რა გახდა ერთ დროს მერაბიშვილის ფავორიტი პოლიციელის გათავისუფლების მიზეზი, რომელიც ცოტა ხნის წინ დააქვეითეს და დეტექტივის თანაშემწედ გადაიყვანეს, ახლა კი საბოლოოდ დაითხოვეს. ჩვენი წყარო ამბობს, რომ ურიდია გურიის პოლიციის ახალი უფროსებისთვის არასასურველი კადრი იყო და ამის გამოც მოიშორეს. ოზურგეთის პოლიციის უფროსის თანამდებობიდან ურიდია მას შემდეგ გაათავისუფლეს, რაც მისი ოჯახის მიერ, ჩოხატაურის სოფელ ქვენობანში, მიწის უკანონოდ მითვისების ფაქტზე დაიწყო საუბარი.
ურიდიას გათავისუფლებას ერთი რიგითი პოლიცმაისტერის “პენსიაზე” გასვლად ჩავთვლიდით, რომ არა ერთი მნიშვნელოვანი გარემოება _ წლების წინ, როცა “ვარდების ხელისუფლებამ” ე.წ. “კანონიერ ქურდებზე” შეტევა დაიწყო, ურიდია ურეკის პოლიციის უფროსის მოვალეობას ასრულებდა. სწორედ მის სახელთან იყო დაკავშირებული კურორტზე შაქრო კალაშოვის სახლის “აღმოჩენა”. მაშინ თემა გაპიარდა და “მეტი სიცხადისთვის” “შავ სამყაროსთან მებრძოლ ვარდოსან მთავრობას” რიგითი პოლიციელის სახეც სჭირდებოდა. თორემ ურეკში წამოჭიმული სრა-სასახლე კალაშოვის რომ იყო, ურიდიამ კი არა, ლამის მთელმა ურეკმა და შს სამინისტრომაც იცოდა. უბრალოდ, გია ურიდია საჭირო დროს საჭირო კადრი აღმოჩნდა საჭირო ადგილზე, რამაც ის ვანო მერაბიშვილის ფავორიტ პოლიციელად აქცია. ჩვენი წყარო ამბობს, რომ მაშინ გია ურიდიას ხელმძღვანელობით დაბა ურეკში კრიმინალური დაჯგუფება და კალაშოვის თანამზრახველები დააკავეს, რომლებიც ურიდიას სიჩუმის სანაცვლოდ ნახევარ მილიონ ლარს სთავაზობდნენ, მაგრამ მან ამაზე უარი თქვა და ინფორმაცია სამინისტროს მიაწოდა.
ამან ხელი შეუწყო ურიდიას სამსახურებრივ დაწინაურებას _ იგი ოზურგეთის მუნიციპალიტეტის მთავარი პოლიციელი ხდება და საკმაოდ გავლენიანი ფიგურაც. მას ზემოთ ნახსენები კალაშოვის სახლის აღმოჩენისთვის პრეზიდენტმა სააკაშვილმა ღირსების ორდენი გადასცა. ვერ ვიტყვით, რამდენად იყო ურიდია მერაბიშვილის დასაყრდენი, მაგრამ მისი რიგითი ფავორიტი მაინც რომ იყო, გურული პოლიციელის დაწინაურება-ხელშეუხებლობიდანაც კარგად გამოჩნდა.
სწორედ გია ურიდია გახლდათ ერთადერთი გურული მაღალჩინოსანი პოლიციელი, რომელიც გასულ წელს აგორებულ და გახმაურებულ “ბახმაროს სკანდალს” გადაურჩა. შეგახსენებთ, რომ ბახმაროში მიწების უკანონოდ მითვისებისთვის ლეგალიზაციის კომისიის თავმჯდომარე, ჩოხატაურელი “ნაციონალების” საკრებულოელი თავკაცი შოთა სირაძე დღემდე მიმალვაშია. ეს კომისია წლების წინ დაუკანონებელი და ფლობის ქვეშ მყოფი ნაკვეთების დაკანონებას ახდენდა, იგივე პრინციპით, რაც გიგი უგულავამ დედაქალაქში გააკეთა _ რაც შენია, შენია! როგორც ჩანს, გურულმა ჩინოსნებმა ეს ყველანაირი მნიშვნელობით გაიგეს და გურიის მთა-ბარის მეპატრონეებად გამოაცხადეს თავი, ვადები ფეხებზე დაიკიდეს და ახალი მიწები ძველი თარიღებით გაიფორმეს. ჰოდა, ამ ამბებს მთელი გურული პოლიციის ელიტა გადაჰყვა, გარდა ურიდიასი.
მაშინ ითქვა, რომ ურიდიას მიწა არ ჰქონდა ბახმაროში, თანაც ის სკანდალის დროს შვებულებაში იყო და განცხადებას გადადგომაზე “ვერ დაწერდა”. ჩვენი წყაროს თქმით, საშვებულებო დრო ურიდიამ სამსახურის შენარჩუნებისთვის ბრძოლას მოახმარა, მაგრამ როგორც დღეს აღმოჩნდა, უშედეგოდ.
რატომ გაწირა მინისტრმა “ფავორიტი პოლიციელი”? ერთი რამის დაშვება აქაც შეიძლება _ მერაბიშვილის უწყებამ ურიდია გამოიყენა და შემდეგ ისიც “გაფუჭებული” პოლიცჩინოსნების გზას გაუყენა.
