გურამ ჩხიაძის შვილს, რეზო ჩხაიძესა და კერძო პირს მადონა კაიკაციშვილს შორის სამოქალაქო დავა, რომელიც წლების წინ ფულის სესხებას ეხებოდა, ჩხაიძის დაჭერით დასრულდა. რეზო ჩხაიძეს თაღლითობის მუხლით 9 წელი მიესაჯა. ჩხაიძის დედა, მაია შევარდნაძე ამბობს, რომ შვილის თავისუფლების სანაცვლოდ, იძულებული გახდა ოჯახი მევალისთვის გადაეფორმებინა, რათა თავის შვილისთვის საპროცესო შეთანხმება გაფორმებულიყო. როგორც ოჯახის წევრები აცხადებენ, სადავო სახლის უკვე ყოფილი მეპატრონე გურამ ჩხაიძე ქმედუუნაროა და აქედან გამომდინარე, მისგან სახლის გადაფორმება არ შეიძლებოდა. როგორც ოჯახის წევრები აცხადებენ, საქმეში ნოტარიუსის, საჯარო რეესტრისა და პროკურატურის წარმომადგენლების დანაშაულის იკვეთება.
მას შემდეგ, რაც ცნობილი გახდა, რომ ოჯახის გამოსახლების პროცესი პოლიციას უნდა დაეწყო, გურამ ჩხაიძის მეუღლე ცუდად გახდა, რის შემდეგაც საქმეში სოციალური მომსახურების სააგენტო ჩაერთო. მათი სასამართლოსადმი მიმართვის შემდეგ გამოსახლების პროცესი ორი დღით გადაიდო.
თამრიკო ჩხაიძე, გურამ ჩხაიძის და: “ავადმყოფ კაცს გვისახლებენ გარეთ, ყველა იცნობს ჩვენს ოჯახს, მარტო ოზურგეთში კი არა, მთელ საქართველოში. რამდენიმე წელია უკვე არის ავად. ეს თანხა, 15 000 ლარი მისმა შვილმა რეზო ჩხაიძემ ისესხა კერძო მევახშიდან მადონა კაიკაციშვილისგან, ჩადო ბიზნესში, რომელმაც ვერ გაამართლა და ჩავარდა ვალში. ახლა ითხოვს 25 000 ლარს. იმ 15 000 ლარის გადაუხდელობის გამო, ქალბატონმა მადონა კაიკაციშვილმა უჩივლა ჩემს ძმისშვილს რეზო ჩხაიძეს და მიუსაჯეს კიდეც 9 წელი, თაღლითობისა და ფულის მითვისებისთვის. ყველანაირად ცუდი კაცი გახადეს, რომელმაც წითელ დიპლომზე დაამთავრა უმაღლესი და დღეს უმუშევარია. ამ ქალბატონზე, როგორც ჩვენ ვიცით, თბილისის პროკურატურაში არის სისხლის სამართლის საქმე აღძრული, როგორც თაღლითი, მან მარტო ჩვენ კი არ გაგვიკეთა ასე, ძალიან ბევრი ოჯახი ჰყავს გამწარებული, ფულს აპროცენტებს და შემდეგ ასე თაღლითობის გზით, პოლიციასთან და პროკურატურასთან შეკრული, მევალეებს სახლებს ართმევს.
ნოტარიუსი წერს, მივედი სახლში, ვნახე ჩემი თვალით ანუ ჩემს ავადმყოფ ძმაზე საუბრობს, გურამზე, რომ სრულიად ჯანმრთელიაო. ამ დროს ჩემს ძმას ყველანაირი დასკვნა და საბუთი აქვს იმისა, რომ არის ავად. ამ საქმეში ნოტარიუსმაც დააშავა, ასევე საჯარო რეესტრმა და პროკურატურამ. მიუსაჯეს ჩემს ძმისშვილს 9 წელი. არ მიუთვისებია მას ეს თანხა”.
