8 წელია, ვითხოვთ გაზის შემოყვანას. წინა საპარლამენტო არჩევნების დროს, სოფელ ოზურგეთის ცენტრალური გზის ნახევარ დასახლებას გაზი შემოუყვანეს და ნახევარი ისე დაგვტოვეს. ეს იმის გამო, რომ ჩვენ პოლიტიკურ მომხრეებად არ გვთვლიდნენ. იქნებ, ახლა მაინც გაითვალისწინოს ახალმა მთავრობამ ჩვენი თხოვნა, არ დავიშლებით მანამ, სანამ არ მოვა ოზურგეთის მუნიციპალიტეტის გამგებელი და საბოლოო სიტყვას არ გვეტყვის, როდის შემოგვიყვანენ გაზს”, _ ამ მოთხოვნით დღეს, დილის 9 საათზე ოზურგეთის მუნიციპალიტეტის სოფელ ოზურგეთის მცხოვრებლებმა ცენტრალური გზა გადაკეtეს და გამაფრთხილებელი აქცია გამართეს.
აქცია საკმაოდ ხმაურიანად, 2 საათის განმავლობაში მიმდინარეობდა. მათი განცხადებით, რამდენიმე წელია, მიმართავენ ხელისუფლების წარმომადგენლებს. ამ ბოლოს კი, წერილი ენერგეტიკის სამინისტროშიც გააგზავნეს, საიდანაც პასუხი მიიღეს, რომ ეს საკითხი ადგილობრივ ხელისუფლებას გადმოეგზავნა რეაგირებისთვის. თუმცა, ადგილობრივი ხელისუფლებისგან პასუხი დღემდე არ მიუღიათ.
ადგილზე ოზურგეთის მუნიციპალიტეტის გამგებლის მოვალეობის შემსრულებელი კონსტანტინე შარაშენიძე არ გამოჩენილა. მან ჩვენთან საუბარში განაცხადა, რომ თბილისში იმყოფება და მოსახლეობას ვერ შეხვდება. ადგილზე არც შარაშენიძის მოადგილეები გამოჩენილან.
მოვიდა სოფლის რწმუნებული ვალერიან ჯინჭარაძე და სოფლის მაჟორიტარი დეპუტატი გია ხუჭუა. ამ უკანასკნელსა და მოსახლეობას შორის ხმამაღალი საუბარი ლამის შეურაცხყოფაში გადაიზრდა. სწორედ ხუჭუას ადანაშაულებდნენ საკუთარი სოფლის მიმართ უყურადღებობაში.
“შენ კი შეგეძლო, რომ ამდენი ხნის განმავლობაში ჩვენ, რამდენიმე ოჯახი გაზის გარეშე არ დავრჩენილიყავით, ყოველ არჩევნებზე ტყუილებით და დაპირებებით გვავსებ, არ გვჯერა შენი და არც დავიშლებით”, _ მიმართავდნენ სოფლის მაჟორიტარ დეპუტატს აქციის მონაწილეები.
ამ თემასთან დაკავშირებით, “გურია ნიუსთან” კომენტარი არ გააკეთეს არც სოფელ ოზურგეთის მაჟორიტარმა დეპუტატმა გია ხუჭუამ დ არც სოფლის რწმუნებულმა ვალერიან ჯინჭარაძემ.
“რა უნდა გითხრათ, მე რა პასუხი უნდა გაგცეთ? არ ვიცი, გამგებელი ადგილზე არ იმყოფებდა”, _ გვითხრა ჯინჭარაძემ.
აქციის მსვლელობის დროს მოვიდა პოლიციაც, რომელიც აქციის მონაწილეებს დაშლისკენ მოუწოდებდა.
შსს ოზურგეთის რაიონული პოლიციის თანამშრომელი სოლომონ ლომთათიძე მოსახლეობას სთხოვდა, რომ აქცია დაეშალათ, რადგან მისი განცახდებით, გზის გადაკეტვა არ შეიძლებოდა.
მოსახლეობა 2 საათის შემდეგ დაიშალა. მას შემდეგ, რაც მათ სოფლის რწმუნებული დაჟინებით თხოვდა, რომ მეორე დღემდე დრო მიეცათ, რადგან ხვალ გამგებლის მოვალეობის შემსრულებელს, კოტე შარშენიძეს შეახვედრებდა.
აქციის მონაწილეები მათი მოთხოვნების გაუთვალისწინებლობის შემთხვევაში პროტესტის მასშტაბურად გაგრძელებით, ასევე, ცენტრალური გზისა და რკინიგზის გადაკეტვით იმუქრებიან.
