრთხეს უქმნის, ამიტომ სწავლის პროცესი შეწყვიტეს.
აღნიშნული სკოლის მოსწავლეთა მშობლებმა ოფიციალური განცხადებებით საგანმანათლებლო რესურსცენტრს,  ჩოხატაურის გამგებელს, პარლამენტის და ასევე სოფლის მაჟორიტარ დეპუტატებს მიმართეს.
_ უკვე რამდენიმე დღეა, სკოლაში სასწავლო პროცესი არ მიმდინარეობს. მიზეზი სკოლის ავარიული მდგომარეობაა, რის გამოც მშობლებს შვილების სკოლაში გაშვების გვეშინია. მართალია, სკოლის დირექტორი გვეუბნება, რომ ხელისუფლება საქმის კურსშია, მაგრამ მშობლებისთვის არავის არაფერი აუხსნია. ჩვენი მოთხოვნაა, რომ დაუყონებლივ ამოვიდნენ ხელისუფლების წარმომადგენლები და გვითხრან, თუ შეიძლება მსგავს პირობებში მუშაობის გაგრძელება, _ გვითხრეს მშობლებმა.
ისინი პასუხს ქვაბღის მაჟორიტარ დეპუტატს, თემურ კოროშინაძესაც სთხოვენ:
_ თემურ კოროშინაძის წინასაარჩევნო პროგრამის მთავარი ნაწილი ქვაბღის სკოლის აშენებას ეთმობოდა. საარჩევნოდ დაპირებები არ დაუშურებია და სოფელმა სწორედ ამიტომ დაუჭირა მხარი, თუმცა, მას შემდეგ თითქმის ერთი წელია გასული და დანაპირების ასრულებაზე რომ არაფერი ვთქვათ, პასუხსაც კი არავინ გვცემს, _ აღნიშნავენ ქვაბღელები.
თემური კოროშინაძე ადასტურებს, რომ მის წინასაარჩევნო პროგრამაში ქვაბღის სკოლის აშენება პრიორიტეტი იყო:
_ კი, იყო ჩემი საარჩევნო პროგრამის ნაწილი. გვინდა, რომ აშენდეს, _ აღნიშნა კოროშინაძემ.
_ სკოლის აშენებას მხოლოდ იმ იმედით პირდებოდით ამომრჩეველს, რომ _ “გინდოდათ”?
_ სკოლა აუცილებლად აშენდება. არსებობს ამის ობიექტური საფუძველი სამინისტროს მხრიდან. მე მქონდა საუბარი ადგილობრივ ხელმძღვანელობასთან, გამგებელთან, მას, თავის მხრივ, გუბერნატორთან და როგორც კი იქნება თანხების მოძრაობა, გვპირდებიან, რომ პირველი ეს პრობლემა გადაწყდება.
მე რომ შემეძლოს მხოლოდ ჩემი მონდომებით ავაშენო სკოლა, დამერწმუნეთ, ძალებს არ დავზოგავდი, _ დაგვიზუსტა კოროშინაძემ.
გურიის გუბერნატორი, ვალერი ჩიტაიშვილი ამბობს, რომ ქვაბღაში რამდენიმე დღის წინ იმყოფებოდა და სკოლის პრობლემის შესახებაც ინფორმაციას ფლობს. ჩვენს კითხვაზე, იცის თუ არა როდის დაიწყება ახალი სკოლის მშენებლობა, გუბერნატორმა გაზეპირებული ფრაზით _ “ახლა არ მცალია, შეხვედრაზე ვარ, მოგვიანებით დაგირეკავთ!” _ გვიპასუხა და ამ დაპირებამ, სხვა ბევრის მსგავსად, “ჩაილურის წყალი დალია” _ ჩიტაიშვილმა ამ საუბრის შემდეგ ჩვენს სატელეფონო ზარებსაც არ უპასუხა.
ორშაბათს, მშობლების ერთი ნაწილი ჩოხატაურის გამგებელს, გია გიორგაძეს და საგანმანათლებლო რესურსცენტრის ხელმძღვანელს, ხათუნა წილოსანს შეხვდნენ. დაპირება არც წილოსანს დაუშურებია: _ გაზაფხულზე სკოლის მშენებლობა აუცილებლად დაიწყება და ეს გადაწყვეტილება სამინისტრომ უკვე მიიღო, _ თქვა მან.
ქვაბღაში ახალი სკოლის აშენება რომ აუცილებელია, განათლების სამინისტროშიც კარგად იციან, თუმცა ვინ და როდის ააშენებს, გაურკვეველია:
_ საქართველოში ასეულობით სკოლაა ავარიული და ყველა სასწრაფოდ შეკეთებას საჭიროებს. გეთანხმებით, რომ ქვაბღაში ახალი სკოლაა ასაშენებელი, თუმცა, დეტალები ჯერ დაზუსტებული არ არის. მიმდინარეობს მოლაპარაკებები ადგილობრივ ხელისუფლებასთან იმის გასარკვევად, თუ ვისი ფინანსებით მოხდება სკოლის აშენება. ჯერ არ ვიცით, თანხებს ადგილობრივი მუნიციპალიტეტი გაიღებს თუ სამინისტრო. ამ ეტაპზე მე მხოლოდ ის შემიძლია გითხრათ, რომ ქვაბღაში სკოლის აშენება გადაწყვეტილია, თუმცა, როდის დაიწყება მშენებლობა, ამაზე დაზუსტებული პასუხის გაცემა არ შემიძლია, _ აღნიშნა ჩვენთან საუბრისას განათლების სამინისტროს პრესსამსახურის ხელმძღვანელმა, ნათია პაპავამ.
ჩოხატაურის მუნიციპალიტეტის გამგეობაში კი გვითხრეს, რომ განათლების სამინისტროსთან არც ერთ თემაზე ამ ეტაპზე მოლაპარაკებები არ მიმდინარეობს. შესაბამისად, ქვაბღის სკოლის აშენების საკითხზე ერთმანეთთან, არც რომელიმე შეხვედრაზე და არც წერილობით, არ უმსჯელიათ.
აღსანიშნავია ისიც, რომ ქვაბღის სკოლის მსგავსად, ჩოხატაურში მეტად ავარიული სიტუაციაა გუთურის, შუაგანახლების, განახლების, ზოტის და წიფნარის საჯარო სკოლებში. სწავლის პროცესი ამ სკოლებშიც დიდი საფრთხის ქვეშ მიმდინარეობს, თუმცა, როგორც განათლების სამინისტროში განგვიმარტეს, “ყველაფერი ერთდროულად არ იქნება და ეტაპ-ეტაპ, ნაბიჯ-ნაბიჯ, საქართველოს ყველა სოფელში ახალი სკოლა აშენდება”. თუმცა თუკი ნაბიჯები ამ ტემპით გადაიდგმება, სულაც არ არის გამორიცხული, რამდენიმე თვეში, მხოლოდ ჩოხატაურში, 6 საჯარო სკოლა საერთოდ გაუქმდეს. მით უმეტეს, რომ ექსპერტების განმარტებით, ზემოთ აღნიშნულ სკოლებში სწავლის გაგრძელება ადამიანის სიცოცხლისთვის სახიფათოა!