და ამბობს, რომ აღნიშნულმა პიროვნებებმა მას სიტყვიერი, შემდეგ კი ფიზიკური შეურაცხყოფა მიაყენეს.
გვილავას სიტყვებს პროვოკაციას უწოდებს აბაშის მაჟორიტარი და აცხადებს, რომ “ქართული ოცნების” წარმომადგენელი თავად ცდილობდა საპრეზიდენტო კანდიდატის, დავით ბაქრაძის შეხვედრის ჩაშლას აბაშაში და ყველა იქ მისულ ადამიანს სიტყვიერ შეურაცხყოფას აყენებდა, თავად მაჟორიტართან კი ბეისბოლის “ბიტით” შეიარაღებული ცდილობდა საქმე “გაერჩია”. დარცმელიძე ამბობს, რომ ასეთი მეთოდებით “ქართული ოცნების” წარმომადგენლები აბაშაში სასურველ შედეგს ვერ მიაღწევენ.
“ქართული ოცნების” და “ნაციონალური მოძრაობის” წევრებს შორის მომხდარი ინციდენტის შემდეგ “გურია ნიუსი” გიორგი გვილავას დაუკავშირდა.
გიორგი გვილავა: _ გუშინ აბაშაში ბაქრაძე იყო მოსახლეობასთან შესახვედრად ჩამოსული. როგორც ამბობენ, შეხვედრას დაახლოებით 100 კაცი ესწრებოდა. ჩემი აზრით, ბაქრაძისგან საყვედური მიიღეს პარტიის წევრებმა და ამან გამოიწვია აგრესია.
_ ადრე თუ ჰქონდა ანალოგიურ შემთხვევას ადგილი?
_ მე მათთან არასდროს არ მქონია შეხება, ყოველთვის თავს ვარიდებ, რადგან არ მინდა საქმე დაპირისპირებამდე მივიდეს.
_ დათო დარცმელიძე აცხადებს, რომ ცდილობდით ბაქრაძესთან მოსახლეობის შეხვედრისთვის ხელი შეგეშალათ და იქ მისულ ადამიანებს შეურაცხყოფას აყენებდით.
_ შეხვედრის დროს საერთოდ არ ვყოფილვარ ქალაქში. ჩემი პარტიის წევრს მანქანა გაუფუჭდა ერთ-ერთ სოფელში და მის დასახმარებლად წავედი. მეტსაც გეტყვით, ბაქრაძის დასახვედრად რომ ემზადებოდნენ, ქალაქის ცენტრში გაკრულ გიორგი მარგველაშვილის პლაკატებს ყველგან ბაქრაძის პლაკატები გადააკრეს. ახალგაზრდული ფრთის წევრებმა მოინდომეს ისევ მარგველაშვილის პლაკატები გაეკრათ, მაგრამ მე არ გავუშვი, არ მინდოდა რაიმე ინციდენტი მომხდარიყო. ქალაქში რომ ჩამოვედი დედაჩემისთვის ბილეთის ასაღებად შევედი და სწორედ ამ დროს დამირეკა მეზობელმა, შენს სახლთან ხმაური და ჩოჩქოლიაო. მაშინვე წავედი სახლში. იქ არავინ იყო. მერე ქუჩაში მეზობლები გადმოვიდნენ, დედაჩემიც და მათ მითხრეს, რომ აბაშის მაჟორიტარი დეპუტატი დავით დარცმელიძე, პოლიციის ყოფილი უფროსი კობა მსხილაძე და სერგო ხოშტარია ყოფილან და გინებით აუკლიათ იქაურობა, თან, გვილავა გარეთ გამოეთრიეო, ყვიროდნენ, თურმე. ამ დროს მანქანა დიდი სისწრაფით მოგვიახლოვდა, კინაღამ ჩემს მანქანას შეეჩეხა. იქიდან ეს პიროვნებები გადმოვიდნენ. მთვრალები იყვნენ, მაგინებდნენ მე, “ოცნებას”, მეზობლებს და მერე ფიზიკურ შეურაცხყოფაზე გადმოვიდნენ, ქურთუკი შემომახიეს. ამ დროს პოლიციაც მოვიდა.
