ბორის ჩოჩიევის განცხადებით, მნიშვნელობა არ აქვს რა ერქმევა სამინისტროს, ვინ იქნება მინისტრი და პრეზიდენტი, მისი თქმით საქართველოს ნებისმიერი წინადადების განხილვა სამხრეთ ოსეთისთვის მიუღებელია.
“მნიშვნელობა არ აქვს, ვინ არის საქართველოს პრეზიდენტი, ვინ არიან მინისტრები და განსაკუთრებით არაფერს ნიშნავს რა ერქმევა სამინისტროებს. საქართველოს სამხრეთ ოსეთის ტერიტორიების , ოსების განადგურება და მშობლიური მიწიდან განდევნა სურს. როგორი წინადადებაც არ უნდა შემოგვთავაზოს საქართველომ, მისი განხილვა ჩვენთვის კატეგორიულად მიუღებელია. მე პაატა ზაქარეიშვილს უფრო შორსმჭვრეტელ და რეალისტ პოლიტიკოსად მივიჩნევდი”, _ აცხადებს ბორის ჩოჩიევი.
განსხვავებით, თუ საქართველო სამხრეთ ოსეთის დამოუკიდებლობას აღიარებს საქართველოსთან ურთიერთობისთვის მზადყოფნას აცხადებს ოკუპირებული ე.წ. სამხრეთ ოსეთის დე ფაქტო პრეზიდენტის ოფიცილური წარმომადგენელი მურატ ჯიოევი.
“ჩვენ მზად ვართ საქართველოსთან ურთიერთობა თეთრი ფურცლიდან დავიწყოთ, მაგრამ ვერ დავივიწყებთ, რაც მოხდა. საქართველომ უნდა გვაღიაროს და აიღოს პასუხისმგებლობა სამხრეთ ოსეთის წინააღმდეგ განხორციელებულ აგრესიაზე”.
“შერიგებისა და სამოქალაქო თანასწორობის” მინისტრი პაატა ზაქარეიშვილი აცხადებს, რომ ოკუპირებული ოსეთის ადმინისტრაციის წარმომადგენლებისთვის ადრე უწყების სახელი მიუღებელი იყო და მისი თქმით მთავრობა სწორ გზას დაადგა ამ ნაბიჯის გადადგმით.
“ამდენ ხანს ისინი ამბობდნენ, რომ მათთვის მიუღებელი იყო სახელი. ესე იგი, სწორი მიმართულებით მივდივართ, მათ არგუმენტები უმცირდებათ. მოვუწოდებ, დასხდნენ მოლაპარაკებების მაგიდასთან და ვისაუბროთ საჭირბოროტო საკითხებზე. რაც შეეხება აღიარებას ან არაღიარებას, მათ შორის დიდი მანძილია და უამრავლი საკითხი შეიძლება ამ მანძილში მოგვარდეს”.
რეინტეგრაციის სამინისტროსთვის სახელის შეცვლას ქართველი ექსპერტები და პოლიტიკოსებიც გამოეხმაურნენ. ექსპერტის, მამუკა არეშიძის შეხედულებით უწყების ახალი სახელწოდება მოუქნელია და უმჯობესი იქნებოდა უფრო ნეიტრალური დასახელება ყოფილიყო სერჩეული.
“საკმაოდ კარგად მესმის სახელის ცვლილების ფაქტი, რადგან მეც მქონია შეხვედრა აფხაზებთან და ოსებთან, სადაც ისინი თუნდაც კულვარულად აყენებდნენ საკითხს სახელთან დაკავშირებით. რეინტერგაცია გვაიძულებს საქართველოში ვიყოთ ინტეგრირებული, მანამდე კი გრძელი გზაა გასავლელი. აი, ასე აყენებდნენ ისინი საკითხს და აცხადებდნენ, რომ ამ ტიპის ორგანიზაციასთან მუშაობა გაგვიჭირდებაო და სახელის შეცვლას მოითხოვდნენ. ეს სახელი, რაც ახლაა, ვფიქრობ მთლად მოქნილი არაა, უფრო ნეიტრალური უნდა იყოს, თორემ ისე სწორედ რომ შერიგებაზე ვართ ორიენტირებული”.
ექსპერტი აცხადებს, რომ ყველაზე მთავარია გაძლიერდეს საზოგადოების ინტერესი აფხაზეთისა და ოსეთის მიმართ.
რეინტეგრაციის სამინისტროს სახელის ცვლილებას გამოეხმაურა ქართულ -აფხაზური და ოსური საერთაშორისო მოძრაობის ლიდერი ნესტან კირთაძე და განაცხადა, რომ ეს არის პრემიერ-მინისტრის კაბინეტის გადაწყვეტილება და არა მინისტრის მიერ გამოტანილი გადაწყვეტილება.
“დარწმუნებული ბრძანდებოდეთ, რომ ეს არის ირაკლი ღარიბაშვილის მინისტრთა კაბინეტის გადაწყვეტილება და არა პაატა ზაქარეიშვილის გადაწყვეტილება. მინდა ვუთხრა საქართველოს მოსახლეობას, რომ სახელწოდება „შერიგება და თანასწორობა“ სულაც არ არის კოსმეტიკური ცვლილება”.
