საკრებულოს თავმჯდომარის მოადგილემ ავთანდილ მექვაბიშვილმა სხდომის მონაწილეებს ოთხ-საკითხიანი დღის წესრიგი გააცნო და მიანიშნა, რომ ყველაზე მნიშვნელოვანი 2014 წლის ბიუჯეტის დამტკიცების შესახებ საკრებულოს დადგენილების ადმინისტრაციულ წარმოებასი მიღების საკითხი იყო, რომელიც საფინანსო-საბიუჯეტო სამსახურის უფროსმა ალექსანდრე ბერიძემ წარმოადგინა. მან განმარტა, რომ ყველაფერზე დაკონკრეტებული პასუხი დღეს ვერ იქნება გაცემული, რადგან პროექტი ჯერ წარმოებაში შევა და საფინანსო-საბიუჯეტო კომისიას გადაეცემა განსახiლველად.
მან თქვა, რომ ოზურგეთის მუნიციპალიტეტის 2014 წლის ბიუჯეტში, პროექტის მიხედვით, შემოსავლების საპროგნოზო მაჩვენებელი განისაზღვრა 11 მილიონ 557 ათასი ლარით. მათ შორის, ცალ-ცალკე ჩამოთვალა, რა რაოდენობის თანხებია გათვალისწინებული:
ა) გადასახადები _ 1900, ათასი ლარი, ბ) გრანტები _ 8749,0 ათასი ლარი (2013 წელთან შედარებით 11.199.5 ათასი ლარით ნაკლები): გათანაბრებითი ტრანსფერი 8520.0 ათასი ლარი, მიზნობრივი ტრანსფერი დელეგირებული უფლებამოსილების გასახორციელებლად – 229,0 ათასი ლარით. სხვა შემოსავლები – 808, 0 ათასი ლარით.
დეპუტატებმა რამდენიმე შენიშვნის შემდეგ, კენჭი უყარეს ბიუჯეტის პროექტის ადმინისტრაციულ წარმოებაში მიღების საკითხს. ავთანდილ მექვაბიშვილმა მათ კიდევ ერთხელ განუმარტა, რომ 45 დღით ადრე ეს ყველაფერი იმიტომ კეთდება, რათა გულდასმით განიხილონ წარმოდგენილი პროექტი. ადმინისტრაციული წარმოების ვადა ათი დღეა.
დღის წესრიგის კიდევ ერთი მნიშვნელოვანი საკითხი იყო “ოზურგეთის მუნიციპალიტეტის 2014 წლის სახელმწიფო შესყიდვების გეგმის დამტკიცების შესახებ”, საკრებულოს განკარგულების დამტკიცება, რომელიც შესაბამისი სამსახურის უფროსმა ამირან გირკელიძემ წარმოადგინა. მან განმარტა, რომ 2014 წლის ბიუჯეტის პროექტის დამტკიცებაზე ადრე ამავე წლის შესყიდვების გეგმის დამტკიცება კანონის გამოა აუცილებელი, რომლის თანახმადაც შესყიდვების სააგენტოს 20 ნოემბრამდე უნდა გადაეცეს 2014 წლის სახელმწიფო შესყიდვების გეგმა.
