“ნაციონალური მოძრაობის” ეს მოთხოვნები ცოტა უსუსურად და ინფანტილურად მეჩვენება. კომიტეტების სხდომების ჩატარების საჯაროდ მოთხოვნა გაუგებრად მიმაჩნია. საქართველოს პარლამენტში საკომიტეტო მუშაობა დღეიდან მიმდინარეობს, მათ შუძლიათ მოვიდნენ პარლამენტის ბიუროზე და მოითხოვონ დღის წესრიგში საკითხის ჩასმა. ის, რომ სახალხო დამცველს განცხადებით მიმართავენ და აყენებენ მოთხოვნას, რომ მოვიდეს სახალხო დამცველი პარლამენტში და მოხსენება გააკეთოს, არ ვიცი რამდენად სწორი ფორმაა. მათ შეუძლიათ როგორც ფრაქციამ წერილობით მიმართონ სახალხო დამცველს და ისაუბრონ ნებისმიერ საკითხებზე. რა დაესიზმრება ვანო მერაბიშვილს თავის საკანში, იმასთან დაკავშირებით საპარლამენტო კომისიები არ შეიქმნება. ჩვენ არ ვენდობით მის განცხადებებს და არ გვჯერა, რომ ასეთ ფაქტს ადგილი ჰქონდა”.
უმრავლესობის ლიდერი სასამართლოს მიერ გიგი უგულავას მიმართ გამოტანილ განაჩენს ეხმიანება და უგულავას მომხრეების მიერ ატეხილ აჟიოტაჟს უსაფუძვლოდ მიიჩნევს.
“მოხდა ის, რაც უნდა მომხდარიყო. “ნაციონალური მოძრაობის” პოზიცია, რომ თითქოს ეს არის პოლიტიკური დევნა, არასწორია. ეს არის სამართლიანობის საკითხი, კანონის უზენაესობის საკითხი, რომელსაც ქართული სახელმწიფოსთვის ძალიან დიდი მნიშვნელობა აქვს. როდესაც სასამართლომ მიიღო გადაწყვეტილება და აღმკვეთი ღონისძიების სახით უგულავას 50 000 ლარი შეუფარდა, მაშინ, როდესაც მას პროკურატურა 50 მილიონი ლარის გაფლანგვას ედავება, როდესაც მას უფლებამოსილებაც შეუჩერდა, რაც ამის თანმდევი პროცესია, ცოტა გაუგებარია “ნაციონალური მოძრაობის” მხრიდან ასეთი რიტორიკა. გამოძიება მიმდინარებს, სასამართლო პროცესები ჩაინიშნა. ხოლო, დამნაშავეა თუ არა უგულავა, უნდა იყოს ის თუ არა მომავალში პატიმრობაში, ამას სასამართლო და საზოგადოება გადაწყვეტს”.
აბაშიძემ გაიხსენა სასამართლოს მიერ ახალაიასთვის გამამართლებელი განაჩენის გამოტანა და აღნიშნა, რომ თუნდაც ეს პროცესი მეტყველებს იმაზე, რომ სასამართლო დამოუკიდებელია. მისი თქმით სწორედ “ნაციონალური მოძრაობა” ახდენს გაკეთებული განცხადებებით სასამართლოზე ზეწოლას, მაგრამ მთავრობისთვის უპირველესია საქართველოში კანონის უზენაესობა და ყველა ღონეს ხმარობს ამ მიმართულებით ნაბიჯების გადასადგამად.
ექსპერტი რამაზ საყვარელიძე კი არაკომპეტენტურობას ხედავს მერაბიშვილის საქმის წარმოების ასპექტში და აცხადებს, რომ პროკურატურა არასაკმარისი კომპეტენციით იძიებს.
“როდესაც მერაბიშვილმა სკანდალური განცხადება გააკეთა მთავრი პროკურორის შესახებ, ამას ისეთი სიჩუმე მოჰყვა ხელისულების მხრიდან, რომ ჩნდება ეჭვი, რაღაც სიმართლის ნაწილი ამ განცხადებაში, არის. ბოლომდე სიმართლის თქმა “ნაციონალებს” უჭირთ, მაგრამ როდესაც ისინი ითხოვენ ვიდეომასალას და ხელისუფლება დუმს, ეს საფუძვლიან ეჭვსა და კითხვის ნიშნებს აჩენს. გიჩნდება განცდა, რომ პროკურატურის მუშაობა იდეალურისგან ძალიან შორსაა”.
ექსპერტის თქმით უგულავას საქმეზეც არ იდგმება კომპეტენციით გამყარებული ნაბიჯები, რასაც ემატება საზოგადოებაში არსებული ეჭვი მოსამართლეების მიმართ.
“რჩება შთაბეჭდილება, რომ რიგ შემთხვევებში იდგმევა არასაკმაო კომპეტენციით გამყარებული ნაბიჯები. თვალშისაცემია პროკურატურის მხრიდან ცალ-ცალკე მოთხოვნა უგულავას უფლებამოსილების დროებით შეჩერებისა და დაპატიმრებისა. სურათი ამ საკითხშიც არ ტოვებს ჩამოყალიბებულ შთაბეჭდილებას. ამ ფონზე ჩნდებნა იმის ეჭვი, რომ შეიძლება პროკურატურისგან წარმოდგენილი არგუმენტებიც არ არის დამაჯერებელი, რომ მოსამართლისთვის ცალსახა ყოფილიყო განაჩენის გამოტანა. მითუმეტეს, რომ მოსამართლეებშიც არ ვართ მთლად დარწმუნებული”.
“ნაციონალური მოძრაობის” მიერ წამოყენებულ მოთხოვნებს გამოეხმაურა უმრავლესობის დეპუტატი ირაკლი სესიაშვილი და აღნიშნა, რომ ამ მოთხოვნებს უმრავლესობა პარლამენტში განიხილავს.
“რამდენად ადეკვატურია “ნაციონალური მოძრაობის” მიერ წამოყენებული მოთხოვნები, უმბოჯესია საზოგადოებამ თავად განსაზღვროს, უმრავლესობა კი ამ მოთხოვნებს აუცილებლად განიხილავს პარლამენტში”.
მკითხველს შევახსენებთ, რომ საპარლამენტო უმცირესობა ხუთ მოთხოვნას აყენებს. 1.შეიქმნას საგამოძიებო კომისია, რომელიც გამოიძიებს გიგი უგულავას მიერ დაყენებულ საკითხს, რომელიც საქალაქო სასამართლოზე ზეწოლას ეხება. 2. შეიქმნას საგამოძიებო კომისია, რათა გამოძიებული იყოს ყოფილი პრემიერ-მინისტრისვანო მერაბიშვილის განცხადება, მისი უკანონოდ გატაცებისა და მასზე განხორციელებული ზეწოლის შესახებ. 3. გაიმართოს ადამიანის უფლებათა და იურიდიული კომიტეტების ერთობლივი სხდომა. 4.სხდომაზე იქნეს განხილული ყველა ეს საკითხი. 5. პარლამენტში სახალხო დამცველის მისვლა.
