16 დღეში, საქართველოს პრეზიდენტმა სასტუმრო, ამფითეატრი, ამბულატორია, კაფე-ბარი და მოედანი უნდა ჩაიბაროს.
ყოველ შემთხვევაში, ასეთია პრეზიდენტის ნება და დაპირება. თუმცა, ერთ-ერთი დაპირების თანახმად, წლევანდელ სეზონზე ამოსულ დამსვენებელს, განახლებული კურორტი უნდა დახვედროდა. მოგვიანებით, სეზონის დასაწყისი, სეზონის დასასრულად გადაკეთდა. რეაბილიტირებული ბახმარო საზოგადოებამ 19 აგვისტოს _ ფერისცვალების დღესასწაულზე უნდა ნახოს.
მუშების ნაწილი ეჭვობს, რომ სამუშაოების დასრულება ამ დროისთვის მოხერხდება, ნაწილს კი ამის იმედი აქვს. ამბობენ, რომ დიდი პასუხისმგებლობა აქვთ აღებული და კითხვაზე _ რომ ვერ მოასწროთ? _ პასუხის გაცემისაც კი ეშინიათ.
ამ ეტაპზე საბოლოო სახე არც ერთ ობიექტს არ აქვს _ თუ არ ჩავთვლით კომუნისტების დროს აშენებულ სასტუმროს, რომლის გარედან მოპირკეთება ხდება. მშენებლები ამბობენ, რომ 19 აგვისტომდე კანალიზაციასაც გააკეთებენ, აბაზანასაც და სასტუმრო ნომრებსაც, თუმცა იმ მდგომარეობით, რომელიც ამ ეტაპზეა, ეს რთული დასაჯერებელია.
როგორც გავიგეთ, ხელისუფლებას ერთი სიურპრიზი უკვე აქვს მომზადებული _ ახალი სასტუმრო ხალიჩებით იქნება მოფენილი. ჩვენი ინფორმაციით, ამის მიზეზი მხოლოდ და მხოლოდ ის არის, რომ იატაკის დაგებას ვერ ახერხებენ და ამის ნოხებით დამალვას ცდილობენ.
როგორც გვითხრეს, გასულ კვირას, მშენებარე ობიექტები რეგიონული განვითარებისა და ინფრასტრუქტურის მინისტრმა, რამაზ ნიკოლაიშვილმა, დასაქმების მინისტრთან პაატა ტრაპაიძესთან ერთად მოინახულა. მინისტრები მშენებლობის ტემპით კმაყოფილი დარჩენილან.
_ მედლებზე იფიქრეთ, მედლებზე, _ უთქვამთ მინისტრებს და ქუთაისის პარლამენტის მშენებლობაზე დასაქმებული მუშების დაჯილდოების ფაქტიც გაუხსენებიათ.
მუშებიც ფიქრობენ. მედლებზე თუ სხვა რამეზე არ აკონკრეტებენ, მაგრამ აღნიშნავენ, რომ ეს ყველაფერი 19 აგვისტოს აუცილებლად მზად უნდა იყოს. თუმცა, როგორ, დაზუსტებით არ იციან.
_ იმედია, მოვასწრებთ, თუ არა და ღმერთის იმედს დავიტოვებთ. ისეთი გაფრთხილება გვაქვს, რომ… _ გვეუბნება ერთ-ერთი მუშა, რომელსაც საუბრის დასრულებას ზედამხედველი არ აცლის და სამუშაოს გაგრძელებისკენ მიუთითებს.
_ ნეტავ, მაცოდინა ვის ეპრანჭებიან?! აფთიაქი და კაფე-ბარი 19-ში ვის რა ჯანდაბად უნდა?! _ სიბრაზეს ვერ ფარავს ხარაჩოზე ასული მუშა, რომელსაც, როგორც ჩანს, დასვენების საშუალებას არ აძლევენ.
_ შენ ეგა თქვი, კაცო! ყველამ იცის რომ მაგ დროს სეზონი მთავრდება. ეჰ, რას დავეძებთ, ერთი იყოს სამუშაო და… _ მხარს უბამს მეორე მუშა.
_ გამაგიჟებთ თქვენ, მუშაობაცაა და მუშაობა, _ შეეპასუხა მესამე, რომელიც კილოს მიხედვით გურული ნამდვილად არ იყო, _ გაგვწყვიტეს წელში. რასაც აქ ავიღებთ, წამალში არ გვეყოფა. ისიც თუ ავიღეთ. თუ ვერ მოვასწარით, ჩემ ფეხებს ავიღებთ, _ აშკარად ბრაზი ერევა მუშაობისგან დაღლილს…
მუშები საუბრის დროს ადვილად იხსნებიან, თუმცა, როცა იგებენ, რომ ჟურნალისტები ვართ, დუმდებიან…
_ არ გვინდა, სად გვაქვს მაგის თავი, _ თითქოს დაზეპირებულ ტექსტს გვპასუხობს ყველა.
