“გურია ნიუსი” დაუკავშირდა ავთანდილ მკურნალიძეს, რომელიც ადასტურებს, რომ ის ხელისუფლებას აძლევს ხმას. თუმცა, მისივე თქმით, ის საარჩევნო პროცესებში აქტიურად ჩართული არ არის, იმ მიზეზის გამო, რომ თბილისში არის წასასვლელი, სადაც მისი შვილის გაგა მკურნალიძის სააპელაციო სასამართლო მიმდინარეობს.
ავთო მკურნალიძე:
_არაფერში არ ვარ ჩარეული, მივდივარ თბილისში, აპელაციის სასამართლო მაქვს, ვერ ვარ ჩართული. იმიტომ, რომ არ მაქვს დრო, თბილისში სასამართლო პროცესებზე დავდივარ. გუშინ ღამე ჩამოვედი, არც შტაბში დავდივარ. ის კი მინდა, რომ არჩევნებზე ვიყო აქეთ, ხმა რომ მივცე.
_ გვაქვს ინფორმაცია, რომ თქვენ “ქართულ ოცნებას” ეხმარებით…
_ აბა რას ვიზამ, დღევანდელ ხელისუფლებას ვეხმარები რა თქმა უნდა, გარიყული არასდროს არ ვყოფილვარ და არც ახლა ვიქნები, ახლაც არჩვენებია და ხმას მივცემ ხელისუფლებას, აბა რა უნდა ვქნა?
პარტია “ქართული ოცნება-დემოკრატიული საქართველოს” ოზურგეთის შტაბის ხელმძღვანელი დათო დარჩია “გურია ნიუსთან” ამბობს, რომ თუ მკურნალიძე “ქართული ოცნების” მხარდამჭერია, ამაზე ვინმემ პასუხი არ უნდა აგოს.
“ავთო მკურნალიძე ხმებს აგროვებსო? მოსახლეობას ეუბნება ხმა მიეცით “ქართულ ოცნებასო”? რა ვიცი, რა გითხრათ, ვიღაცა საღაცა ხმებს აგროვებს, მე როგორ ვაგო ამაზე პასუხი? ან თუ აგროვებს და ჩვენი მხარდამჭერია, რაა ამაში გასაკვირი? რა პრობლემაა? ან ავუკრძალავ ახლა მე ვინმეს რამეს? ან ვინმე აუკრძალავს? მე არ დამივალებია არავისთვის არაფერი და თუ ჩვენ გვაძლევს ხმას, რა, ეს დანაშაულია? ისე ამ ბოლო დღეებში გააქტიურდება ასეთი ინფორმაციები, ვიღაცას აწყობს ახლა ეს, თქვენ რომ გითხრათ. ეგაა, მეტი არაფერი,” _ უთხრა დარჩიამ “გურია ნიუსს”.