მაიკო შევარდნაძე, რეზო ჩხაიძის დედა” იცით, რა დროც იყო, ყველა საბუთზე ხელი მოვაწერე ფსიქოლოგიური ზეწოლისა და წნეხის ქვეშ, საპროცესო შეთანხმება არ გაგვიკეთა ქალბატონმა მადონა კაიკაციშვილმა, ისე სანამ ქონება არ გადავუფორმეთ. არაფერი არ გვქონდა ამ სახლის მეტი. რა მექნა ჩემი შვილის დაჭერას ყველაფერი მერჩივნა, სანამ არ გადამიფორმებთო სახლსო და არ აღიარებ შენი შვილის ვალსო, მანამ რეზიკო ციხეში იჯდებაო და მისჯილი ჰქონდა 9 წელი. წარმოიდგინეთ ახლა, თქვენი თავი ჩემს ადგილზე, დედა ვარ და გავაკეთე, ოღონდ რეზიკო სახლში ყოფილიყო.
15 000 დოლარში 6000 დოლარი პროცენტი აქვს გადახდილი ჩემს შვილს. მეუღლე ავად მყავს. საშინელ დღეში ვართ, სად უნდა გააგდონ ავადმყოფი კაცი და პატარა მცირეწლოვანი შვილიშვილი? არსად გვაქვს წასასვლელი, ამ სახლის გარდა არაფერი გვაბადია. ხელში პოლიციას არანაირი სასამართლო გადაწყვეტილება არ აქვს, იმის გარდა, რომ რეესტრში ჩვენი სახლი არის გაფორმებული მადონა კაიკაციშვილზე. მეც მაქვს შეტანილი თბილისში გენერალურ პროკურატურაში სარჩელი მის წინააღმდეგ” -ამბობს მაია შევარდნაძე.
გოჩა ძიმისტარიშვილი, მადონა კაიკაციშვილის ინტერესების დამცველი: მადონა კაიკაციშვილისა და გურამ ჩხაიძის ოჯახს შორის დაიდო სესხის ხელშეკრულება, დაახლოებით 6 წლის წინ და ჩაიდო ეს სახლი იპოთეკით, სესხის უზრუნველყოფის მიზნით. დღეის მდგომარეობით, ეს თანხა არის გადაუხდელი და ქონება აღრიცხულია ჩემი მარწმუნებლის, მადონა კაიკაციშვილის სახელზე. ამის შემდეგ, არაერთი განცხადებით მიმართა ქალბატონმა მადონამ ოჯახს განცხადებით, რომ ეს თანხა დაებრუნებინა და დაუბრუნებდა სახლსაც, მაგრამ არ ასრულდა ეს მოთხოვნა. ამის შემდეგ მოსთხოვა, რომ დაეცალა ეს სახლი აქ მცხოვრებ პირებს და ესეც არ გაკეთდა.
პოლიციას შეუძლია, სასამართლოს გადაწყვეტილების გარეშე გამოასახლოს დაკავებული ფართიდან ოჯახის წევრები, თუკი დასტურდება, რომ უძრავი ქონების საკუთრება იმ პირზეა, რომელიც განცხადებით მიმართავს პოლიციას. სამოქალაქო რეესტრიდან ამონაწერით დასტურდება, რომ მეპატრონე არის მადონა კაიკაციშვილი და ბუნებრივია, მას აქვს იმის უფლება, გამოასახლოს გურამ ჩხაიძე და მისი ოჯახი ამ სახლიდან. დღეს ყველაფერი არის კანონის ფარგლებში, თუ კი რაიმე არის უკანონო ეს სასამართლომ უნდა გადაწყვიტოს.
სოციალური მომსახურების სააგენტოს იურისტი ირაკლი კუტუბიძე: ჩვენ მივმართეთ ოზურგეთის რაიონულ სასამართლოს, რომელმაც ხვალ უნდა განიხილოს ეს საქმე. შუამდგომლობა გვაქვს დაყენებული სარჩელის უზრუნველყოფის მიზნით. პიროვნება არის ქმედუუნაროდ აღიარებული, რომელსაც ჰყავდა მეურვე, რომელმაც მეურვეობა მზრუნველობის ორგანოს ნებართვის გარეშე გაასხვისა ქონება.
როგორც კი შემოვიდა შეტყობინება სოციალურ სამსახურში, მაშინვე დავიწყეთ მუშაობა და ახლაც ვმუშაობთ, რომ დავიცვათ სამეურვეო პირის ინტერესები.
გურამ ჩხაიძის ოჯახი სასამართლო გადაწყვეტილების მოლოდინშია რომელიც ხვალ უნდა გაიმართოს.