_ დარცმელიძე ამბობს, რომ ბეისბოლის “ბიტით” ემუქრებოდით შეხვედრის დროს.
_ ტყუილია, აერია რაღაც. პოლიცია რომ მოვიდა, კობა მსხილაძე სადღაც გაიქცა. დარცმელიძე და ხოშტარია დარჩნენ. მე ვეუბნებოდი, დეპუტატი ხარ, არ გრცხვენია, რას აკეთებ,-მეთქი და თან ვცდილობდი, ტელეფონით გადამეღო. ამან გააღიზიანა ისინი და ისევ ჩემსკენ წამოვიდნენ, მაგრამ ისეთი მთვრალები იყვნენ, ფეხი დაუცდათ და წაიქცნენ. მერე მსხილაძე მოვიდა მანქანით, ხელში რაღაც ეჭირა. ზოგმა, იარაღიაო, იყვირა, ზოგმა _ ხელკეტიო. მეც დავინახე, რომ დასაკეცი ხელკეტი და მერე ხმაც გავიგე რაღაცას რომ ურტყამდა. ბოლოს ჩასხდნენ მანქანაში და წავიდნენ.
_ პოლიციამ არ დააკავა?
_ პოლიციას დევნა არ განუხორციელებია. მოკვლევა ჩაატარეს, მეც დამკითხეს, მეზობლები და თვითმხილველები. 10-მდე ადამიანია დაკითხული და საქმე აღიძრა ხულიგნობის მუხლით.
_ გიორგი, პოლიციის თანამშრომლებზე რას იტყვით?
_ ნამდვილად კანონის შესაბამისად მოქმედებდნენ, საკმაოდ მაღალი პროფესიონალიზმიც გამოავლინეს, ვერაფრით ვიტყვი, რომ ვინმეს მხარეს იჭერდნენ და რაიმე არ გაუკეთებიათ.
_ და მაინც, რას უკავშირებთ ამ ინციდენტს?
_ აგონიაში არიან. იციან, რომ ვერ გაიმარჯვებენ. ის ადამიანებიც კი, რომლებიც მხარს უჭერდნენ, აღარ ემხრობიან. ამას წინათ სოფელ ზანათში ვიყავი. შეხვედრაზე ერთი გოგო მოვიდა, რომელიც “ნაციონალი” ყოფილა, მაგრამ ახლა როგორც გვითხრა, კარგად დაინახა ყველაფერი და აღარ უნდა მათ გვერდით დგომა. ბევრია ასეთი, სწორედ ეს აღიზიანებთ და აღარ იციან, როგორ ამოანთხიონ ბოღმა. ამით ვერაფერს დაგვაკლებენ. ჩვენ პირიქით ვეუბნებით ყველას, რომ ერთად დგომით უნდა ვაშენოთ უკეთესი მომავალი და ახლა საქართველოში სიძულვილის დრო არ არის.
გვილავასთან საუბრის დამთავრების შემდეგ კომენტარისთვის დარცმელიძესთან დაკავშირება ვცადეთ, თუმცა, უშედეგოდ. არც “ერთიანი ნაციონალური მოძრაობის” აბაშის პარტიის გენერალურ მდივანი, ილია გაბუნია აღმოჩნდა მისაწვდომი _ მისი ტელეფონიც ამ დრომდე გათიშულია.
თუ კი ისინი გადაწყვეტენ, კომენტარი გააკეთონ ამ თემაზე, ჩვენ მათ მოსაზრებებს აუცილებლად გამოვაქვეყნებთ.
ამ დროისთვის აბაშის პოლიციის განყოფილებაში საქმე ხულიგნობის მუხლითაა აღძრული.
