დღეს ორგანიზაციამ ჩატაევის ჯანმრთელობასთან და რუსეთის ფედერაციაში მის შესაძლო ექსტრადირებასთან დაკავშირებით სპეციალური პრესკონფერენცია გამართა. საქართველოში ჩეჩნური დიასპორის წარმომადგენელმა მექა ხანგოშვილმა ახმედ ჩატაევს “აბსოლუტურად უდანაშაულო” უწოდა და პროკურატურას მისი გათავისუფლება მოსთხოვა: “ჩვენ ღრმა შეშფოთებას გამოვთქვამთ მისი ჯანმრთელობის გამო და პროკურატურას ვთხოვთ, დროულად გაათავისუფლოს ის პატიმრობიდან. მისი ჯანმრთელობის მდგომარეობა უკიდურესად მძიმეა, ამპუტირებულ ფეხზე სასწრაფოდ ესაჭიროება განმეორებითი ოპერაცია, თუმცა ჩატაევი ციხის ექიმებს უნდობლობას უცხადებს და სურს, რომ ოპერაცია სხვა კლინიკაში გაიკეთოს,” _ განაცხადა ხანგოშვილმა. მისი განცხადებით, ჩატაევის უნდობლობის მიზეზი ექიმების მიერ ჩატარებული არასწორი მკურნალობაა. კერძოდ, პატიმარი თვლის, რომ მისთვის კიდურის მოკვეთა აუცილებლობით გამოწვეული არ იყო.
ახმედ ჩატაევის სასამართლო პროცესი 15 ნოემბერსაა ჩანიშნული. როგორც ნანა კაკაბაძემ და პანკისიდან ჩამოსულმა აიუბ ბორჩაშვილმა განაცხადეს, ისინი, სავარაუდოდ, ხვალ მოამზადებენ სპეციალურ მიმართვას და თავდებში ჩაუდგებიან საბრძოლო მასალის უკანონოდ შენახვა-ტარებაში ბრალდებულ ჩატაევს.
“უპრობლემოდ ჩავუდგებით თავდებში ახმედ ჩატაევს, რადგან დღესდღეობით ჩვენთვის მიუღებელია, რომ ის გავაპაროთ. სამწუხაროდ, ამჟამად ჩატაევი ორი საფრთხის ქვეშ იმყოფება _ პატიმრობა და აქედან გამომდინარე, ჯანმრთელობის კიდევ უფრო გაუარესება და ლიკვიდაციის საფრთხე გათავისუფლების შემდეგ. თუმცა, ყველა ის ადამიანი, რომლებიც რუსეთის და ადგილობრივ სპეცამსახურებთან კავშირში არიან შემჩნეულები, გაშიფრული გვყავს და მათგან ჩატაევის დაცვა არ გავიჭირდება. თუ საჭირო გახდა, მთელი სოფელი და ხალხი ჩავუდგებით თავდებში და გათავისუფლების შემდეგაც ჩვენ ვუპატრონებთ,” _ აცხადებს აიუბ ბორჩაშვილი “გურია ნიუსთან” საუბარში.
მექა ხანგოშვილი შიშობს, რომ უკანასკნელი 10 წლის გამოცდილების გათვალისწინებით, გამორიცხული არ არის დღის წესრიგში ახმედ ჩატაევის რუსეთში ექსტრადიციის საკითხი დადგეს; მისი თქმით, საქართველომ ათი ჩეჩენი გადასცა რუსეთს, თუმცა ახლა ხელისუფლება შეიცვალა და ამის ალბათობამაც იკლო.
“რა თქმა უნდა, ახალი ხელისუფლების მხრიდან ექსტრადიციის ალბათობა ნაკლებია, თუმცა, ამ სასამართლოს პირობებში, რომელიც ჯერ კიდევ არ არის თავისუფალი, ყველაფერი მოსალოდნელია,” _ აცხადებს ხანგოშვილი.
