ეს რაიონი გურიაში გამგებლობის მსურველთა მრავალრიცხოვნობით გამოირჩევა _ ოზურგეთში გამგებლობის სურვილით, მხოლოდ ერთი კანდიდატის, კოტე შარაშენიძის განცხადება შევიდა და ისიც საკრებულოს წევრებმა უპრობლემოდ დაამტკიცეს. ჩოხატაურში კი, ჯერ გადაწყვეტილი არაფერია.
ლანჩხუთელები “ნაციონალების” მიმართ პროტესტს შიმშილობით გამოხატავენ და ითხოვენ გამგებლის მოვალეობის შემსრულებლის, კახა ასკურავას გადადგომას. ახლა ლანჩხუთის ცენტრში “ქართული ოცნების” რამდენიმე აქტივისტი შიმშილობს. მათ, გამგეობის შენობის წინ, კარავიც აქვთ გაშლილი, თუმცა, კახა ასკურავა გადადგომას არ აპირებს.
“გურია ნიუსის” ინფორმაციით, გამგებლობის ყველაზე რეალური კანდიდატი, წარმოშობით მამათელი ზაზა ურუშაძეა. იგი, როგორც ამბობენ, მაჟორიტარი დეპუტატის თემურ ჩხაიძის მიერ წამოყენებული კანდიდატურაა. ზაზა ურუშაძე განცხადებას ამ დღეებში შეიტანს.
ვინ არის ზაზა ურუშაძე და აქვს თუ არა რეალური შანსი, გახდეს ლანჩხუთის მუნიციპალიტეტის გამგებელი, ამაზე ის “გურია ნიუსთან” საუბრობს.
ზაზა ურუშაძე: _ ერთ-ერთი უკრაინული ფირმის პრეზიდენტი, წარმოშობით ლანჩხუთის მუნიციპალიტეტის სოფელ მამათიდან ვარ, ვცხოვრობ გრიგოლეთში, სადაც სახლი მაქვს. ძალიან დიდი ხანია, სუფსაში ვარ საცხოვრებლად დარეგისტრირებული. ჩემი მშობლები ამჟამად მამათში ცხოვრობენ. განცხადებას ამ დღეებში შევიტან ლანჩხუთის მუნიციპალიტეტის გამგეობაში.
_ ბატონო ზაზა, გაქვთ კი რეალური შანსი, გახდეთ გამგებელი, როცა ლანჩხუთის გამგებლობის მსურველ 80 ადამიანს აქვს განაცხადი შეტანილი?
_ მე ისეთი პროგრამა და მუნიციპალიტეტის განვითარების გეგმა მაქვს, არა მგონია, სხვამ კონკურენცია გამიწიოს! ყოველ შემთხვევაში, მე ასე ვფიქრობ! ვინც ნახავს და გაეცნობა ამ პროგრამას, მასზე უარს არ იტყვის. ეს ყველაფერი მოხდება კანონის სრული დაცვით, იქნება კონკურსი და ჩემთან გასაუბრება.
_ იქნებ, გვითხრათ, თქვენს მიერ წარმოდგენილ პროგრამაში, ძირითადად რა მიმართულებებზეა საუბარი?
_ იცით, ძირითადი დარგები გურიაში რა არის? მეჩაიეობა, მეციტრუსეობა, მეცხოველეობა, სიმინდის კულტურა. გარდა ამისა, სოფლის განვითარების პროგრამებზე და მიკროსაწარმოებებზე მაქვს ძირითადი ყურადღება გამახვილებული: თხილის საწარმოები, ჩაის ფაბრიკები… დიდი საკონსერვოები, ძირითადად არ არის გამართლებული იმიტომ, რომ ძვირი ჯდება მათი შენახვა. ამიტომ, ძირითადად, აქ მცირე საწარმოებზე გადავიტანთ ყურადღებას. არის მაღალმთიანი სოფლები, სადაც მეჩაიეობა და მეციტრუსეობაა; ვფიქრობ, იქ წვენების ქარხანა გავხსნა. დაბალ ზონაში მეცხოველეობის განვითარებაა შესაძლებელი. მაქვს შემოთავაზება, რომ გავაკეთო დაფნის საწარმო და კიდევ ერთი, _მე ვაწარმოებდი საუბრებს უცხოელებთან, როგორ წარვმდგარიყავი კომისიის წინაშე.
_ ბატონო ზაზა, როგორც ამბობენ, თქვენ ლანჩხუთის მაჟორიტარი დეპუტატის თემურ ჩხაიძის ერთადერთი კანდიდატურა ბრძანდებით…
_ კი, ბატონო, ნამდვილად ვარ თემურ ჩხაიძის მიერ წამოყენებული კანდიდატურა, მაგრამ მთლად მასე ნუ ვიტყვით, რა. გავრცელებულია ასეთი ხმა, თითქოს, მარტო მაჟორიტარი დეპუტატი მიჭერს მხარს. არ დაგიმალავთ და გეტყვით, როცა გამგებლობაზე დაიწყო საუბარი, ჩემი ტელეფონი არ გაჩერებულა, იმდენი ვინმე მირეკავს და მთხოვს, რომ იქნებ, ჩამოხვიდე და შენი კავშირებით რაიონს დაეხმაროო. თუმცა, პირველი შემოთავაზება მაჟორიტარისგან მივიღე.
_ ბატონო ზაზა, მიზანშეწონილად მიგაჩნიათ თუ არა, რომ შიმშილობით გამოხატული პროტესტის ფორმით მოითხოვენ ლანჩხუთის გამგებლის მოვალეობის შემსრულებლის _ კახა ასკურავას გადადგომას?
_ მე პირადად არ მივსულვარ იქ, მით უმეტეს, ვიცნობ იქ ზოგიერთებს. ჩემი აზრით, დემოკრატიაა და თავისუფლებაა, როცა ყველას აქვს აზრის გამოხატვის უფლება. ამ ყველაფერსაც თავისი პროცედურები აქვს. მე ვფიქრობ, რომ პრობლემები ცივილიზებულად უნდა გადაიჭრას. ყველასთან შემიძლია გასაუბრება და აუცილებლად გავითვალისწინებ თითოეული ადამიანის აზრს.
კითხვაზე, არის თუ არა ზაზა ურუშაძე მაჟორიტარი დეპუტატის თემურ ჩხაიძის კანდიდატურა, დეპუტატი “გურია ნიუსთან” ასეთ კომენტარს აკეთებს:
_ არის თუ არა ჩემი კანდიდატურა? რატომაც არა. ზაზა ურუშაძე არის ყველაზე ღირსეული იმ 100 კაცს შორის, ვისაც გამგეობაში აქვს განცხადება შეტანილი.
_ ამ ადამიანმა ეს ყველაფერი ჩემთან შეთანხმებით გაიარა, დანარჩენმა კი არაფრად არ ჩამაგდო, აზრიც არ მკითხა. მე ვარ ხალხის რჩეული, მიმაჩნია, რომ სწორედ მე უნდა დავასახელო და წარვადგინო გამგებელი. გეტყვით, რომ ზაზა ურუშაძეს აქვს ყველაზე დიდი შანსი გახდეს ლანჩხუთის მუნიციპალიტეტის გამგებელი, _ აცხადებს თემურ ჩხაიძე “გურია ნიუსთან”.
