საკრებულოს ახალი უმრავლესობა თავმჯდომარის პოსტზე სავარაუდოდ ფრაქცია “თავისუფლების” თავმჯდომარე ირაკლი შიხიაშვილის კანდიდატურას წარადგენს.
გუშინ ფრაქცია “ქართული ოცნება – თბილისელების” თავმჯდომარემ გულიკო ზუმბაძემ განაცხადა, რომ შიხიაშვილის კანდიდატურას მხარს არ დაუჭერს, რადგან იგი შინაგან საქმეთა სამინისტროს მიერაა შერჩეული.
შიხიაშვილი ერთ-ერთია მათ შორის, ვინც “ქართუ ბანკის” გაკოტრების ზურაბ ადეიშვილისეული გეგმის გახორციელებაში მიიღო მონაწილეობა. დღეს მას მოწმის სტატუსი აქვს, მაშინ როდესაც ანალოგიური ქმედებისთვის ბიზნესმენი ლაურა ღაჭავა და სხვები საბრალდებო სკამზე სხედან.
“გურია ნიუსმა” “ქართუ ბანკის” გაკოტრების საქმეზე ირაკლი შიხიაშვილის ჩვენება მოიპოვა. 2012 წლის 3 დეკემბერს შს სამინისტროში მოწმის სახით დაკითხულმა შიხიაშვილმა განაცხადა:
“2007 წლიდან ვარ სს “ეკრანის” მფლობელი, მაგრამ რადგანაც ვიყავი და ვარ საჯარო სამსახურში , ჩემი წილი გადაფორმებული მაქვს ჩემს მეგობარზე გიორგი ბაღაშვილზე, რომელიც მთლიანად უძღვება სამეწარმეო საქმიანობას და ამავე დროს არის “ეკრანის” სამეთვალყურეო საბჭოს თავმჯდომარე. ჩემი წილი იყო 76%, 20 % -ის მფლობელია ბრიტანეთის მოქალაქე შანი პოპადი, ხოლო დარჩენილი 4 % რამდენიმე პიროვნებაზე გადანაწილებული
2011 წლის ნოემბრის ბოლოს დამირეკა შემოსავლების სამსახურის უფროსმა ჯაბა ებანოიძემ და მითხრა, რომ მივსულიყავი მასთან სამსახურში. იმავე დღეს მას თავის სამუშაო ოთახში შევხვდი, საუბრისას ვიმყოფებოდით მარტო მე და ებანოიძე, რა დროსაც მითხრა, რომ იგეგმებოდა “ქართუ ბანკის” გაკოტრების სქემა, რომლის საშუალებითაც აღნიშნული ბანკის მევალეებს სესხი არ უნდა დაებრუნებინათ ბანკისთვის. ჯაბა ებანოიძე თვითონ ამ საკითხით შეწუხებული იყო და მითხრა, რომ ყოველივე ეს იყო ზურაბ ადეიშვილის იდეა და უშუალოდ ზურაბ ადეიშვილისგან ჰქონდა დავალება მიღებული. მისი განმარტებით მიზანი იყო “ქართუ ბანკის ” გაკოტრება და პოლიტიკური მოძრაობა “ქართული ოცნების” დაფინანსების წყაროს გადაკეტვა. აქედან გამომდინარე სქემა იყო შემდეგნაირი: იმ კომპანიებს, რომლებსაც გააჩნდათ სესხი “ქართუ ბანკში” სახელმწიფოს წინაშე საგადასახადო ვალი უნდა ეღიარებინათ ” ქართუ ბანკიდან” სესხის გამოტანის პერიოდამდე არარსებული დავალიანება , თითქოს კომპანიას ჰქონდა დავალიანება, რომელიც მოგვიანებით აღმოაჩინა და დაზუსტებული სახით მიაწოდებდა დეკლარაციას შემოსავლების სამსახურს. რისთვისაც მითხრა , რომ კანონში უკვე შესული იყო ცვლილება და ამ ცვლილების მიხედვით შესაძლებელი ხდებოდა კომპანიებზე დაკისრებული არარსებული დავალიანების გამო მათი ქონების მიქცევა სახელმწიფო საკუთრებაში და შემდეგ “ქართუ ბანკი” დარჩებოდა გაცემული სესხების უზრუნველყოფის გარეშე. ჯაბა ებანოიძემ საუბრისას მითხრა, რომ მას სხვა გამოსავალი არ ჰქონდა, მაგრამ მითხრა თავს ზემოთ ძალა არ არისო. მან ამიხსნა რომ ამ სქემის მიხედვით მას შემდეგ რაც ქონება გადავიდოდა აუქციონზე შემოსავლების სამსახურის მოთხოვნით, იგი აუქციონზე არ გაიყიდებოდა მისი დიდი ვალის გამო. შემდეგ ამ ქონებას ნატურის წესით წაიღებდა ეკონომიკის სამინისტრო და შემდეგ ეს სამინისტრო პრეზიდენტის ბრძანებულების საფუძველზე პირდაპირი მიყიდვის წესით გადასცემდა ჩვენთვის სასურველ კომპანიებს. აღნიშნულზე ვკითხე, თუ ამაზე ვინმე არ დათანხმდებოდა, რა იქნება მეთქი? რაზეც მიპასუხა , თუ კომპანიის მიერ დეკლარაციის