კომპანიამ ნაკისრი ვალდებულება ვერ შეასრულა, რის შემდეგაც მთავრობამ კლინიკა თბილისის სახელმწიფო სამედიცინო უნივერსიტეტს გადასცა, საავადმყოფოს 600-მდე თანამშრომელი კი, უმუშევარი დარჩა.
ყოფილი მე-8 საავადმყოფოს მედპერსონალი საავადმყოფოს დაბრუნებასა და სამსახურში აღდგენას ითხოვს. “მედიკოსთა უფლებების დაცვის ლიგა”, რომელშიც სამსახურიდან გათავისუფლებული ექიმები არიან გაწევრიანებული, უფლებადამცველ ლაშა ჩხარტიშვილს შეხვდნენ. ექიმების განცხადებით, ყოფილი ხელისუფლების პირობებში მე-8 კლინიკა დაიხურა და უკანონოდ გასხვისდა.
გოგი ხუციშვილი, მედიკოსთა ლიგის თავმჯდომარე: “დღეს საქართველოში გვყავს ვადაგასული პრეზიდენტი, მისი პრეზიდენტობის დროს, ყოველგვარი კანონდარღვევებით მე-8 კლინიკური საავადმყოფო ჯერ გადასცა “ბლოკ–ჯორჯიას”, მაგრამ ვერ გამართლდა ჰოსპიტალური განვითარების გეგმა და ისევ ჩამოართვა, მერე ისევ აღგვადგინა, მერე ისევ გაგვაუქმა და გადასცა სამედიცინო ინსტიტუტს, რომელმაც ბაზების უქონლობის გამო მთელი კლინიკა დაგვტოვა ქუჩაში. მას შემდეგ მესამე წელია უმუშევრები ვართ. მათ სხვა პრობლემა აქვთ, უნდათ მეტი შემოსავალი და ფული ჰქონდეთ. ტყუილია, რაც თქვეს, მათ ყველანაირი ბაზა ჰქონდათ, საჭიროა ეს საკითხი იქნას შესწავლილი და ჩვენ დაგვიბრუნდეს ჩვენი კლინიკა.”
ლაშა ჩხარტიშვილი, უფლებადამცველი: “სამწუხაროდ, მიხეილ სააკაშვილის მმართველობა გამოირჩეოდა მხოლოდ მმართველი ელიტის, მმართველი ოლიგარქიის ფინანსურ ინტერესებზე ზრუნვით. პოლიკლინიკებს ისინი უყურებდნენ, როგორც მხოლოდ შენობა-ნაგებობებს და მიწის ფართობს, აქედან გამომდინარე მათი გასხვისება თუ საკუთრების შეცვლა ხდებოდა იქიდან გამომდინარე, თუ რა მატერიალური მოგება შეიძლებოდა მოეტანა ამ ქონებას არა როგორც სამედიცინო ცენტრს, არამედ როგორც სივრცეს, როგორც შენობას. ასე მოხდა მე-8 საავადმყოფოს შემთხვევაშიც, ფორმალურად მოხდა ამ კლინიკის, როგორც ერთეულის გაუქმება, გადაეცა სამედიცინო უნივერსიტეტს, რომელმაც ვიზუალურად შეაკეთა კლინიკა, მატერიალური ქონება არავინ იცის, სად წავიდა. რაც შეეხება 600 ექიმს, ისინი სამსახურის გარეშე დარჩნენ. კლინიკა დღემდე დახურულია. მედპერსონალი მოითხოვს სახელმწიფომ მოახდინოს შესაბამისი ცვლილებები, სამედიცინო უნივერსიტეტს ჩამოართვას ეს კლინიკა, მოხდეს მე-8 საავადმყოფოს, როგორც იურიდიული სუბიექტის აღდგენა და დაუბრუნდეს კლინიკა, რათა მოსახლეობამ ისევ შეძლოს სამედიცინო მომსახურების მიღება.”
ექიმები ამბობენ, რომ თავიანთი მოკვლევით, ეს შენობა გასხვისებულია სიმბოლურ თანხად, 100 დოლარად. მედპერსონალი დარწმუნებულია, რომ მთავრობა, ჯანდაცვის სამინისტრო განიხილავს აღნიშნულ საკითხს და სამართლიანობა აღდგება.
