“კიდევ ერთ სასაცილო ამბავს გეტყვით, თუ გინდათ… მოგეხსენებათ, ჩვენ რაიონებში ვერ მოვახერხეთ ახალი პარტიის, მხედველობაში მაქვს “ქართული ოცნება _ დემოკრატიული საქართველოს” ჩამოყალიბება, ძირითადად კოალიციაზე ვმუშაობდით და გადავერთეთ მთლიანად კოალიციურ რეჟიმზე. ჩვენ ეხლა დავიწყეთ ეს პროცესი, რათა ელემენტარულად წარმომადგენლობები გვქონდეს რეგიონებში, რაც მე კოალიციის საბჭოზეც დავაყენე და ისიც ავუხსენი ყველას, რომ თავმჯდომარედ დავბრუნდები და ისიც ვუთხარი, რომ ჩემი თავმჯდომარეობა და რეგიონებში მუშაობა იქნება ზომიერი და ეს არ იქნება ისე, რომ ვთქვათ, ხიბლი დაეკარგოს დანარჩენ პარტიებს.
… კიდევ ერთ მაგალითს მოგიყვანთ, როგორ სწრაფად გებულობენ ინფორმაციებს და როგორ სწრაფად გადის ეს გარეთ. აი, ოზურგეთში, მაგალითად, როდესაც ჩვენ პარტიულ ორგანიზაციებს რეგიონებში ვნერგავთ, იქ პარტიული ორგანიზაციის ხელმძღვანელად, ჩემი სტუდენტობის დროინდელი მეგობარი, დავით დარჩია აურჩევიათ ჩვენებს, ახალი პარტია მაქვს მხედველობაში. დავით დარჩია ჩამოვიდა თბილისში და მეუბნება, რომ იქაური პოლიციის უფროსი მივიდა მასთან და ეუბნება, რაღა გინდა ამ პარტიაში, იქ ყველაფერი გადაწყვეტილია, ყველა პროცესი დასრულებულია, ირაკლი ალასანია იქნება პრეზიდენტი და ჯობია, იმ გუნდში წამოდი, რაღა გინდა აქო. აი ეს ელემენტარული უყურადღებობა იყო ირაკლის მხრიდან, რაც სულ სხვანაირად გავრცელდა რეგიონებში… _ განაცხადა პრემიერ მინისტრმა.
ვინ არის ის სავარაუდო პოლიციის უფროსი, რომელზეც, ბიძინა ივანიშვილი საუბრობდა? უკვე რამდენიმე დღეა, რაც ვრცელდება ინფორმაცია იმის შესახებ, რომ გურიის სამხარეო პოლიციის უფროსი, ზაზა პეტრიაშვილი თანამდებობას ტოვებს. “გურია ნიუსთან” ეს ინფორმაცია შინაგან საქმეთა სამინისტროს საზოგადოებასთან ურთიერთობის სამსახურის უფროსმა ნინო გიორგობიანმა არ დაადასტურა. აღნიშნული ფაქტი უარყო თავად ზაზა პეტრიაშვილმაც. არა არის გამორიცხული, რომ პრემიერ-მინისტრი სწორედ მასზე საუბრობდა, რადგან გურიის სამხარეო პოლიციის ახლადდანიშნული უფროსი, ზაზა პეტრიაშვილი ირაკლია ალასანიას ახლო მეგობარი და მისი გუნდის წევრია.
1969 წელს დაბადებული ზაზა პეტრიაშვილი საქართველოს თავდაცვის მინისტრის ირაკლი ალასანიას ნდობით აღჭურვილი პირი და მისი გუნდის წევრი, მინისტრ ალექსი პეტრიაშვილის ახლო ნათესავია. 2010 წელს ზაზა პეტრიაშვილი, „ალიანსი საქართველოსთვის“ თბილისის მერობის მაშინდელმა კანდიდატმა ირაკლი ალასანიამ ნაძალადევის პირველ საარჩევნო ოლქში მაჟორიტარი დეპუტატობის კანდიდატად წარადგინა. როგორც ირაკლი ალასანია მაშინ ჟურნალისტებთან საუბრისას აცხადებდა, დარწმუნებული იყო, რომ ნდობით, რომლითაც ზაზა პეტრიაშვილი სარგებლობს ნაძალადევის რაიონში, ის იქნებოდა უბნის ღირსეული კანდიდატი საკრებულოში. „რაც მთავარია, ჩვენ ერთად გადავწყვეტთ საკრებულოში ყველაზე მწვავე პრობლემებს, რომელიც საზოგადოებას გააჩნია. სწორედ ეს იქნება ხელისუფლება, რომელიც დაადასტურებს, რომ ის დაპირებები, რაც მისცა საზოგადოებას არჩევნებამდე, იქნება შესრულებული, განსხვავებით ერთიანი ნაციონალური მოძრაობისგან“,- განაცხადა მაშინ ჟურნალისტებთან საუბრისას ირაკლი ალასანიამ. თუმცა, რა შედეგით დასრულდა მაშინ ის არჩევნები და დათქმული შეპირებები, ესეც კარგად ახსოვს საზოგადოებას.
რაც შეეხება კოალიცია “ქართული ოცნების” ოზურგეთის ორგანიზაციის ერთ-ერთ ლიდერს დავით დარჩიას, ის ბიძინა ივანიშვილის კურსელი და მეგობარია. უფრო მეტიც _ ივანიშვილმა მას ოზურგეთში საარჩევნო კამპანიის წარმართვა ანდო.
ინფორმაციის დაზუსტება ჩვენ ყველა წყაროსთან ვცადეთ, დავუკავშირდით შინაგან საქმეთა სამინისტროს, რომელიც შეგვპირდა, რომ ამ ამბავს გაარკვევდა, დავუკავშირდით დავით დარჩიასაც, რომლის კომენტარს რამდენიმე წუთში შემოგთავაზებთ, რაც შეეხება თავად ზაზა პეტრიაშვილს, ის ჩვენს სატელეფონო ზარებს არ პასუხობს.
