იმის შესახებ, თუ რა გაკეთდა ამ ერთ თვეში, რა სტრუქტურული ცვლილებები გახორციელდა კულტურის ცენტრში, რა სიახლეები იგეგმება, გია ქურიძემ პრესკონფერენციაზე ისაუბრა.
თავდაპირველად ქურიძემ ჟურნალისტებს გააცნო თავისი მოადგილეები: დავით რამინაშვილი, გია იმნაიშვილი და თამილა წილოსანი.
დავით რამინაშვილი ახალი თანამშრომელია და მან სოფიკო ჭელიძის დროინდელი მოადგილე თათია რუსეიშვილი ჩაანაცვლა. ახალმა დირექტორმა თათიას კონცერტებისა და ღონისძიებების ორგანიზატორობა დაავალა, თუმცა, ანაზღაურება იგივე დაუტოვა. თავად რუსეიშვილი ამბობს, რომ ამაზე ორივე მხარე შეთანხმდა და ის იმ საქმეს აკეთებს, რაც იცის და უყვარს.
“არავინ გაგვიშვია სამსახურიდან. ვინც წავიდა, მხოლოდ თავისი ნებით _ ასეთი სულ სამი ადამიანია ყოფილი დირექტორის ჩათვლით. იმ ორს მართლა ძალიან ვეხვეწეთ, რომ არ წასულიყვნენ. 13 ახალი კადრი მივიღეთ, თუმცა ეს ყველაფერი იმიტომ მოხდა, რომ თეატრალური დასი ავაღორძინოთ”, _ აღნიშნა გივი ქურიძემ.
მისი თქმით, სახალხო თეატრის გვერდით, რომელსაც უშუალოდ თავად უხელმძღვანელებს, იარსებებს ახალგაზრდული დასი, რომლის ხელმძღვანელი ირმა მენაღარიშვილი იქნება.
“კულტურის ცენტრთან არსებობს სიმღერისა და ცეკვის ფოლკლორული ანსამბლი, ასევე სამეჯლისო ცეკვების სტუდია, არსებობს ფოლკლორისა და გალობის სკოლა, რომელიც მოსწავლეებს სექტემბრიდან მიიღებს და რომელსაც “შავნაბადას” ხელმძღვანელი დათო ცინცაძე ხელმძღვანელობს”, _ თქვა ქურიძემ.
კულტურის ცენტრი სეზონს 27 სექტემბერს გახსნის: “ეს დღე სოხუმის დაცემის დღეა. სეზონი “ტყვიის ძმებით” უნდა გავხსნათ და პატივი მივაგოთ იმ ბიჭებს, საქართველოსთვის რომ გაწირეს თავი. სახალხო თეატრს მზად აქვს “ჩემი დროის გურია”, ახალგაზრდული დასი კი ლაშა თაბუკაშვილის პიესას _ “მერე რა, რომ სველია სველი იასამანი” ამზადებს. ძალიან გვინდა ოქტომბრის ბოლომდე, ანუ არჩევნებამდე მოვასწროთ ერთობლივი კონცერტის ჩატარება, ისე რომ, სცენაზე ლანჩხუთელი ხელოვანები იდგნენ,” _ ითქვა პრესკონფერენციაზე.
გივი ქურიძის თქმით, კულტურის ცენტრში იარსებებს შვიდი კაცისაგან შექმნილი სამხატვრო საბჭო, რომელიც ერთგვარ კონტროლს გაუწევს ყველაფერს და მათ შორის, ფინანსებსაც.
