იგი იუსტიციის პირველი მინისტრია საქართველოში, ვინც სამართლის საკითხებისადმი მიძღვნილ ლუქსემბურგის ტრადიციულ მინისტერიალის მუშაობაში აღმოსავლეთის პარტნიორობის ქვეყნების იუსტიციის მინისტრებთან ერთად მიიწვიეს.
მინისტერიალი დღეს ევროკავშირის თავმჯდომარე ქვეყნის − ლიტვის, იუსტიციის მინისტრისა და ევროკომისიის სამართლის გენერალური დირექტორატის ინიციატივით გაიმართა. მაღალი დონის შეხვედრას ლიტვის იუსტიციის მინისტრი იოზას ბერნატონისი თავმჯდომარეობდა.
მინისტერიალზე სიტყვით გამოსვლისას საქართველოს იუსტიციის მინისტრმა სამართლის სფეროს იმ რეფორმებზე ისაუბრა, რომელთაც იუსტიციის სამინისტრო უდგას სათავეში.
“ეს არის უმნიშვნელოვანესი შეხვედრა ვილნიუსის სამიტამდე და მადლობას ვუხდი ლიტვის იუსტიციის მინისტრს აქ ჩვენი მოწვევისთვის. ჩემი სამინისტრო სათავეში უდგას სამართლის სისტემის რეფორმას. ჩვენ ვმუშაობთ იმისათვის, რომ ქართული კანონმდებლობა ევროპულ სტანდარტებთან მოვიყვანოთ შესაბამისობაში,” _ განაცხადა თეა წულუკიანმა.
მისი თქმით, საქართველოში უკვე განხორციელდა მართლმსაჯულების სისტემის პირველი ტალღა, მეორე ტალღაზე კი ახლა მიმდინარეობს მუშაობა. მინისტრი თავის გამოსვლაში, ასევე, შეეხო “სისხლის სამართლის საპროცესო კოდექსში” ცვლილებებს, არასრულწლოვანთა მართლმსაჯულებასა და პროკურატურის რეფორმას.
“საქართველოს მთავარმა პროკურატურამ მიიღო მაღალი ხარისხის დამოუკიდებლობა. როგორც პოლიტიკური ფიგურა, აღარ ვერევი ინდივიდუალურ სისხლის სამართლის საქმეებში, პროკურატურის საკადრო პოლიტიკაში და სხვ. მთავარი პროკურორი ჩვენი ხელისუფლების პირობებში რეალურად გახდა ქვეყნის პირველი პროკურორი,” _ აღნიშნა მინისტრმა.
თეა წულუკიანმა ცალკე გამოსვლა დაუთმო მონაცემთა დაცვის ინსპექტორის ინსტიტუტს საქართველოში და ნარკოპოლიტიკას.
“საქართველოში უკვე დაიწყო მუშაობა პერსონალურ მონაცემთა დაცვის ინსპექტორმა. ეს ინსტიტუტი ახლა იდგამს ფეხს საქართველოში და ჩვენ ვმუშაობთ მის გასაძლიერებლად. რაც შეეხება ნარკოპოლიტიკას, საქართველო გეგმავს, გააძლიეროს პრევენციული ღონისძიებები, იმუშაოს მართლშეგნების ამაღლებაზე, დააზუსტოს ნარკოტიკულ საშუალებათა სიები. ვმუშაობთ პროგრამებზე, რათა დავიცვათ ახალი თაობა ნარკოტიკებისაგან; მათ, ვინც უკვე დაავადებულია ამ სენით, დახმარება აღმოვუჩინოთ, ხოლო ნარკორეალიზატორების წინააღმდეგ ბრძოლა და სანქციები კიდევ უფრო გავამკაცროთ,” _ განაცხადა მინისტრმა.
თეა წულუკიანმა თავისი გამოსვლის დასასრულს ევროკავშირისა და აღმოსავლეთის პარტნიორობის იუსტიციის მინისტრები საქართველოში მიიწვია.
მინისტერიალზე აღმოსავლეთის პარტნიორობის ყველა ქვეყნის მინისტრი წარდგა მოხსენებით. სხვა საკითხებთან ერთად მინისტერიალზე პირადი მონაცემების დაცვისა და ნარკოტიკების წინააღმდეგ ბრძოლის მიმართულებით არსებული სიახლეებიც მიმოიხილეს. სამუშაო დღის ბოლოს კი დეკლარაცია მიიღეს.
ევროკავშირი იუსტიციის მინისტრების შეხვედრას 1961 წლიდან ყოველწლიურად აწყობს ლუქსემბურგში. აღნიშნული შეხვედრა სამართლის საკითხებისადმი მიძღვნილ ყველაზე მნიშვნელოვან ფორუმად ითვლება ევროპაში. ევროკავშირის იუსტიციის მინისტრები ყოველწლიურად იკრიბებიან, რათა სამართლის საკითხებზე იმსჯელონ და ძირითადი მიმართულებები შეათანხმონ.
საქართველოს იუსტიციის მინისტრმა ლუქსემბურგის მინისტერიალზე მიწვევა ვილნიუსში ოფიციალური ვიზიტისას ლიტვის იუსტიციის მინისტრისგან მიიღო. მისივე ინიციატივით, ლუქსემბურგის მინისტერიალს აღმოსავლეთის პარტნიორობის ყველა ქვეყნის იუსტიციის მინისტრი დაესწრო და შესაძლებლობა მიეცათ, თავიანთი ქვეყნის სამართლის სფეროს რეფორმებსა და ძირითად მიმართულებებზე ესაუბრათ.
თეა წულუკიანთან ერთად მინისტერიალს იუსტიციის მინისტრის მოადგილე გოჩა ლორთქიფანიძე ესწრებოდა.
