ადვოკატი შალვა ხაჭაპურიძე “ნაციონალური მოძრაობის” მიერ მართულ არასამთავრობო ორგანიზაციების გააქტიურებაზე საუბრობს და აცხადებს, რომ ეს ორგანიზაციები კიდევ ერთ შეტევას ამზადებენ ფარცხალაძეზე. მან ყურადღება გაამახვილა “თავისუფლების ინსტიტუტზე” და აღნიშნა, რომ მალე კიდევ ერთ განცხადებას მოვისმენთ მათგან.
“თავისუფლების ინსტიტუტი” უახლოეს დღეებში განცხადების გაკეთებას აპირებს, რომლის მიხედვითაც ოთარ ფარცხალაძე ბიშკეკში, ნარკოლოგიურ დაწესებულებაში მკურნალობდა ნარკოტიკის გადაგდების მიზნით. ადგილი აქვს სერიოზულ, ფართომასშტაბიან შეტევას. კბილაშვილის ნეიტრალური პოზიცია არანაირ საფრთხეს არ წარმოადგენდა “ნაციონალური მოძრაობისთვის”, მაგრამ როგორც აღმოჩნდა, ფარცხალაძე, რომელმაც საკმაოდ სერიოზული ღონისძიებები გაატარა, ატარებს და უახლოეს დღეებშიც გაატარებს “ნაციონალური მოძრაობის” დამნაშავე პირების წინააღმდეგ, მათთვის საფრთხის შემცველია. ამიტომ წამოვიდა შავი პიარი, ვითომ არის ნასამართლევი და ა.შ”.
ადვოკატის განცხადებით. საუბარია რაღაც დოკუმენტზე, რომლის გაყალბებასაც აპირებენ ნაციონალები და მათ ზურგს ამოფარებული არასამთავრობო ორგანიზაციები. ხაჭაპურიძის თქმით არც ამაზე აპირებენ “შავი პიარის” გაჩერებას და კიდევ სხვა განცხადებების გავრცელებას გეგმავენ.
“ამის შემდეგ აპირებენ იმის განცხადებას, რომ ვითომ ფარცხალაძე “ნუცუბიძეების საძმოს” დაჯგუფების წევრია. მსგავსი რაღაცები სხვა არასამთავრობო ორგანიზაციებშიც იგეგმება, რომელთაც “ნაციონალური მოძრაობა“ აფინანსებს”.
ხაჭაპურიძე მიიჩნევს, რომ ხელისუფლების მხრიდან ფარცხალაძის მიმართულებით სასწრაფოდ უნდა იქნეს გადადგმული ნაბიჯები, ანუ თუ არ მოხდება მისი გადაყენება, “ნაციონალური მოძრაობა” სერიალივით გააგრძელებს შავი პიარის აგორებას.
დღეს გამართულ ბრიფინგზე პოლიტოლოგმა სოსო ცისკარიშვილმაც ფარცხალაძის აუცილებელ გადადგომაზე გაამახვილა ყურადღება. მისი თქმით ფარცხალაძე საზოგადოების ნაწილის სიმპათიებს მხოლოდ თანამდებობის დატოვების შემთხვევაში დაიბრუნებს. პოლიტოლოგი ურჩევს მთავარ პროკურორს დროულად და ღირსეულად დატოვოს თანამდებობა, წინააღმდეგ შემთხვევაში მას კიდევ ბევრი ბრალდების მოსმენა მოუწევს, რაც ქვეყანას დააზარალებს.
“ჩემი რჩევა იქნება, ნუ გახდის საკუთარ თავს ზედმეტი მსჯელობის საგნად და რაც შეიძლება დროულად და ღირსეულად დატოვოს თანამდებობა. სხვა მხრივ, ვფიქრობ, რომ გვექნება კიდევ უფრო მეტი სპეკულაციები ამ თემაზე, რაც მთლიანად ჩვენს ქვეყანას დააზარალებს ქვეყნისთვისაც უკეთესია, ფარცხალაძემ დამოუკიდებლად მიიღოს თანამდებობის დატოვების შესახებ გადაწყვეტილება და არა იძულებით, ვინმეს კარნახით. თუკი ის არ შეელევა სავარძელს, მით უფრო აზვირთდება ბრალდებები და ჭორ-მართალს კაცი ვეღარ გაარჩევს. იქნება საუბარი არა მარტო გერმანიაზე, იქნება საუბარი ვისაც რაზე მოესურვება: ვინ მოუნათლა მას შვილი, იყო თუ არა თბილისშიც ნასამართლევი, მოახერხა თუ არა უმაღლესი განათლების მიღება და უამრავი სხვა”.
