_ იქნებ, კონკრეტულ ფაქტზე გვითხრათ, რას ან ვის გულისხმობთ?
_ გეტყვით. მოქალაქეები იყვნენ ნარკოლოგიური ტესტის შემოწმებაზე მისული, რომელთა მიმართ, პოლიციის მხრიდან არაადეკვატური საქციელი იქნა ჩადენილი. ის, რის წინააღმდეგაც ვიბრძოდით ამდენი წელი, კვლავ მეორდება?
_ რას გულისხმობთ ?
_ რას ვგულისხმობ და პოლიციის მხრიდან ცემის ფაქტებს ჰქონდა ადგილი! კონკრეტული პოლიციელის სახელისა და გვარის დასახელებისგან თავს შევიკავებ. მე მაქვს ეს ინფორმაცია და თუ ასეთი ფაქტებს სასწრაფოდ არ აღმოვფხვრით, არაფრით შეიძლება. არიან თვითმხილველები და მოწმეები, რომლებიც ამას დაადასტურებენ. ეს არის ახალი ინფორმაცია, _ ეს განცხადება ოზურგეთის მაჟორიტარმა დეპუტატმა ზვიად კვაჭანტირაძემ “გურია ნიუსთან” ორი თვის გააკეთა.
ამ ინფორმაციის გამოქვეყნებას, ჩვენი წყაროს ინფორმაციით, შსს მინისტრიდან მალევე მოჰყვა რეაგირება, რის შემდეგაც, მეორე დღესვე, მაჟორიტარმა ახალი განცხადება გააკეთა.
“ჩემი ინტერვიუს გამოყენებას საზოგადოებაში რაღაც ეჭვების გასაჩენად ვაპროტესტებ. ბევრი ადამიანი მეკითხება და მთხოვს, რომ დავაზუსტო ჩემი პოზიცია. ვფიქრობ, არაა საჭირო საქმის ისე წარმოჩენა, თითქოს მე ვაკრიტიკებ შსს-ს ზოგადად. ეს ტყუილია. სულაც პირიქით, ირაკლი ღარიბაშვილის მუშაობის სტილს და შედეგებს ყოველთვის მაღალ შეფასებას ვაძლევდი.
გულწრფელად გითხრათ, არ უნდა გაგვიკვირდეს, თუ ვინმე თავის ადგილზე რაღაც გადაცდომებს ან თუნდაც შეცდომებს უშვებს. ასეთი ფაქტი შეიძლება ნებისმიერ სამინისტროში და უწყებაში მოხდეს, _ ეს განცხადება ოზურგეთის მაჟორიტარმა დეპუტატმა ზვიად კვაჭანტირაძემ საკუთარ “ფეისბუქზე” მას შემდეგ გააკეთა, რაც მისი ინტერვიუ “პოლიციის მხრიდან ცემის ფაქტებს ჰქონდა ადგილი!“ გამოქვეყნდა.
როგორც გავარკვიეთ საქმე ეხება, ოზურგეთის მუნიციპალიტეტის სოფელ გურიანთაში მცხოვრებ მ.ბ-ს, რომელიც თბილისში მუშაობს და რამდენიმე დღით თავისი ახლობლის გასვენებაში, სოფელ გურიანთაში იმყოფებოდა. სამართალდამცავებმა მისი აყვანა სწორედ გასვენებაში, მეზობლებისა და ახლობლების თანდასწრებით სცადეს, ნარკოლოგიური ტესტირების შემოწმების მიზნით. როგორც “გურია ნიუსს” მ.ბ.-ს ოჯახის წევრებმა განუცხადეს, ის არ იმყოფებოდა ნარკოტიკის ზემოქმედების ქვეშ, რის შემდეგაც სამართალდამცავებმა სახლში გამოუშვეს, თუმცა როგორც ოჯახის წევრები აცხადებენ, ის საშინელი ნაცემი იყო.
_ კბილები სულ დასისხლიანებული ჰქონდა, სახე დასივებული, ვერ აღგიწერთ რა მდგომარეობაში იყო, საშინლად ნაცემი იმის გამო, რომ პოლიცილები თხოვდნენ ეთქვა სად იმყოფებოდა მისი ძმა, რომელიც სამართალდამცავებს უნდა აეყვანათ. მან განუცხადა, რომ არ იცოდა სად იყო მისი ძმა, ამის გამო სამართლადამცავებსა და მ.ბ. -ს შორის სიტყვიერი შეურაცხყოფა ფიზიკურ დაპირისპირებაში გადაზრდილა, _ გვითხრეს მ.ბ-ს ოჯახის წევრებმა, რომლებმაც გამოძიებას ჩვენება მისცეს პოლიციელების წინააღმდეგ.
აღნიშნულ ფაქტთან დაკავშირებით, ოზურგეთის რაიონულ პროკურატურაში გამოძიება დაიწყო.
_ მოქალაქე მ.ბ -თან დაკავშირებით, დაიწყო წინასწარი გამოძიება, სსკ. 333 -ე მუხლით, რაც ითვალისწინებს სამსახურეობრივ უფლებამოსილების გადამეტებას. ფაქტზე დაიწყო წინასწარი გამოძიება, ამ ეტაპზე მიმდინარეობს მოწმეების დაკითხვა, თავად ბ.მ. ჯერ არ დაკითხულა, ის არ გამოცხადებულა პროკურატურაში. მისი და როგორც სხვა მოწმეების დაკითხვის შემდგომ საქმეზე მიღებული იქნება საბოლოო გადაწყვეტილება, გამოძიების დასრულების შემდგომ მიიღება კანონის შესაბამისი გადაწყვეტილება. სხვა ინფორმაციას ამ ეტაპზე გამოძიების ინტერესებიდან გამომდინარე, ვერ გეტყვით, _ განგვიცხადა პროკურორმა კახა კოჩივარმა.
