_ მისასალმებელია გამგებელი რომ შევცვალეთ, ამაში ორი აზრი არ არსებობს, პირველი მე გამოვთქვი მის მიმართ მხარდაჭერა, ის არის კოალიცია “ქართული ოცნების” წარმომადგენელი და კიდევ ერთხელ ვუჭერ მას მხარს, მაგრამ რაც შეეხება ახლა მეორე საკითხს, რამდენად სამართლიანად მოხდა მისი არჩევა, ეს არის ბატონო საკრებულოს თავმჯდომარევ, საკითხავი. ნამდვილად იყო პროცედურები დარღვეული. ამაზე მტკივა გული, რომ საკრებულოში დარღვევით მოხდა კოტე შარაშენიძის დანიშვნა, _ განაცხადა საკრებულოს სხდომაზე დიმიტრი კვერღელიძემ.
“რანაირად ვარ არჩეული, ეს თქვენ თუ გაინტერესებთ, შეგიძლიათ ჩაიხედოთ კანონში წაიკითხოთ და გააკეთოთ ანალიზი. მე, ერთი რამე მინდა გითხრათ: არცერთ საკრებულოს წევრთან არანაირი დაპირისპირება არ მაქვს. პირდაპირ გეუბნებით სანამდე ამირჩევდნენ მქონდა მათან ინდივიდუალურად შეხვედრა, მქონდა გასაუბრება და მქონდა ამ ადამიანებთან ურთიერთობა და იცოდნენ, რა წვლილი იყო ჩემი ამ “ქართული ოცნების” გამარჯვებაში ოზურგეთის მუნიციპალიტეტში.” _ აცხადებს შარაშენიძე.
“საქართველოს დემოკრატიული განვითარების კავშირის“ იურისტი, ირაკლი პაპავა “გურია ნიუსთან” საუბრის დროს ამბობს, რომ, როგორც ცნობილია, თვითმმართველი ერთეულის აღმასრულებელი რგოლის ხელმძღვანელის _ გამგებლის თანამდებობა დანიშვნითია: გამგებელს, როგორც ადგილობრივი თვითმმართველობის საჯარო მოხელეს, “საჯარო სამსახურის შესახებ” საქართველოს კანონის შესაბამისად, საკრებულოს თანხმობით, თანამდებობაზე საკრებულოს თავმჯდომარე ნიშნავს (იხ. ორგანული კანონი “ადგილობრივი თვითმმართველობის შესახებ”, მუხ. 39.1).
_ ვინაიდან გამგებლის თანამდებობა დანიშვნითია, მასთან მიმართებაში “საჯარო სამსახურის შესახებ” კანონის 29-ე მუხლის პირველი პუნქტის სავალდებულო მოთხოვნა მოქმედებს, რომლის თანახმადაც, პირი თანამდებობაზე შეიძლება დაინიშნოს მხოლოდ კონკურსის შედეგად. შესაბამისად, გამგებლის თანამდებობაზე ვაკანსიის წარმოშობის შემთხვევაში, საკრებულოს თავმჯდომარეს, ახალი გამგებლის კანდიდატურის შერჩევისა და დანიშვნის მიზნით, კონკურსის გამოცხადება-ჩატარების კანონისმიერი ვალდებულება ეკისრება, გარდა იმ შემთხვევისა, როცა გამგებლის ვაკანტურ თანამდებობაზე მისი მოვალეობის დროებით შემსრულებლის დანიშვნა ხდება. როგორც წესი, გამგებლის მოვალეობის დროებით შემსრულებელი ახალი გამგებლის დანიშვნამდე ასრულებს მის მოვალეობას. ამასთან, 2013 წლის პირველი იანვრიდან მოყოლებული გამგებლის ვაკანტურ თანამდებობაზე (თანამდებობა, რომელიც კონკურსის წესით უნდა შეივსოს) დროებით მოვალეობის შემსრულებლის ყოფნის მაქსიმალური ვადა შეიძლება არა უმეტეს 1 წელი იყოს; საგულისხმოა ისიც, რომ დროებით მოვალეობის შემსრულებლად მანამდე დანიშნული პირის მიმართაც ამ ვადის ათვლა ასევე 2013 წლის პირველი იანვრიდან იწყება. _ აცხადებს ირაკლი პაპავა.