ჩვენი მომეტებული ინტერესის დაკმაყოფილებას ერთი ადამიანი შეეცადა, რომელმაც ვინაობის გამხელა არ ისურვა, თუმცა, მშენებლობის უფროსად გაგვეცნო. ინკოგნიტო რესპონდენტმა გვითხრა, რომ ყველა დეტალში ხარისხი გარანტირებულია, ჩვენი ჩაკითხვები _ გაუძლებს თუ არა ორ თვეში აშენებული შენობები ბახმაროს ზამთარს და მინიმუმ 5 მეტრი სიმაღლის თოვლს, მისი თქმით. უსაფუძვლოა. იგი აღნიშნავს, რომ ეს ადგილი 19 აგვისტოს, აბსოლუტურად განსხვავებული იქნება: _ ნამდვილად იცვლის ფერს, _ დამარცვლით ამბობს ამ სიტყვებს.
კითხვაზე, რატომ მიმდინარეობს გამალებით მშენებლობის მიმდებარე ტერიტორიაზე არსებული ძველი სახლების ფასადების შეღებვა და ვინ ასრულებს ამ სამუშაოებს, პასუხს არ გვცემს და მხოლოდ ამ შეკითხვის შემდეგ ინტერესდება ჩვენი მედიასაშუალებით.
_ ააა, “გურია ნიუსი”? აბა, თქვენ სხვა რა დაგაინტერესებთ? _ ამ სიტყვებით გვტოვებს და საუბრის გაგრძელების სურვილს აღარ გამოთქვამს. საუბარს არც მუშებს ანებებს და ამბობს, რომ “სალაზღანდარო” დრო არავის აქვს, არადა, რამდენიმე მუშას ლაპარაკის სურვილს ვატყობთ…
ოფიციალურ კომენტარზე არც ის მუშები გვთანხმდებიან, რომლებიც მშენებლობის მიმდებარე ტერიტორიაზე არსებულ სახლებს ღებავენ. პირად საუბრებში კი აღნიშნავენ, რომ სახლების მეპატრონეებს შესაბამისი დავალებები ხელისუფლებამ მისცა.
ამ თემაზე საუბარი არავის არ სურს. მით უმეტეს იქ, სადაც მშენებლობებია, რადგან ამ ადგილს, ელიტარულ უბანს ეძახიან. სწორედ აქ დგას ფეშენებლური კოტეჯები, აქ ისვენებენ მაღალი თანამდებობის პირების ოჯახის წევრები და სწორედ ამ ადგილას ქირაობენ სახლებს 2 000, 3 000 და 4 000 დოლარადაც კი.
ამ პატარა ადგილს მიღმა კი ბახმაროს დღევანდელობა თვალშისაცემია: არცთუ მოშორებით, მდინარის ნაპირი ნაგვითაა სავსე. სხვათაშორის, ეს ადგილი გასულ სეზონზეც ანალოგიურად გამოიყურებოდა. არადა, დასუფთავების სამსახურის ბახმაროში მივლინებაზე საკმაოდ სოლიდური თანხები იხარჯება ბიუჯეტიდან.
დღევანდელი ბახმაროს რეალობაა ავარიული სახლებიც, რომლებსაც მოსახლეობა, უსახსრობის გამო, ვერ ამაგრებს. რამდენიმე ადგილას, გამხმარი ნაძვი, სადაცაა წაიქცევა და სახლებს დაანგრევს.
მოუწესრიგებელი ელექტროგაყვანილობა და ხშირად გამორთული შუქი ბახმაროს დამსვენებლებს დიდი ხანია თავის ტკივილად ექცა. ისინი საყვედურებს არ მალავენ და ამბობენ, რომ “ენერგო პრო ჯორჯიამ”, უთოფოდ “დააყაჩაღა”:
_ თითო ოჯახიდან 50 ლარი აიღეს. ბანკში შეგვატანინეს ფული. კომუნალური მრიცხველი დგას ბახმაროში და ასე უნდა გადაიხადოთო. ფეშენებლურ კოტეჯებში, სადაც მაცივარი, სარეცხი მანქანა, ცხელი წყალი და სხვა საშუალებები აქვთ, შეიძლება მართლაც დახარჯონ 50 ლარის დენი, მაგრამ პატარა ოთახში, სადაც საწოლიც გვიდგას, მაგიდაც, სამზარეულოც აქ გვაქვს მოწყობილი და მხოლოდ ერთი ნათურა გვინთია, 50 ლარის დენი როგორ უნდა დავხარჯოთ? _ გვეუბნებიან ჩოხატაურის ქუჩაზე მისულებს.
