ამან დიდი მითქმა-მოთქმა გამოიწვია ხალხში. იმისთვის, რომ გაგვეგო აქციის გადადების ნამდვილი მიზეზი, გამოიწვია, “გურია ნიუსი” აქციის ერთ-ერთ ორგანიზატორს, ყოფილ პოლიტპატიმარს, გიორგი გაბედავას ესაუბრა.
_ რატომ გადაიდო აქცია?
_ აქცია იმიტომ გადაიდო, რომ პირველ რიგში გვაქვს ინფორმაცია _ 19 აპრილის ხალხი გეგმავდა პროვოკაციას. მიზეზი იყო ისიც, რომ არ გვქონდა საშუალება გარეთ დაგვეყენებინა მონიტორები _ ვერ ვასწრებდით. ახლა ყველაფერი რიგზეა _ 21 აპრილს მონიტორები იქნება სპორტის სასახლის მიმდებარე ტერიტორიაზე ანუ გარეთაც შეეძლება ხალხს იმის ნახვა და გაგება, რაც შიგნით მოხდება.
_ რატომ გგონიათ, რომ იგივე ხალხი 21 აპრილსაც არ მოაწყობს პროვოკაციას?
_ 19 აპრილი ჩავლილი იქნება. ყრილობა 14-ში რომ გამართულიყო და 19-ში ვინმეს ჩვენი სახელით აეტეხა ჩხუბი, ეს უკვე ჩვენ დაგვბრალდებოდა. ამიტომ მოვერიდეთ პროვოკაციას და თავიდან ავიცილეთ ის საშიშროება, რასაც უნდა მოელოდე ნაციონალებისგან, რომლებმაც ასიათასობით ადამიანი გაამწარეს.
_ აქცია რომ გადაიდო, პირველად თუ არ ვცდები, დაანონსდა, რომ 21-ში სტადიონზე ჩატარდებოდა, როგორც ინფორმაციის წყარო იტყობინებოდა, ბევრი ადამიანი იქნება და სპორტის სასახლის მიმდებარე ტერიტორია ვერ დაიტევსო. რატომ ტარდება ისევ სპორტის სასახლეში?
_ ვიმეორებ, მაშინ არ გვქონდა იმის საშუალება, რომ მონიტორები დაგვემონტაჟებინა სპორტის სასახლის მიმდებარე ტერიტორიაზე. სტადიონი მართლაც გვინდოდა, მაგრამ, სამწუხაროდ, აპარატურა არ გვიწყობს ხელს, ანუ ხმის აპარატურა. სტადიონს სხვა სჭირდება, სპორტის სასახლეს _ სხვა. მხოლოდ ტექნიკური სირთულეებიდან გამომდინარე მოგვიხდა სტადიონზე უარის თქმა.
_19 აპრილის აქციაზე რას იტყვით? პრემიერმაც განაცხადა, რომ აქვს ინფორმაცია, როგორ სთავაზობენ “ნაციონალური მოძრაობის” წევრები ფულს 19 აპრილის აქციაზე წასასვლელად.
_ ეგ ინფორმაცია მე თვითონ ნაციონალებისგან ვიცი, წამოსცდათ. მოკლედ გეტყვით _ ზოგს 1000 ლარს სთავაზობენ, ზოგს _ 200 ლარს. მაქვს ინფორმაცია, რომ კოორდინატორებს, რომელიც 5 ადამიანს მიიყვანს, 200 ლარი ერგება. ანუ თუ მეტს მიიყვან, მეტი შეგხვდება. ვინც ამ აქციაზე მიდის, სამშობლოს მოღალატეა, იმ წამების და მკვლელობების თანაზიარი, რომლებიც ქუჩაში ხდებოდა შსს-ს ხელით. ეს ჩემი პირადი აზრია და ვიცი ბევრი ადამიანი სწორედ რომ ასე ფიქრობს.
_ როგორ ფიქრობთ, რა სიურპრიზი აქვს ვანო მერაბიშვილს?
_ სავარაუდოდ, ბინძური პროვოკაცია იქნება. ყველას ვეუბნები, რომ რაც არ უნდა დიდი პროტესტი ჰქონდეთ ახალი ხელისუფლების მიმართ, არ მივიდნენ იქ, რადგან სწორედ ამას ელოდებიან ნაციონალები და მგონია, რომ ხალხი არ მივა. ისიც შეიძლება, რომ ერთმანეთში იჩხუბონ, თითქოს ხალხი დაესხა თავს.
_ თქვენი აზრით, პროვოკაციები იგეგმება?
_ ამის საფუძველი არსებობს, რადგან მაქვს ინფორმაცია, რომ ნაციონალები ოჯახებს არიდებენ საქართველოს. ისიც გავიგე, რომ იარაღის გამოყენებაზეც ჰქონიათ საუბარი. არ ვიცი, რა მოხდება, მაგრამ ერთი ქართველის სისხლიც რომ დაიღვაროს, არავის არ ვაპატიებთ.
_ თუ გაქვთ ინფორმაცია მოსალოდნელი პროვოკაციების შესახებ, რატომ არ აყენებთ საქმის კურსში საერთაშორისო ორგანიზაციებს?
_ საერთაშორისო ორგანიზაციებს ვერ აჯერებენ, რომ ნაციონალები ატყუებდნენ წლების განმავლობაში. ჩემთვის არ არის მთავარი, რას იტყვის სხვა, ჩემთვის მთავარია ხალხი არ გაიჭყლიტოს ისევ.
_ გამოსავალს რაში ხედავთ?
_ გამოსავალი ერთია _ სამართლიანობა უნდა აღდგეს.
_ გასაგებია, მაგრამ თუ ეს ყველაფერი რეალობაა და 19 აპრილს, როგორც თქვენ ამბობთ პროვოკაციის დროს შესაძლოა ტყვია გავარდეს, ეს ხომ დიდ დესტაბილიზაციას გამოიწვევს?
_ აი, მერე არ ვიცი, რას მოვიმოქმედებთ. ერთი ვიცი დანამდვილებით _ მე პირადად არავის ვაპატიებ დაღვრილ ქართულ სისხლს.
_ 21 აპრილს ბევრ ხალხს ელოდებით?
_ დიახ, რა თქმა უნდა. ყოველ დღე რეკავენ სხვადასხვა რაიონებიდან და ემზადებიან ჩამოსასვლელად. ხალხი ბევრი იქნება.
_ რა შედეგი დადგება 21-ის მერე?
_ დაინახავს ყველა, რომ ეს არის რეალურად ხალხის მოთხოვნა და არა ვიღაცის ახირება. ხალხის მოთხოვნა კი არის ის, რომ ყველა უნდა დაისაჯოს, ვინც მიიღო მონაწილეობა ამ ბინძურ საქმეებში. კიდევ ერთხელ მოვუწოდებ ყველას, 21 აპრილს, 14 საათზე, სპორტის სასახლეში მოვიდნენ და დადგნენ სიმართლის გვერდით.