მისივე თქმით, გასული წლის ოქტომბრის საპარლამენტო არჩევნების შემდეგ, მთელი ქვეყნის მასშტაბით დაწყებული თვითმმართველი ერთეულების აღმასრულებელი რგოლის ხელმძღვანელთა ცვლის ზოგადი ტენდენციის ფონზე, აქტუალური გახდა გამგებლის ვაკანტურ თანამდებობაზე მისი მოვალეობის დროებით შემსრულებლის დანიშვნის პროცესის შესაბამისობის საკითხი კანონმდებლობის მოთხოვნებთან. კანონი კი გამგებლის მოვალეობის დროებით შემსრულებლის დანიშვნის შემდეგ წესს ითვალისწინებს: გამგებლის არყოფნისას, მის მიერ უფლებამოსილების განხორციელების შეუძლებლობისას, ან თანამდებობიდან მისი გადადგომისას, ან გათავისუფლებისას გამგებლის მოვალეობას, საკრებულოს თავმჯდომარის დავალებით, ასრულებს გამგებლის მოადგილე (იხ. ორგანული კანონი “ადგილობრივი თვითმმართველობის შესახებ”, მუხ. 39.4). ანუ მას შემდეგ, რაც გამგებლის თანამდებობა ვაკანტური გახდება (ვთქვათ, თანამდებობიდან გამგებლის გადადგომის ან გადაყენების გამო), ახალი გამგებლის დანიშვნამდე აუცილებელი ხდება მისი მოვალეობის დროებით შემსრულებლის დანიშვნა. ასეთ შემთხვევაში გამგებლის მოვალეობა, საკრებულოს თავმჯდომარის დავალებით, გამგებლის მოადგილემ უნდა შეასრულოს. საგანგებოდ უნდა გაესვას ხაზი იმ გარემოებას, რომ გამგებლის მოვალეობის დროებით შესრულება საკრებულოს თავმჯდომარემ მხოლოდ გამგებლის მოადგილეს შეიძლება დაავალოს და არა გარეშე პირს. ამასთან, ზემოაღნიშნული საფუძვლების არსებობისას, გამგებლის მოადგილეს უფლება არა აქვს უარი განაცხადოს გამგებლის მოვალეობის დროებით შესრულებაზე, რამეთუ ეს იპსო ფაცტო (ე.ი. თანამდებობის დაკავების ძალით) მისი თანამდებობის თანმდევი უშუალო მოვალეობაა; შესაბამისად, ამ მოვალეობაზე უარის თქმა, როგორც წესი, გამგებლის მოადგილის თანამდებობიდან გათავისუფლების უპირობო საფუძველს წარმოადგენს.
_ ასეა თუ ისე, საკრებულოს თავმჯდომარის მიერ გამგებლის ვაკანტურ თანამდებობაზე მოვალეობის დროებით შემსრულებლად გარეშე პირის დანიშვნა, ფორმალური თვალსაზრისით, მხოლოდ ერთ შემთხვევაშია დასაშვები: ასეთი პირი ჯერ გამგებლის მოადგილედ უნდა იქნას დანიშნული და საკრებულოს თავმჯდომარეს მხოლოდ ამის შემდეგ ეძლევა მისთვის გამგებლის მოვალეობის შესრულების დავალების, ანუ, ფაქტიურად, მისი გამგებლის მოვალეობის დროებით შემსრულებლად დანიშვნის შესაძლებლობა. რეალურად, საკრებულოს თავმჯდომარის მიერ მხოლოდ ამ სახით შეიძლება განხორციელდეს გამგებლის ვაკანტურ თანამდებობაზე (მის შევსებამდე) გამგებლის მოვალეობის დროებით შემსრულებლად გარეშე პირის კანონიერ საფუძველზე დანიშვნა; კანონიერად დანიშვნის სხვა გზა, ელემენტარულად, არ არსებობს. _ განაცხადა ჩვენთან საუბრის დროს “საქართველოს დემოკრატიული განვითარების კავშირის” იურისტმა.
