პრეზიდენტის ადმინისტრაციამ ეს ინფორმაცია მას შემდეგ გაავრცელა, რაც ქართული მედიაში სოციალურ ქსელებში შექმნილი “ტრაილერის” ისტორიის ცრუ თუ სხვადასხვა, გადაუმოწმებელ წყაროებზე დაყრდნობილი ვერსიები გაჩნდა.
“საზოგადოების დიდი ინტერესიდან გამომდინარე, განმარტებას ვაკეთებთ საქართველოს პრეზიდენტის ტრავმასთან დაკავშირებით:
თურქეთში მიხეილ სააკაშვილი ველოსიპედით ვარჯიშის დროს დაშავდა. მკურნალობა მას სტამბულის ამერიკულ ჰოსპიტალში ჩაუტარდა. პრეზიდენტს მარჯვენა მხრის სამმაგი მოტეხილობა დაუდგინდა, რის გამოც, კვირას ღამით დასჭირდა ქირურგიული ჩარევა.
საერთო ნარკოზის ქვეშ რამდენიმე საათიანი ოპერაცია მას თურქმა პროფესორმა მეჰმეთ დემირჰანმა გაუკეთა. ქირურგებმა მოტეხილობა მეტალის ფირფიტების ჩადგმით დააფიქსირეს, ჭრილობაზე კი ექიმებს 40 ნაკერის დადება მოუწიათ.
ჰოსპიტლის მედპერსონალის განცხადებით, ტრავმის სრულ რეაბილიტაციას თვეზე მეტი დრო დასჭირდება. საქართველოს პრეზიდენტმა თურქეთის ამერიკულ ჰოსპიტალში ინტენსიური მკურნალობის პირობებში 2 დღე გაატარა”, – ნათქვამია პრეზიდენტის ადმინისტრაციის განცხადებაში, რომელიც პრეზიდენტის ფეისბუქის გვერდზე გამოქვეყნდა.
მიუხედავად ამ განმარტებისა, დაზუსტებით ცნობილი არ არის, რა მოხდა სინამდვილეში. ტელეკომპანია “მეცხრე არხის” ინფორმაციით, იმ ამერიკულ ჰოსპიტალში, რომელშიც ოფიციალური ინფორმაციის მიხედვით უმკურნალეს პრეზიდენტს, პაციენტი მიხეილ სააკაშვილი რეგისტრირებული არ არის.
პრეზიდენტს, თურქეთში ვიზიტის დროს რამდენიმე პარლამენტარი ახლდა. მათ შორის იყო, დავით დარჩიაშვილი, რომელიც კვირის პალიტრისთვის მიცემულ ინტერვიუში აღნიშნავს, რომ პრეზიდენტის ველოსიპედიდან ჩამოვარდა:
“_ ბატონო დავით, პრეზიდენტთან ერთად იყავით, როდესაც მან ტრავმა მიიღო?
_ კვირა საღამოს უნდა გვქონოდა შეხვედრა, მანამდე ფეხბურთი ვითამაშეთ, რის მერეც პრეზიდენტს ველოსიპედით გავლა მოუნდა, ასეც მოიქცა, მაგრამ ჩვენ აღარ წავყევით, ნეტავ წავყოლოდით. ზუსტად რა და როგორ მოხდა, არ ვიცი, მაგრამ, ფაქტია, სერიოზული ტრავმა მიიღო.
_ საქართველოს პრეზიდენტის დაშავების თაობაზე ინფორმაცია თურქულმა პრესამ გაავრცელა, როგორც წერდნენ, პრეზიდენტი ველოსიპედით სეირნობისას “ტრაილერს” შეეჯახა.
_ არა, როგორც ვიცი, მსგავსი არაფერი მომხდარა. პრეზიდენტი ჩამოვარდა ველოსიპედიდან და ხელი სამ ადგილას მოიტეხა.
_ თურქეთის პრეზიდენტთან შეხვედრისას მიხეილ სააკაშვილი საკმაოდ ჯანმრთელად გამოიყურებოდა, რამაც გააჩინა ახალი ვარაუდი, რომ ის შესაძლოა არც დაშავებულა.
_ რა გითხრათ, მე საავადმყოფოში ვახლდი და ვიდრე საოპერაციოდ გაიყვანდნენ, სულ ერთად ვიყავით. ოპერაციამდეც კარგად ეჭირა თავი და მას მერეც ყველაფერი გააკეთა, რომ თურქეთის პრეზიდენტთან გადასახვევით არ მისულიყო. ძვალი სამ ადგილას იყო გატეხილი. უბრალოდ, იქ ძალიან კარგი ექიმები არიან. თაბაშირის ტექნოლოგიას აღარ იყენებენ და რაღაც ახალი ინოვაციური მეთოდით მკურნალობენ.
_ ჯერ ითქვა, რომ პრეზიდენტმა მხარი მოიტეხა, შემდეგ ითქვა, რომ ლავიწის ძვალი იყო გატეხილი, იქნებ დაგვიზუსტოთ, სად მიიღო ტრავმა?
_ ეს იყო ხელის ზედა ნაწილი, წინა მხარი ჰქვია, მგონი, სამედიცინო ენაზე რას ეძახიან, არ ვიცი.
_ ტრავმა მარჯვენა ხელზე მიიღო თუ მარცხენაზე?