ანალოგიური პრობლემა აქვთ ბუკნარის, ვაკიჯვრის, სატყეოს, ინგოროყვას ქუჩების დამსვენებლებს. ისინი ამ უსამართლობაზე ხმამაღლა საუბრობენ და აღნიშნავენ, რომ “ენერგო პრო ჯოჯიას” ხელს ადგილობრივი ხელისუფლება უწყობს. დასძენენ იმასაც, რომ 50-ლარიანი დენი, უმეტეს შემთხვევაში გამორთულია და ამ პრობლემის მოგვარებით თავს არავინ იწუხებს.
სრულად გამართული არც წყალმომარაგების სისტემაა. არადა, ამაზე გასულ წელს 55 ათასი ლარი დაიხარჯა და როგორც გავიგეთ, სოლიდური თანხა წელსაც გამოიყო. წელს სამუშაოები ინდმეწარმე ჟორა თავაძემ შეასრულა, რომელიც ჩოხატაურის პროკურორის, დავით შვანგირაძის სიმამრია. მანვე მოაწყო სათამაშო სკვერი სანატორიუმის მიმდებარე ტერიტორიაზე. ჩვენ მიერ მოპოვებული ინფორმაციით, ამ სამუშაოების შესრულებაში თავაძემ 65 000 ლარი აიღო, თუმცა, დეტალების დაკონკრეტება ვერ მოვახერხეთ _ ჩოხატაურის მუნიციპალიტეტის გამგეობის პრესსამსახურის ხელმძღვანელმა, თეონა ჩიგოგიძემ, აღნიშნული ინფორმაციის მოწოდებისთვის წერილობითი განცხადება მოითხოვა, რომლის პასუხს, როგორც წესი, ათი დღე აგვიანდება. ამასთან, თუ ბოლო დროს განვითარებულ მოვლენებს გავიხსენებთ, საჯარო ინფორმაცია არასრულყოფილად მოგვივა და ისიც ვადა გადაცილებით.
უნდა ითქვას ისიც, რომ გაკეთებულ სკვერში ახალი არაფერია, თუ არ ჩავთვლით სკამების და ღობის შეღებვას… ბახმაროსთვის ახალია ბატუტი _ ბატუტზე როგორც პატარები, ასევე მოზრდილები კარგად ერთობიან.
სამწუხაროდ, არაფერი შეცვლილა კარუსელების მხრივ. ბავშვებისთვის საყვარელი გასართობი, ბახმაროში მხოლოდ ორია _ ორივე არც თუ გამართული და უსაფრთხო.
გვეუბნებიან, რომ რამდენიმე დღეში, სანატორიუმთან მდებარე სკვერში სპეციალური მონიტორი განთავსდება, თუმცა, ესეც _ რამდენიმე დღეში.
წლევანდელ სეზონზე, ბახმაროში, დაპირებული სასწრაფო დახმარების ავტომანქანა, მართალია, არ დგას, თუმცა, როგორც გვითხრეს, ექიმის კონსულტაცია და პირველადი დახმარება უფასოა.
“მედ ალფას” წარმომადგენლის, პოლინა დგებუაძის თქმით, გაფორმებული ხელშეკრულების თანახმად, პაციენტის პირველადი მომსახურება უფასოა.
როგორც გვითხრეს, გახშირებული ქეიფით და დროსტარებით ბახმაროში მივლინებაში მყოფი პოლიციელები გამოირჩევიან და დამსვენებელს, ხშირ შემთხვევაში ძილსაც უფრთხობენ. ჩვენი წყარო ამბობს, რომ ბახმაროში ჩვენებური მხოლოდ ორი პოლიციელია. დანარჩენები კახეთის სამხარეო პოლიციის მთავარი სამმართველოდან არიან მოვლინებულები.
რამდენიმე დამსვენებელმა ჩვენთან საუბარში თქვა, რომ კურორტის დროებითი ადმინისტრაციის ხელმძღვანელის, დავით საჯაიას მუშაობით კმაყოფილია. იგივე მოქალაქეები კმაყოფილებას გამოთქვამენ “ლიბერთი ექსპრესის” ავტობუსის კურორტზე ასვლითაც, რომელიც დამსვენებელს კვირაში ერთხელ ემსახურება.
ერთადერთი პრობლემა, რაც ამ ეტაპზე ბახმაროში სრულად მოგვარებულია, კურორტამდე მისასვლელი, საფარგანახლებული პატიაშვილისდროინდელი გზაა.
საქართველოს პრეზიდენტი გურიაში ყველა წინასაარჩევნო შეხვედრაზე იმეორებს, რომ კურორტის გრანდიოზულ აღმშენებლობას ნიკოლაიშვილი ხელმძღვანელობს და რომ 19 აგვისტოდან მოყოლებული, ზამთარ-ზაფხულ, “ყველაფერი სულ სხვანაირი იქნება”. წელს ხომ კახეთის, სვანეთის, სამეგრელოს, სამცხე-ჯავახეთის… მსგავსად, გურიის წელია!
ფერისცვალებამდე კი სულ რამდენიმე დღე რჩება!
