სამწუხაროდ, გაზეთ “გურია NEWS -ის” 24 დეკემბრის # 102-ში გაიპარა შეცდომა. თქვენი ჟურნალისტის სტატიაში “პოლიციას ადგილობრივი ბიუჯეტიდან აღარ დააფინანსებენ” საუბარია თვისობრივად განსხვავებულ მოვლენაზე და აღწერილია, თითქოსდა ა.წ. 21 დეკემბერს, ოზურგეთის მუნიციპალიტეტის საკრებულოში გაიმართა საკრებულოს სხდომა, რომელზეც დეპუტატთა სიმცირის გამო ვერ მოხერხდა დღის წესრიგით გათვალისწინებულ საკითხს _ “ოზურგეთის მუნიციპალიტეტის ბიუჯეტიდან სოციალური დახმარების გაცემისა და მიღების წესის დამტკიცების შესახებ”, კენჭისყრაზე დაყენება და საბოლოოდ სხდომა 26 დეკემბრისთვის გადაიდო. აღნიშნული სტატია განთავსებულია თქვენს ვებ გვერდზეც (http://www.gurianews.com/index.php?option=com_content&view=article&id=7123:2012-12-24-07-25-03&catid=78:2010-11-30-14-12-34&Itemid=129).
ოზურგეთის მუნიციპალიტეტის საკრებულომ ოფიციალურ ვებ გვერდზე განათავსა ინფორმაცია იმის შესახებ, რომ 2012 წლის 21 დეკემბერს იმართებოდა საჯარო განხილვა (http://ozurgeti.org.ge/?p=2496), ეს ინფორმაცია გავრცელდა ასევე ჩვენს FAჩEBOOK გვერდზეც (www.facebook.com/sakrebulo) და გამოქვეყნად კანონით გათვალისწინებული წესით საინფორმაციო დაფაზე. სხდომაზე იმყოფობედა თქვენი ჟურნალისტი, სადაც ნათლად იყო გაცხადებული, რომ იმართებოდა საჯარო განხილვა და არა საკრებულოს სხდომა. მიუხედავად ამისა გავრცელდა სულ სხვა სახის ინფორმაცია, რაც საერთოდ არ შეესაბამება სიმართლეს. სამწუხაროა როდესაც ჟურნალისტი ვერ ახერხებს ფაქტების ზუსტად გადმოცემას და ერთმანეთისგან ვერ ასხვავებს საჯარო განხილვას და საკრებულოს სხდომას. მიგვაჩნია, რომ მსგავსი სახით ინფორმაციის გავრცელებამ შეცდომაში შეიყვანა საზოგადოება, რაც დაუშვებელია.
გთხოვთ დაუყონებლივ მოახდინოთ რეაგირება აღნიშნულთან დაკავშირებით.
ოზურგეთის მუნიციპალიტეტის საკრებულო
(სტილი და მართლწერა დაცულია)
რედაქციისგან: როგორც ჩვენი მკითხველი ხედავს, ის საკრებულო, რომელმაც მოსახლეობას თავი საშვების უკანონო სისტემის შემოღებით, აუდიტის სამსახურის მიერ მასობრივი უკანონო დაკითხვების მოწყობაში ხელშეწყობით, საარჩევნო პროცესებში სრულიად მიუღებელი ფორმით ჩართვით და სხვა უსიამოვნო ფაქტებით დაამახსოვრა, კვლავაც ეჟოვ-ბერიასთვის შესაშური ტონით გვწერს შენიშვნებს.
ამ ორ, საკმაოდ შეურაცხმყოფელ აბზაცში ნათქვამია, რომ “ჟურნალისტი ვერ ანსხვავებს სხდომას და საჯარო განხილვას”, რომ “შეცდომაში შეგვყავს მოსახლეობა”, რაც, თურმე, “დაუშვებელია”! საკრებულო დაუყოვნებლივ გვთხოვს რეაგირებას ამ “მძიმე შეცდომის” გამო! თუმცა, იგივე საკრებულოს საქციელზე ჯერ არავის მოუხდენია რეაგირება, როცა მან ვერ განასხვავა საჯარო დაწესებულება სასჯელაღსრულების დაწესებულებისგან და კონტროლის პალატის უკანონო სადამსჯელო ღონისძიებებს დაუთმო ადმინისტრაციული შენობა; არც მაშინ, როცა ვერ განასხვავა “ნაციონალების” დეკლარირებული დემოკრატია ავტოკრატიისგან და სრულიად უკანონოდ შემოიღო საშვთა სისტემა…
21 დეკემბერს, ოზურგეთის დემოკრატიული ჩართულობის ცენტრში მართლაც შედგა პროექტის საჯარო განხილვა და შესაბამისად, ფართოდაც გაშუქდა (იხილეთ ბმული: ttp://www.gurianews.com/index.php?option=com_content&view=article&id=6643:-2013——-&catid=78:2010-11-30-14-12-34&Itemid=129); ხოლო თუ რამდენად “ნათლად იყო გაცხადებული” იმავე დღეს, ახლა უკვე საკრებულოში შემდგარი სხდომა თუ განხილვა, იქედანაც კარგად ჩანს, რომ ამ თემაზე არც თუ ცუდად მომუშავე ჟურნალისტისთვისაც ძნელად გასარჩევი აღმოჩნდა, არათუ საჯარო განხილვაზე “ფეისბუქით” მოპატიჟებული ბოხვაურისა და კონჭკათის მოსახლეობისთვის!
ჩვენი აზრით, მთავარი ამ საჯარო შეკრების გაშუქებისას ის გახლავთ, რომ, თავისი არსებობის მანძილზე პირველად, საკრებულომ აღარ გააგრძელა ხალხის ჯიბიდან ამოღებული ფულის უმიზნო ხარჯვა _ უარი თქვა პოლიციის ადგილობრივი ბიუჯეტიდან დაფინანსებაზე!
მართლაც დაუშვებელია საზოგადოების შეცდომაში შეყვანა, თუმცა, კითხვას, ვის შეჰყავს იგი შეცდომაში, სწორედ ამ საზოგადოებამ გასცა პასუხი 1 ოქტომბრის არჩევნებზე.