_ მოიცა, გავიხსენო, მარჯვენაზე,” _ აღნიშნავს დარჩიაშვილი “კვირის პალიტრასთან” საუბარში.
მიუხედავად იმისა, რომ სააკაშვილს როგორც ამბობენ, სერიოზული ტრავმა აქვს, პრეზიდენტს შეხვედრები არ შეუწყვეტია და ამჯერად პოლონეთს სტუმრობს. აღსანიშნავია, რომ ბოლო ორი დღის განმავლობაში სხვადასხვა შეხვედრებზე სააკაშვილი სხვადასხვანაირად გამოიყურება _ ერთგან ხელი თაბაშირში აქვს, მეორეგან – არა, რაც საზოგადოებაში უპასუხო შეკითხვებს ამრავლებს.
საზოგადოების დიდი ნაწილი მიიჩნევს, რომ ეს საკითხი ბოლომდე უნდა გაირკვეს, რადგან საქმეს ქვეყნის პრესტიჟს ეხება. პუბლიცისტი ვასილ მაღლაფერიძე ამბობს, რომ საგარეო საქმეთა სამინისტრომ თურქეთის პოლიციიდან შესაბამისი ინფორმაცია აუცილებლად უნდა გამოითხოვოს.
ყოფილი საგარეო საქმეთა მინისტრი, სალომე ზურაბიშვილი კი აღნიშნავს, რომ რაც დღეები გადის, კითხვები გროვდება და “პასუხები უფრო და უფრო საეჭვოს ხდის მთელ ამ ოფიციალურ ვერსიას და მონაყოლს.”
“თურქეთი, პოლონეთი _ უპასუხო კითხვები! ვინ არის პასუხისმგებელი ქვეყანაში?
შაბათს, 6 აპრილს შეხვდა ერდოღანს სტამბულში და ქართველებს ბურსაში; კვირას 7 აპრილს ანტალიაში (რა უნდოდა ანტალიაში?!) ველოსიპედით დაშავდა; კვირა ღამეს გადმოიყვანეს სტამბულში ამერიკულ ჰოსპიტალში და ოპერაცია ღამე ჩაუტარეს ” მრავალ საათიან ანესთეზიით”, რკინის ნაწილების ჩასმით და 40 ნაკერით, ანუ სერიოზული ოპერაცია….
სამშაბათს, 9-ში შუადღეს სადილზეა გიულთან, როცა სურათია გადაღებული. პრეს სამსახური იძახის, რომ ორი დღე იწვა საავადმყოფოშიო. ანუ, სამშაბათსაც უნდა ყოფილიყო. ეს კი, იმ ნაოპერაციებ ხელს თავისუფლად ართმევს გიულს! და პოლონეთის კადრები კიდევ უფრო საოცარია …. საკვირველია რომ თურქულ მხრიდან არავითარი განცხადება არ გაკეთებულა. უცხო ქვეყნის პრეზიდენტს ოპერაციას უტარებენ თან ხანგრძლივ ანესთეზიის ქვეშ (პრეზიდენტის ადმინისტრაციის სიტყვებით) და იმის შესახებ თუ ვინ უტარებს ოპერაციას და როდის თურქული მხრიდან სიჩუმეა?! საკითხავია, პასუხისმგებლობა, რამე რომ მომხდარიყო ვის ეკისრებოდა?
რაც დღეები გადის კითხვები მეტი გროვდება და პასუხები კი უფრო და უფრო საეჭვოს ხდის მთელ ამ ოფიციალურ ვერსიას და მონაყოლს …. არაფერი რომ არ ვთქვათ მისივე პოლიტიკურ გუნდის განცხადებებზე რომლებიც გვიმტკიცებენ სააკაშვილის არაჩვეულებრივი გამოჯანსაღების თვისებები ჰქონია!
ეს კითხვები ანეკდოტური არაა. აქ ლაპარაკია პრეზიდენტზე (ჯერ კიდევ), რომელიც უცხო ქვეყანაში ავარიაში ან სხვა გაურკვეველ სიტუაციაში აღმოჩნდა ისე, რომ მოსახლეობას არ ამცნეს ეს ვითარება. ანესთეზიას მუდამ თან ახლავს გარკვეული საფრთხეები და ნორმალურ ქვეყნებში ასეთ ვითარებაში ოფიციალური განცხადება კეთდება მაშინვე და ზომები მიღებულიც უნდა იყოს იმის შესახებ, თუ ვინ ასრულებს მოვალეობას ჯერ ერთი ანესთეზიის დროს და შემდეგ კი იმ შემთხვევაში, რამე რომ მოუვიდეს. ბოლოს და ბოლოს, სხვა თუ არაფერი, ის არის მთავარ სარდალი, ომის გამოცხადება და ქვეყნის დაცვა მას ევალება (ეს ხომ კარგად გამოვცადეთ!). ასეთი უპასუხისმგებლო მიდგომა თავისი გარემოცვის (ისიც არ ვიცით ვინ ახლდა თან ანტალიაში და ვინ მიიღო პირველივე გადაწყვეტილება ოპერაციის შესახებ) და შემდგომ უკვე თვით პრეზიდენტის ქვეყნის და თავისი მოვალეობების მიმართ წარმოადგენს მიუღებელ გულგრილობას და გარკვეულ წილად საფრთხესაც მოიცავს ქვეყნისთვის,” _ აღნიშნავს ზურაბიშვილი სოციალურ ქსელ ფეისბუქში.