დღესვე ბრიფინგი გამართა უმცირესობის წევრმა მიხეილ მაჭავარიანმა, რომელმაც მთლიანად უმცირესობის მოთხოვნა გააჟღერა. უმცირესობა ოთარ ფარცხალაძის პარლამენტში მისვლას მოითხოვს. მაჭავარიანმა განაცხადა, რომ დღეს უმცირესობის მოთხოვნით მთავარი პროკურორი პარლამენტის უმცირესობის სხდომას უნდა დასწრებოდა, მაგრამ არ მივიდა და არც პასუხი გაუგზავნა.
“23 დეკემბერს საქართველოს საპარლამენტო უმცირესობის ლიდერმა წერილობით მიმართა საქართველოს პარლამენტის თავმჯდომარეს და მთავარ პროკურორ ოთარ ფარცხალაძეს, რათა მიმდინარე წლის 26 დეკემბერს, 14:00 სთ-ზე ეს უკანასკნელი დასწრებოდა საპარლამენტო უმცირესობის სხდომას, სადაც უნდა განხილულიყო მიმდინარე წლის 17 დეკემბერს საქართველოს ყოფილი პრემიერ-მინისტრის და მთავარი ოპოზიციური პარტიის გენერალური მდივნის ივანე მერაბიშვილის მიერ სასამართლო პროცესზე გაკეთებული განცხადება მის მიმართ განხორციელებულ ზეწოლასთან დაკავშირებით, ასევე სხვა მნიშვნელოვანი საკითხები, რომლებიც მაღალ საზოგადოებრივ ინტერესს წარმოადგენს. აღნიშნულთან დაკავშირებით ასევე საჯაროდ გაცხადდა “ნაციონალური მოძრაობის” მხრიდან მიმდინარე წლის 22-23 დეკემბერს. სამწუხაროდ, დღეს, დილის 10:00 სთ-დან, საპარლამენტო უმცირესობის თანამშრომლების არაერთი მცდელობის მიუხედავად, პასუხი მიგვეღო მთავარი პროკურატურიდან მთავარი პროკურორის ოთარ ფარცხალაძის უმცირესობაზე დასწრების საკითხთან დაკავშირებით, პასუხი ამ წუთამდე არ გვაქვს”.
მაჭავარიანის განცხადებით, უმცირესობას სურდა შეხვედრაზე მთავარი პროკურორისგან პასუხი მოესმინათ ივანე მერაბიშვილის განცხადებასთან დაკავშირებით, ასევე ოთარ ფარცხალაძის დიპლომთან, გერმანიაში მის ნასამართლეობასთან, მედიაში გაჟღერებულ ჯიქიას ქუჩაზე 140 000 დოლარად შეფასებულ ბინის შეძენასთან დაკავშირებით. ნატო–ს გენერალური მდივნის ანდერს ფონ რასმუსენის ვიზიტის დროს მერიის 24 თანამშრომლის დაკავებასთან დაკავშირებით, რომელიც სასამართლოს მიერ უკანონოდ იქნა ცნობილი; შინაგან საქმეთა მინისტრის ყოფილი მოადგილის გიორგი ლორთქიფანიძის სახლთან ასაფეთქებელი ნივთიერების აღმოჩენის ფაქტთან დაკავშირებით; თავდაცვის სამინისტროს ყოფილი თანამშრომლის ალექსანდრე ნინუას საქმესთან დაკავშირებით, თენგიზ გუნავასთვის იარაღის ჩადების ფაქტთან დაკავშირებით დაკავშირებით, ასევე მოსამართლის თანაშემწე ია ბარამიძეზე ზეწოლისა და შანტაჟის ფაქტთან დაკავშირებით; შს მინისტრის ყოფილი მოადგილის გელა ხვედელიძის საქმესთან დაკავშირებით, გეგუთის ციხეში ლევან კორტავას მკვლელობის ფაქტთან დაკავშირებით, ბარბარე რაფალიანცის საქმესთან დაკავშირებით; ბაჩო ახალაიას საკანში უკანონო ვიდეო და აუდიო გადაღებასთან დაკავშირებით. უმცირესობა აცხადებს, რომ ეს საქმეები საზოგადოების დიდ ინტერესს იწვევს და პასუხები აუცილებლად უნდა იყოს გაცემული.
