თანაც, თითოეულ საჯარო მოხელესთან შესასვლელად, ცალ-ცალკე საშვის გამოწერაა საჭირო. საინტერესოა, რა მნიშვნელოვანი საქმეებით არიან დაკავებული ჩვენი ბიუჯეტით დაფინანსებული მოხელეები.
11 აპრილს, ოზურგეთის მუნიციპალიტეტის საკრებულოს შენობაში ერთ-ერთი სამსახურის უფროსთან საშვით შესულებს, დერეფანში ხმამაღალი მუსიკის ხმა შემოგვესმა. დავინტერესდით, რა ხდებოდა და კარი შევაღეთ: სამუშაო კაბინეტში მყოფმა ოზურგეთის მუნიციპალიტეტის საკრებულოს თავმჯდომარის თანაშემწემ, საჯარო ინფორმაციაზე პასუხისმგებელმა პირმა მამუკა ქილიფთარმა და საკრებულოს საინფორმაციო-ანალიტიკური და კომპიუტერული უზრუნველყოფის სამსახურის უფროსმა, რუსიკო ხაბეიშვილმა “განგვიმარტეს”, რომ შესვენება ჰქონდათ და ამიტომაც, თავს ხმამაღალი მუსიკით ირთობდნენ.
როგორც ჩანს, ჟურნალისტებს და უბრალო მოქალაქეებს საჯარო სამსახურში გადაადგილება იმიტომ გვეკრძალება, რომ საჯარო მოსამსახურეები ასე თავს გაცილებით მშვიდად, თავისუფლად და “ჰარი-ჰარალეს” ხასიათზე გრძნობენ. ჩვენს შეკითხვაზე, ეს საკრებულოა თუ კაფე-ბარი, საჯარო მოხელეები გაკვირვებულები აქეთ გვეკითხებიან:
_ ასეთი რა ამბავი იყო, მუსიკა იყო ჩართული, ადამიანი მუსიკას უსმენდეს, რა ამბის ასატეხია?! შესვენების დროს რომ საკრებულოში ადამიანი მუსიკას უსმენდეს, რა მოხდა? დანაშაულია?! ჯერ ერთი, მომისმინე, ჩემო კარგო, მუსიკა კი არა, ნერვები მაქვს დაკარგული. რა მემუსიკება, ისე ვიდექი ოთახში, აივანზე. ეს იყო სრულიად ადამიანური, ახალგაზრდული რამ, შესვენების დროს დაკეტილ ოთახში უსმენდნენ მუსიკას, _ გვითხრა ქილიფთარმა.
ოზურგეთის მუნიციპალიტეტის საკრებულოს საინფორმაციო-ანალიტიკური და კომპიუტერული უზრუნველყოფის სამსახურის უფროსი, რუსიკო ხაბეიშვილი: _ აა, საჯარო სამსახურში მუსიკა მქონდა ჩართული? რა ხდებოდა და არაფერი, შესვენების დრო იყო, უბრალოდ, ჩავრთე. რა, არ შეიძლებოდა? შესვენება იყო და ჩავრთე.
ოზურგეთის მუნიციპალიტეტის საკრებულოს თავმჯდომარე ალეკო მამეშვილი “გურია ნიუსთან” საუბარში აცხადებს, რომ ეს ყველაფერი წარმოუდგენლად მიაჩნია: _ არ მჯერა! _ ასეთია მისი მოკლე კომენტარი ამ საკითხთან დაკავშირებით.
საგულისხმოა, კიდევ ერთი მომენტი _ როცა “გურია ნიუსის” ჟურნალისტებს მხოლოდ ერთ კონკრეტულ ჩინოვნიკთან ამოწერილი საშვით, იმავე დერეფანში, მეორე ჩინოვნიკთან შესვლის უფლებას არ აძლევენ, ამ დროს, შენობაში ნაციონალების პრესსპიკერი და ერთ-ერთი ა(ა)იპ პრესსამსახურის ხელმძღვანელი თავისუფლად გადაადგილდებოდნენ.
_ ბატონო ალეკო, დღეს საკრებულოს შენობაში ვიყავი, ერთ-ერთი სამსახურის უფროსთან. რადგან არ მქონდა მეორე საშვი, თქვენმა მდივანმა, მაია ნარსიამ საშუალება არ მომცა, მეორე საშვის გარეშე აპარატის უფროსთან შევსულიყავი. თუ შენობაში თავისუფლად გადაადგილდებიან ნაციონალების პრესსპიკერი და სხვადასხვა აიპიების პრესსამსახურების წარმომადგენლები, ჩვენ რატომღა გვეკრძალება?
_ არანაირი შეზღუდვა არ არის. როგორც ვიცი, თავისუფლად შემოსულხართ და ასულხართ ზევით. ასევე ვიცი, რომ მისულხართ საკითხებზე, გაგირკვევიათ და მეორე ოთახში თუ ვეღარ შეხვედით, ამის გამოა პრობლემა? გითხრეს, ალბათ, მიზეზიც.
_ დიახ, მომთხოვეს მეორე საშვი.
_ ან გეტყოდნენ, რომ ვიღაც არის მასთან და დაკავებულიაო.
_ შენობაში სხვა ჟურნალისტები თავისუფლად გადაადგილდებოდნენ. მაინტერესებს, ასე რატომ ხდება?
_ არ ვიცი, რა.
_ არ გჯერათ, რომ ასე იყო?
_ ნამდვილად არ ვარ დარწმუნებული.
_ კარგით, რამდენად მიზანშეწონილად მიგაჩნიათ საკრებულოში მუსიკის ხმამაღლა ჩართვა?
_ უკაცრავად, შეხვედრაზე ვარ, _ გვითხრა საკრებულოს თავმჯდომარემ და ტელეფონი გაგვითიშა.
