საქართველოს კულტურისა და ძეგლთა დაცვის სამინისტროს მხარდაჭერით, წელს Vienna Fair – ზე, ქართული პავილიონი გაიხსნა. უნდა აღინიშნოს, რომ ბაზრობა მოიცავს სხვადასხვა ქვეყნების პავილიონებსა და გამოფენებს, დისკუსიებს თანამედროვე ხელოვნების შესახებ, გალერისტების და კოლექციონერების შეხედულებების გაზიარებას თანამედროვე ხელოვნების შესახებ.
ფორუმზე თითოეული ქვეყანა წარმოადგენს სხვადასხვა თაობის და სხვადასხვა მედიაში მომუშავე თანამედროვე ხელოვანებს. საქართველოს მხრიდან ფორუმში მონაწილეობას იღებენ ის ქართველი არტისტებიც, რომლებიც ამჯერად ვენაში ცხოვრობენ და საქმიანობენ.
გამოფენის მონაწილეები არიან: მარიკა ასათიანი, ნათელა გრიგალაშვილი, ანდრო ერაძე, გიორგი ხანიაშვილი, ნინო ქვრივიშვილი, მამუკა ჯაფარიძე, კოკა რამიშვილი, კოტე სულაბერიძე, მაია სუმბაძე, გიორგი ოქროპირიძე, გია რიგვავა, თამუნა სირბილაძე, თათია სხირტლაძე; კურატორები კი კრისტინა შტაინბრეხერ პფანდი და ირინა პოპიაშვილი.
ვენაში ქართული გამოფენა “ჩვენი კავკასიონი” თავისი კონცეფციით თენგიზ აბულაძის მიერ 1976 წელს გადაღებულ ფილმს “ნატვრის ხეს” ეხმაურება. გამოფენა მოიცავს ერთმანეთისგან სრულიად განსხვავებულ, სხვადასხვა თაობის მხატვართა ნამუშევრებს, რომლებიც განსხვავებულ მედიაში მუშაობენ – თუმცა როგორც “ნატვრის ხის” პერსონაჟებს, მათაც ერთი საერთო აქვთ, ისინი ყველანი ერთ “სოფელში” ცხოვრობენ.
13 ოქტომბერს, გამოფენის დახურვას ვენის თანამედროვე ხელოვნების ფორუმზე საქართველოს კულტურისა და ძეგლთა დაცვის მინისტრი გურამ ოდიშარია დაესწრება.