მოძრაობის ლიდერის განცხადებით, შერიგება და ხალხებს შორის ნდობის აღდგენა არის ერთ-ერთი მთავარი კონცეპტუალური საკითხი, მაგრამ სამოქალაქო სექტორისა და მთავრობის მიერ გადაგდმული ნაბიჯები უნდა განსხვავდებოდეს ერთმანეთისგან. კირთაძე მიიჩნევს, რომ ძველი სახელი სწორედაც რომ მოიცავდა ყველა კომპონენტს, რომელიც სჭირდებოდა ურთიერთობების დაწყებას.
“ის სახელწოდება, რომელსაც ატარებდა ეს სამინისტრო მოიცავდა შერიგებასაც, ურთიერთობების აღდგენასაც, ნდობის ჩამოყალიბებასაც და ყველა მიმართულებით თანამშრომლობის დაწყებას”.
კირთაძემ აღნიშნა, რომ საჭიროა საქართველოს მთავრობას სასწრაფოდ წარმოადგინოს სტრატეგიული გეგმა საქართველოს სახელმწიფოებრივი მთლიანობის და პოლიტიკური მთლიანობის გადაწყვეტილებების შესახებ. მისი თქმით საჭიროა დაისვას კითხვები.
“რას ურიგდებით, ბატონებო? ქართულ დაშლილ სახელმწიფოებრიობას ურიგდებით? თუ რას ვერ გაუსწორეთ თვალი? ერთიანი ქართული სახელმწიფოსათვის თქვენს უუნარო მთავრობას დიდი დრო და შრომა სჭირდება. შერიგების საკითხი არის სამოქალაქო საზოგადოების საკითხი, ხოლო მთავრობის საკითხი არის სახელმწიფოებრივი პოლიტიკა ქვეყნის მთლიანობსა”.
ნესტან კირთაძე აცხადებს, რომ თუ არ იქნება წარმოდგენილი სტრატეგიული გეგმა საქართველოს ტერიტორიული მთლიანობისა, მაშინ მთელი პასუხისმგებლობა დაეკისრება ირაკლი ღარიბაშვილს, რადგან ამ ქმედებით მისმა მთავრობამ თვალი გაუსწორა დაშლილ, დაქუცმაცებულ საქართველოს.
სახელის ცვლილება აბსურდად და საერთაშორისო სამართალთან შეუსაბამოდ შეაფასა უმცირესობის წარმომადგენელმა შოთა მალაშხიამ
“ეს არის ოკუპირებული ტერიტორიები, სადაც მოხდა ეთნოწმენდა და აქედან გამომდინარე შერიგება და სამოქალაქო თანასწორობა გაუგებარია. ჩვენ გვყავს ერთი სახელმწიფო, რომელსაც ჰქვია ოკუპირებული ტერიტორიებიდან დევნილების და ლტოლვილების განსახლების სამინისტრო, რომელთან შესაბამისადაც უნდა არსებობდეს და არსებობდა კიდეც რეინტეგრაციის სამინისტრო, ახლა კი გაურკვეველია ოკუპანტთან რა შერიგებაზე შეიძლება იყოს საუბარი. ყველაზე დიდი, რაც შეიძლებოდა დაახლოებით ასეთი განყოფილების შექმნა”.
მალაშხია აცხადებს, რომ სახელის ცვლილებით შეიქმნა პრაქტიკულად სხვა სამინისტრო და მოუწოდებს პრეზიდენტს არ მოაწეროს ხელი ასეთ განკარგულებებს.
განსხვავებული აზრი აქვს უმრავლესობის წარმომადგენელს ზურაბ აბაშიძეს, რომელიც აცხადებს, რომ უწყებისთვის სახელის ცვლილება სწორი გადაწყვეტილებაა და გამოხატავს მთავრობის ნებას შერიგების საკითხში.
“რეინტეგრაციის სამინისტროსთვის სახელის გადარქმევა და მისთვის შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის სახელის მინიჭება აბსოლუტურად სწორი და ადეკვატურია. ჩვენი მთავარი მიზანიც ხომ ესაა- მოხდეს შერიგება აფხაზი და ოსი საზოგადოების წარმომადგენლებთან. ეს საკითხი რჩება პრიორიტეტად. მეორე მიმართულება სამოქალაქო თანასწორობა გულისხმობს იმას, რომ იმ საზოგადოების წარმომადგენლები, რომლებიც არიან სხვა ეროვნებისა და სხვა რელიგიის მიმდევრები, მოხდეს მათი ინტეგრაციისა და თანასწორობის პროცესი”.
აბაშიძე ზაქარეიშვილს ერთ-ერთ წარმატებულ მინისტრად მიიჩნევს და აცხადებს, რომ საკმაოდ ეფექტური მუშაობა აქვს გაშლილი ამ სფეროში.
“ზაქარეიშვილითავად წარმატებული მინისტრია და საკმაოდ ეფექტურად მუშაობას ამ თანამდებობაზე. ალბათ, ჩვენს ოპონენტებს “ნაციონალური მოძრაობიდან” ეს აწუხებთ, რადგანაც მათი მუშაობის პერიოდში ამ მიმართულებით არანაირი შედეგი არ დადგა”.
უმრავლესობის წარმომადგენელი იმედს იტოვებს, რომ სულ მალე ყველა იხილავს ამ მუსაობს შედეგს.
როგორც ცნობილია, უწყებისთვის სახელის შეცვლა ახალი გადაწყვეტილება არ არის, სახელის ცვლილებასთან დაკავშირებული კანონპროექტი დიდი ხნის მომზადებული იყო, თუმცა ყოფილი პრეზიდენტი, მიხეილ სააკაშვილი მას ხელს არ აწერდა.