რატომ უნდა დასჭირებოდა მერაბიშვილს გურული პოლიციის ელიტის გაწირვა? თუ მათი შეცვლა სურდა, ამას “საკურორტო სკანდალის” გარეშეც მოახერხებდა. თუმცა, როგორც ჩვენი წყარო ამბობს, ამის მიზეზი პოლიტიკა და გურული გადანაწილებაა. ამ დრომდე რეგიონს რამაზ ნიკოლაიშვილი აკონტროლებს; გავლენები აქვს და მისი გაფართოება სურს მერაბიშვილსაც. გურიის ამჟამინდელი გუბერნატორი ვალერი ჩიტაიშვილი პოსტზე სწორედ ნიკოლაიშვილის დატოვებულია. მართალია, დღეს მას სხვა ლობისტებიც აღმოაჩნდა, მაგრამ ფაქტია, რომ ჩიტაიშვილი გუბერნატორად “წარმატებული არჩევნების” შემდეგ მოვიდა და ამაში ნიკოლაიშვილს დიდი წვლილი მიუძღვის.
ამიტომ, თუ აქამდე მერაბიშვილი გურიის პირველკაცს “აღიარებდა” და მას პოლიციის შენობების გახსნის პატივს დიდსულოვნად უთმობდა, ახლა შს მინისტრი ჩიტაიშვილს გახსნაზეც კი არ პატიჟებს. ბოლოს გურიაში ეს ორჯერ მოხდა _ სუფსასა და წყალწმინდაში. აქედან აშკარაა, რომ მერაბიშვილი ჩიტაიშვილს “აღარ ცნობს”.
აქედან გამომდინარე, ლოგიკურია, რომ ვანო მერაბიშვილმა ჩიტაიშვილის საახლობლო პოლიციის უწყებიდან დაითხოვა (ყოფილი პოლიცმაისტერი შოთა ჭანუყვაძე ჩიტაიშვილის თანასოფლელია), თუმცა, ურიდია რატომ მოხვდა “წმენდაში”, ცოტა გაუგებარია. შესაძლოა, შს მინისტრმა წამოსაძახებელი აღარ დაიტოვა _ ჩვენ თუ ბახმაროს მიწების გამო გაგვწირე, არც თქვენი ფავორიტი ურიდიაა “ღარიბი” და მამა-შვილს ქვენობანში მიწები აქვთო. ცნობისთვის, მამა ურიდია ჩოხატაურის მუნიციპალიტეტის სოფელ ქვენობნის მაჟორიტარი დეპუტატია, წლების განმავლობაში კი რაიონის მოსამართლე გახლდათ.
დღეს გურიაში ბევრს საუბრობენ, რომ მერაბიშვილს და ნიკოლაიშვილის გავლენათა გადანაწილება სწორედ ამ რეგიონში ხდება. გავრცელებული ინფორმაციით, შს მინისტრს ბახმაროს სკანდალის გახმაურება ნიკოლაიშვილის გუბერნატორობის დროს სურდა, მაგრამ გარკვეულ მიზეზთა გამო “გადადო”. თუ სახელისუფლო წყაროებს დავუჯერებთ, რამაზ ნიკოლაიშვილი და მისი გუნდი (აქ მოიაზრებენ უპირველესად იუსტიციის მინისტრ ზურაბ ადეიშვილს) გურიას დატოვებს და სამეგრელოში გადაბარგდება, ოღონდ ინფრასტრუქტურის კუთხით და ეს არანაირად არ ნიშნავს, გურიაში უკვე არსებული გავლენების შევიწროვებას. სწორედ ამ “მონახაზში” განიხილება ინფორმაცია, რომ ნიკოლაიშვილს ლანჩხუთის გამგებელი გია გოგუაძე მიჰყავს.
ჩვენთვის ცნობილი გახდა სამეგრელოში ზურაბ ადეიშვილის ვიზიტის დეტალების შესახებ: როცა სამეგრელოს გუბერნატორს რაღაც პროექტებზე ჩამოუგდია სიტყვა, გავლენიან მინისტრს გაუჩერებია და უთქვამს _ მაგ საკითხს ჩვენი სამინისტრო უწევს ზედამხედველობას და შესრულებას კი რამაზ ნიკოლაიშვილის უწყებაო. მკითხველს ვურჩევთ, თვალი მიადევნოს, რამდენი მილიონი გამოიყოფა გურიაში “ინფრასტრუქტურის განვითარებისთვის”.
თუ გურიიდან გასვლა არა, რატომ უნდა წაიყვანოს გავლენიანმა ნიკოლაიშვილმა თავისი ყველაზე დიდი დასაყრდენი გოგუაძე? მით უფრო, ნიკოლაიშვილ-გოგუაძესთან “ვარდოსანი ხელისუფლება” საარჩევნო ვალშია _ ჩავარდნილი საპრეზიდენტო არჩევნების შემდეგ, სწორედ მათ “მოახერხეს” საპარლამენტო არჩევნების პირწმინდად მოგება და პირველად იმის გაკეთება, რომ ლანჩხუთში მმართველი გუნდის კანდიდატს გაემარჯვა _ შევარდნაძის ხელისუფლების ჩათვლით, ეს მანამდე არ მომხდარა.
