ბიუროს დასაწყისში დავით უსუფაშვილმა ქვეყანაში მიმდინარე მოვლენებთან და ბოლო დროს მომხდარ ფაქტებთან დაკავშირებით განცხადება გააკეთა. იგი ქუთაისში რამდენიმე დღის წინ მომხდარ ინციდენტს შეეხო და აღნიშნა, რომ დაწყებულია საკითხის შესწავლა და სავარაუდოდ, რამდენიმე პირის სასამართლოს წინაშე წარსდგენაც მოხდება. მისივე განცხადებით, ასევე იკვეთება პარლამენტის წევრების მაპროვოცირებელი და გამომწვევი ქმედებები, რაც საკანონმდებლო ორგანოს წევრებისთვის ყოვლად დაუშვებელია.
დავით უსუფაშვილმა ბიუროს სხდომიდან პარლამენტის უმცირესობის დეპუტაციას მოუწოდა დროულად დაასრულონ კონსულტაციები და რიგგარეშე სესიების პერიოდში ჩაერთონ საკანონმდებლო საქმიანობაში. პარლამენტის თავმჯდომარე პრეზიდენტის მიერ ბოლო დროს გაკეთებულ განცხადებებსაც გამოეხმაურა და მას შემაშფოთებელი უწოდა.
„პრეზიდენტის მხრიდან საუბარი იყო იმაზე, რომ სამართალმდაცავები არ უნდა დაემორჩილონ, სააკაშვილის ენით რომ ვთქვა „უკანონო ბრძანებას“, რაც უკიდურესად სახიფათო მოწოდებაა და მისი განცხადება უპასუხისმგებლობაზე მეტია. სანამ პრეზიდენტია, მან მსგავსი განცხადებებისა და ქმედებებისგან თავი უნდა შეიკავოს“, _ განაცხადა დავით უსუფაშვილმა.
იგი ოპოზიციის მხრიდან მორალისტურ გამოთქმებსაც შეეხო და აღნიშნა, რომ „მორალისტული პოზიციებიდან საუბარი უადგილოა. ჩვენი ვალია მოქალაქეების ინტერესები დავიცვათ, მაგრამ მორალისტული გადმოსახედიდან საუბარს იმ ადამიანებიდან ვერ მივიღებთ, რომლებიც ახერხებენ იმ სხდომათა დარბაზში ისხდნენ, სადაც ვალერი გელაშვილი ზის, რომელიც სცემეს და მას პარლამენტმა სტატუსიც კი შეუჩერა. მათი მხრიდან მორალური და ზნეობრივი გადმოსახედიდან საუბარს ვერ მივიღებთ. როგორც პარლამენტს შეეფერება ისე მოვიქცევით”.
ბიუროს გადაწყვეტილებით, ბიუროს მომდევნო სხდომა სამშაბათს, 25 დეკემბერს, 15 საათზე გაიმართება. რიგგარეშე სხდომების გამართვა კი 26-28 დეკემბერს იგეგმება.
