რაც შეეხება გამგებლის ახალ კანდიდატურას, ის “ქართული ოცნების” ერთ-ერთი სახე, კოტე შარაშენიძეა, რომელიც გავრცელებული ინფორმაციით, საკრებულოს დეპუტატებთან კონსულტაციებს გადიოდა. ჩვენს მიერ მოპოვებული ინფორმაციით, მას კონკურენტი არ ჰყავს და აქედან გამომდინარე, მის კანდიდატურას, მისივე კლასელი, ოზურგეთის მუნიციპალიტეტის საკრებულოს თავმჯდომარე, ალეკო მამეშვილი წარადგეს.
როგორ უნდა მოხდეს ახალი გამგებლის წარდგენა და დანიშვნა. ამის შესახებ „გურია ნიუსთან“ „საქართველოს დემოკრატიული განვითარების კავშირის“ იურისტი, ირაკლი პაპავა განმარტავს: _ “საჯარო სამსახურის შესახებ” საქართველოს კანონით დადგენილი ზოგადი წესის თანახმად, მოხელე სამსახურში მიიღება ან თანამდებობაზე დანიშვნით, ან კიდევ არჩევით. რაც შეეხება კონკრეტულად თვითმმართველი ერთეულის აღმასრულებელი რგოლის ხელმძღვანელის _ გამგებლის თანამდებობას, იგი დანიშვნითია: გამგებელს, როგორც ადგილობრივი თვითმმართველობის საჯარო მოხელეს, “საჯარო სამსახურის შესახებ” საქართველოს კანონის შესაბამისად, საკრებულოს თანხმობით, თანამდებობაზე საკრებულოს თავმჯდომარე ნიშნავს (იხ. ორგანული კანონი “ადგილობრივი თვითმმართველობის შესახებ”, მუხ. 39.1).
იქიდან გამომდინარე, რომ გამგებლის თანამდებობა დანიშვნითია, მასთან მიმართებაში “საჯარო სამსახურის შესახებ” კანონის 29-ე მუხლის პირველი პუნქტის სავალდებულო მოთხოვნა მოქმედებს, რომლის თანახმადაც, პირი თანამდებობაზე შეიძლება დაინიშნოს მხოლოდ კონკურსის შედეგად. აღნიშნულის გათვალისწინებით, გამგებლის თანამდებობაზე ვაკანსიის წარმოშობის შემთხვევაში, საკრებულოს თავმჯდომარეს, ახალი გამგებლის კანდიდატურის შესარჩევად და დასანიშნად, კონკურსის გამოცხადება-ჩატარების კანონისმიერი ვალდებულების ტვირთი აწევს მხრებზე, გარდა იმ შემთხვევისა, როცა პირი გამგებლის მოვალეობის დროებით შემსრულებლად ინიშნება; ანუ თუ პირი გამგებლის მოვალეობის დროებით შემსრულებლად ინიშნება, მაშინ კონკურსის გამოცხადება და ჩატარება საჭირო არ არის. ამასთან, 2013 წლის პირველი იანვრიდან გამგებლის ვაკანტურ თანამდებობაზე (თანამდებობა, რომელიც კონკურსის წესით უნდა შეივსოს) დროებით მოვალეობის შემსრულებლის ყოფნის მაქსიმალური ვადა არა უმეტეს 1 წელი შეიძლება იყოს; თუმცა აქ ისიცაა მხედველობაში მისაღები, რომ დროებით მოვალეობის შემსრულებლად უკვე დანიშნული პირის მიმართ ამ ვადის ათვლა ასევე მომავალი წლის პირველი იანვრიდან დაიწყება. შესაბამისად, თუ პირი გამგებლის ვაკანტურ თანამდებობაზე მოვალეობის დროებით შემსრულებლად ინიშნება, მაშინ მის დასანიშნად საკრებულოს თავმჯდომარეს მხოლოდ საკრებულოს თანხმობაც ყოფნის. _ ამბობს ჩვენთან საუბრის დროს ირაკლი პაპავა.
მისივე თქმით, სულ სხვაგვარადაა საქმე, როცა საკრებულოს თავმჯდომარე პირს გამგებლის მოვალეობის დროებით შემსრულებლად კი არა, საკუთრივ გამგებლად ნიშნავს. ასეთ შემთხვევაში, ანუ გამგებლის თანამდებობაზე ვაკანსიის წარმოშობისას, საკრებულოს თავმჯდომარე, როგორც თვითმმართველი ერთეულის ხელმძღვანელი, აცხადებს საჯარო კონკურსს გამგებლის ვაკანტური თანამდებობის დასაკავებლად, საჯარო სამსახურის ბიუროს მიერ ადმინისტრირებული ვებგვერდის საშუალებით და შესაბამის ბეჭდვით ორგანოში. ამასთან, კანდიდატებს განცხადების წარსადგენად არანაკლებ 10-დღიანი ვადა ეძლევათ კონკურსის გამოცხადების დღიდან (კონკურსის გამოცხადების დღედ ითვლება ბოლო გამოცხადების მომენტი, მიუხედავად მისი ფორმისა).
_ როგორც წესი, გამგებლის ვაკანტური თანამდებობის დასაკავებლად დადგენილ მოთხოვნებთან კანდიდატის (კანდიდატების) შესაბამისობას აფასებს ადგილობრივი თვითმმართველობის მოხელეთა საკონკურსო-საატესტაციო კომისია (რომელიც ყველა თვითმმართველ ერთეულში უნდა არსებობდეს). კონკურსის შედეგების გათვალისწინებით, საკონკურსო-საატესტაციო კომისია გამგებლის ვაკანტურ თანამდებობაზე დასანიშნად წამოაყენებს ერთ-ერთ კანდიდატს, ან უარს აცხადებს კანდიდატის წამოყენებაზე. ამასთან, საგულისხმოა, რომ საკონკურსო-საატესტაციო კომისიის მიერ გამგებლის თანამდებობაზე დასანიშნად წამოყენებული კანდიდატი თანამდებობაზე იმ შემთხვევაში დაინიშნება, თუ იგი კომისიის გადაწყვეტილების მიღებიდან 2 კვირის განმავლობაში საკრებულოს თავმჯდომარეს წარუდგენს “საჯარო სამსახურის შესახებ” კანონის 25-ე მუხლის პირველ პუნქტში ჩამოთვლილ დოკუმენტებს და საკონკურსო-საატესტაციო კომისიის გადაწყვეტილებას. გარდა ამისა, ახალი გამგებლის დასანიშნად, საკრებულოს თავმჯდომარეს აუცილებლად ესაჭიროება საკრებულოს თანხმობა.
ასე რომ, გამგებლის ვაკანტურ თანამდებობაზე პირის დანიშვნა არცთუ ისე მარტივი პროცესია; კანონმდებლობით დადგენილი ფორმალური მოთხოვნების შესრულების აუცილებლობიდან გამომდინარე, ამ პროცესის ბოლომდე მიყვანას მინიმუმ დაახლოებით ერთთვიანი ვადა მაინც ესაჭიროება. _ განაცხადა ირაკლი პაპავამ.