დაზუსტების დროს სისხლის სამართლის პასუხისმგებლობა არ დგებოდა, საგადასახადო შემოწმების დროს 25 ათას ლარზე ზემოთ დავალიანების აღმოჩენის შემთხვევაში სისხლის სამართლებრივი პასუხისმგებლობა დგებაო. აღნიშნულით ჯაბა ებანოიძემ მანიშნა, რომ თუ მე ამ საქმეს არ გავაკეთებდი, შესაძლებელი იქნებოდა კომპანიაზე დაწყებულიყო ზეწოლა, რასაც მოყვებოდა სისხლის სამართლებრივი დევნა. ამის შემდეგ ჩემთვის ყველაფერი გასაგები გახდა და ვინაიდან არ მქონდა საშუალება მომენტალურად დამეფარა “ქართუ ბანკის” ვალი, ჯაბა ებანოიძეს განვუცხადე თანხმობა , მაგრამ იქვე დავაფიქსირე, რომ ” ქართუ ბანკის” ვალს გადავიხდიდი, როგორც კი საშუალება მექნებოდა, რაზეც ებანოიძემ მიპასუხა, შენი ნებაა, როგორც გინდაო. ამის შემდეგ წამოვედი ჯაბა ებანოიძისგან და რამოდენიმე დღეში დამირეკეს როგორც მახსოვს იყო ვინმე ოთარი შემოსავლების სამსახურიდან. მე და გიორგი ბაღაშვილი მივედით შემოსავლების სამსახურში, სადაც შევხვდით ოთარს და მამუკას, მე მათ გავაცანი ბაღაშვილი და იგი შემდგომ ურთიერთობდა მათთან. როგორც შემდეგ გიორგიმ მითხრა, მან იმ სქემის მიხედვით როგორც იქ უთხრეს ძველი თარიღით დააზუსტა სს “ეკრანის” დეკლარაცია და დეკლარაციაში შეიტანა არარსებული დავალიანება, რომელმაც შეადგინა დაახლოებით 4 მილიონი ლარი საურავების ჩათვლით. ამის შემდგე ქონება გავიდა აუქციონზე გასაყიდად, არ გაიყიდა და ეკონომიკის სამინისტრომ წაიღო ნატურის სახით. 2012 წლის თებერვლის თვეში დამირეკა ეკონომიკის სამინისტროს პრივატიზების დეპარტამენტის უფროსმა გიორგი ხოდელმა და მითხრა, რომ მივსულიყავი მასთან სამსახურში, რათა სს”ეკრანის” ქონების გადმოფორმება მომხდარიყო ჩემთვის სასურველ ახალ შპს-ზე. ეკონომიკის სამინისტროში მივედი და მივიყვანე გელა დავაძე, სადაც შედგა დოკუმენტი სს “ეკრანის” ყოფილი ქონების შპს “კოლოსზე” გადმოფორმების შესახებ გარკვეული ვალდებულებებით, რაზედაც გელა დავაძემ მოაწერა ხელი და ამის შემდეგ მე და გელა წამოვედით ეკონომიკის სამინისტროდან.
მოგახსენებთ რომ მანამდე შემოსავლების სამსახურის მითითებით ჩემი მეგობრის გელა დავაძის სახელზე დავაფუძნე შპს “კოლოსი” (100% წილი) . შპს “კოლოსზე” სს “ეკრანის” ქონების გადმოფორმების შემდეგ დაეკისრა 67 ათასი ლარის ვალდებულება სახელმწიფოს წინაშე”.
შიხიაშვილის ჩვენებით, სს “ეკრანმა” 2011 წელს, “ქართუ ბანკიდან” 400 000 აშშ დოლარის სესხი აიღო, 2012 წლის დეკემბრისთვის დავალიანება 460 000 აშშ დოლარს შეადგენდა.
“გურია ნიუსთან” საუბარში ირაკლი შიხიაშვილმა სს “ეკრანთან” კავშირი და სესხის აღება საერთოდ უარყო: “არასდროს არ ვყოფილვარ ბრალდებული და არც ვაპირებ ვიყო ბრალდებული იმაში, რაც არ ჩამიდენია. არანაირი კავშირი არ მქონია ბანკთან, არც არაფერი გამიტანია და არც არაფერი გამიფლანგავს.”
გავრცელებული ინფორმაციით, შიხიაშვილს შს სამინისტროს გენინსპექციის უფროსი ზვიად ჯანყარაშვილი მფარველობს, რომელიც თამაზ თამაზაშვილის დიშვილია. შიხიაშვილი ჯანყარაშვილთან მეგობრობას ადასტურებს, მისი მხრიდან ლობირებას _ არა: “აბსურდია ესეც. ზვიად ჯანყარაშვილი ჩემი მეგობარია დაახლოებით 10 წელიწადია და იმ პერიოდში, როდესაც პირველ ოქტომბრამდე ზვიადი ებრძოდა ნაცმოძრაობას და კარგად იცით რა მდგომარეობაშიც იყო მათი ოჯახი და შესაბამისად, რა მდგომარეობაში მოხვდებოდა ჩემი ოჯახი. არანაირი სხვა ფორმის დამოკიდებულება ჩვენს შორის არ არსებობს და ამაზე კომენტარს არ ვაკეთებ.”
