თუ თქვენ პოზიციონერები ხართ, მე ყველას მინდა, გითხრათ _ ყველაზე დიდი მარაზმი ისაა, ამ ერთ მუჭა ქვეყანას პოზიცია-ოპოზიციად რომ ყოფთ. მე მრცხვენია ამ ქვეყანაში ცხოვრების, სადაც პროფესიონალიზმზე მაღლა პოლიტიკური მრწამსი დგას. აი, ახლა, დღეს, 30 ივნისს, 2012 წელს, მე კიდევ ერთხელ დავრწმუნდი: დიპლომი, გინდ წითელი იყოს და გინდ ლურჯი, სასწავლებელი და უმაღლესი განათლება, თავისი ხარისხებით, განათლებისა და ინტელექტის გარანტი არ არის. ჩემო პატარებო, რაც მთავარია, თქვენ არაფერი დაგკლებიათ, დააკლდა მათ, ვინაც თქვენი კეთილი ენერგია ვერ მიიღო დღეს. თუ მათ თქვენ არ უყვარხართ, ეს მათთვის არის უარესი. თქვენ მართლა შექმნით დიდ და ნათელ მომავალს. მონები კი მონებად დარჩებიან,” _ ეს სტატუსი, სოციალურ ქსელ ფეისბუქში, გუშინ, ოზურგეთის მუნიციპალიტეტის მეორე საბავშვო ბაღის უფროსი ჯგუფის აღმზრდელმა, ეკა ნინიძემ განათავსა. ნინიძე “გურია ნიუსთან” საუბრისას იმ ფაქტსაც იხსენებს, თბილისში, საბავშვო ბაღის აღსაზრდელები, ანალოგიური შემთხვევით მხოლოდ იმიტომ დასაჯეს, რომ აღმზრდელის შვილი ბერა ივანიშვილის ფანი იყო.
_ მთელი საათი გვალოდინეს და არ მოვიდნენ, დაპატიჟებული გვყავდა საკრებულო, გამგეობა და გუბერნატორი. როგორც მითხრეს, მათ არ ეცალათ და წარმომადგენლები უნდა მოსულიყვნენ. მოგვიანებით გაირკვა, რომ სკოლამდელი სასწავლო-სააღმზრდელო ცენტრის დირექტორი, მაკა ჭყონია და მთავრობის წარმომადგენელი, ირინა საჯაია, სავარაუდოდ, ერთადერთი მიზეზით _ ჩემი პოლიტიკური მრწამსის გამო არ მოვიდნენ, _ გვითხრა ნინიძემ.
ოზურგეთის სასწავლო-სააღმზრდელო ცენტრის დირექტორი, მაკა ჭყონია ამბობს, რომ ეს სიმართლეს არ შეესაბამება. მისი თქმით, ღონისძიება უქმე დღეს დაიგეგმა და მისვლა ვერ მოახერხა.
ანალოგიური არგუმენტი აქვს ოზურგეთის მუნიციპალიტეტის საკრებულოს სოციალურ საკითხთა კომისიის თავმჯდომარეს, ირინა საჯაიასაც.
_ შაბათი დღე იყო. მისვლას ვაპირებდი, თუმცა, აუცილებელი, პირადი საქმე გამომიჩნდა და ვერ წავედი. თანაც, ჯანმრთელობის მდგომარეობაც არ მიწყობდა ხელს, _ გვითხრა საჯაიამ.
პოლიტიკური კოალიცია “ქართული ოცნების” ოზურგეთის ოფისის ერთ-ერთი ლიდერი, მარინა სუნგულია ამბობს, რომ ხელისუფლება მომავალი თაობის ზომბირებას ცდილობს:
_ ნაციონალური მოძრაობის ნეობოლშევიკური მორალია _ “მოვკლავ დედას, მოვკლავ მამას, თუ პარტია მომთხოვს ამას”. ასეთი მორალის ჩამოყალიბებას, საბავშვო ბაღიდან სჭირდება აღზრდა. ამიტომ, ხელისუფლება ცდილობს ზომბირებული და მონური თაობის ჩამოყალიბება ადრეული ასაკიდან დაიწყოს, რაც გარანტია იქნება მათი ხანგრძლივი დიქტატისთვის. მათ ასევე დაიპყრეს საინფორმაციო საშუალებები და გარემო გააჯერეს დამყაყებული ინფორმაციებით, შეზღუდეს ჟანგბადი. უჰაერობამ საზოგადოებაში ტვინის ასფიქსია და ნელ-ნელა საღად აზროვნების უნარის დაკარგვა გამოიწვია. მოულოდნელი, ახალი ძალის გამოჩენამ სარკმელი შემოამტვრია ჩვენს ჩახუთულ გარემოში და გონება გაანათა. ეს პროცესი კი მათთვის სასიკვდილო განაჩენია. ცნობილი ფაქტია, რომ სიკვდილის წინ ცოცხალი ორგანიზმები (მცენარეები და ქვეწარმავლები) სასიკვდილოდ შხამიანები ხდებიან. ზუსტად ეს პროცესია ნაციონალურ მოძრაობაში დაწყებული. მოჭარბებული შხამი კი აგონიას იწვევს, _ დასძენს სუნგულია.
