შეხვედრა დამარცხებულმა კანდიდატმა დიმიტრი კვერღელიძემ გახსნა. მის მოხსენებას სტილის შეუცვლელად გთავაზობთ:
_ რაც და როგორც განვითარდა მოვლენები ბოლოს, რაც მოხდა ეს კონკრეტულად ზოგიერთი ჟურნალისტის ბრალია, რა! შარაშენიძემ და სამწუხაროდ ზოგიერთმა ჟურნალისტმა, აი უნდა ვთქვა მთელი პასუხისმგებლობით, შარაშენიძის კლანურ მმართველობას შეუწყო ხელი. მცდელობა არის ბიზნესებში ხელის ჩაყოფაზე, არასერიოზული კუთხით კითხვების დასმას აქვს ადგილი, ვერ ერკვევიან, რას ნიშნავს ორ მხარეს შორის მოლაპარაკება, ზოგიერთი ადამიანები ამაში ვერ ერკვევიან, ვინც სვამს ასეთ კითხვებს, იმ ჟურნალისტზე მაქვს საუბარი.
ეს განცხადება მან ოზურგეთის დემოკრატიული ჩართულობის ცენტრში გააკეთა.
_ ბატონო დიმიტრი, იქნებ დაგვიკონკრეტოთ, რომელ ჟურნალისტებზეა საუბარი.
_ ვისზეა საუბარი? აგერ ბრძანდება ქალბატონი ჟანა (გულისხმობს “გურია ნიუსის” ჟურნალისტს ჟანა მეგრელიშვილს)… მე მეკითხება და ერთ-ერთი ფირმის მეპატრონეს… რა თქვენი საქმეა ქალბატონო ჟანა, მე რა ურთიერთობა მაქვს უცხოურ ფირმასთან? რა ხდება ორ კომერციულ ფირმას შორის, ორ სუბიექტს შორის, ეს არ არის საჯარო ინფორმაცია ჯერ ერთი რა… (ასეთ კომენტარს აკეთებს საჯარო მოხელე, საკრებულოს წევრი და საკრებულოს თავმჯდომარეობის კანდიდატი. ავტ)
ფირმის დირექტორის პოსტი, რომელზეც დიმიტრი კვერღელიძე საუბრობს, მას 2013 წლის 20 ივნისამდე ეკავა. 4 დღით ადრე, საკრებულოს სხდომამდე.
სტატიას ამ “საიდუმლო” ინფორმაციის შესახებ, რომელიც დიმიტრი კვერღელიძემ მანამდე დააანონსა, სანამ “გურია ნიუსში” გამოქვეყნდებოდა, ჩვენი მკითხველი რამდენიმე საათში იხილავს “გურია ნიუსის” ვებგვერდზე.
აქვე იმასაც დავძენთ, რომ ფირმის მეპატრონე, რომელსაც კვერღელიძე ნაცვალსახელით მოიხსენიებს, მისი დის ქმარი, გოჩა ჩხაიძეა, რომელიც ამჟამად საფრანგეთში ცხოვრობს.
დიმიტრი კვერღელიძემ იმის თაობაზე, რომ მასალას ვამზადებდით, გუშინ ჩვენი სატელეფონო ზარის შემდეგ შეიტყო, როდესაც მას კომენტარზე დავურეკეთ. აქვე განვმარტავთ, რომ კვერღელიძეს საკრებულოს სხდომის დაწყებამდე დავუკავშირდით. მასალის გამოქვეყნება კი იმ მიზეზით გადაიდო, რომ მეორე მხარის ადვოკატის _ ვლადიმერ სანიკიძის კომენტარებს ველოდებოდით.
ამ ფაქტის განმარტება მიზანშეწონილად ჩავთვალეთ, რათა მკითხველს წარმოდგენა ჰქონდეს იმ განცხადებებზე, რომელიც კვერღელიძემ “გურია ნიუსის” მისამართით გააჟღერა.
_ ბატონო დიმიტრი, თუ ინფორმაცია მოვიპოვეთ და გავაჟღერეთ, ეს აკრძალულია?
_ გააჩნია კითხვის დასმას, თავი უნდა შევიკავოთ ისეთ საკითხებზე, რაც ჟურნალისტებს არ ეხებათ, რა! ძალიან გთხოვთ, რომ კანონში ჩაიხედეთ და ისე იმოქმედეთ, რა! თუ ვინმეს ის ჰგონია, რომ…
_ ბატონო დიმიტრი, საქმე გეხებათ უშუალოდ თქვენ და კითხვა არ უნდა დაგისვათ?
_ახლა დამისვი მაშინ, მოდი ამდენ ადამიანში და გაგცემთ პასუხს.
ახლა ვარ მზად პრესის წინაშე ნებისმიერ შეკითხვას ვუპასუხო, ახლა მკითხე… თუ გინდა მაგ საკითხშიც. ერთი კითხვა იყო, რატომ წამოხვედი ფირმის დირექტორობიდანო, მეორე _ რატომ აქვს თქვენი ფირმის ვალიო… შპს “ლაბასო”. თქვენ გაინტერესებთ შპს “ლაბას” რატომ აქვს ჩეხურ კომპანიასთან ვალი, ჰო? ეს კითხვა ხომ გაინტერესებდათ? არა, იცი რაა, პასუხს გაგცემთ, მაგრამ ამ მოვლენებთან დაკავშირებით, რაც მე პოლიტიკაში ვარ ჩართული, კონკრეტულად ეს საკითხი რატომ გაინტერესებდათ?
მომისმინეთ, ორ კომპანიას შორის დავა არის ბუნებრივი პროცესი, ასეთია მილიონი საქართველოში, წარმოიშვა სასამართლო დავა, ჩვენ ვიყავით ასპროცენტიანი მართლები, ეს საკითხი შეწყვიტა სასამართლომ, განაჩენი დადგა ასეთი, რომ ამ საკითხზე არასოდეს აღარ დაისვას კითხვაო!
ეს არის კერძო განაჩენი, რა! იმიტომ, რომ ეს არის კერძო საიდუმლოება და თქვენი საქმე არაა ეგ. რაც შეეხება გადადგომას, საჯარო მოხელე არ უნდა იყოს დირექტორი, სხვათაშორის, ეს მე დამიჯდა სერიოზული თანხა, რადგან უცხოეთში ამ ფირმის 100 პროცენტის მფლობელს, მივმართე წერილობით, ნოტარიუსით, რადგან მე ვაპირებდი საჯარო მოხელეობას და არ შეიძლებოდა ჩემი დირექტორობა, იმიტომ, რომ შემდეგ არ წარმოშობილიყო ინტერესთა კონფლიქტი. ესაა ჩემი პასუხი და რატომ გაინტერესებდათ ეგ ამბავი, ახლა თქვენ მიპასუხეთ, რა! _ საკმაოდ მკაცრი იყო კვერღელიძე, თუმცა, ის აღარ აუხსნია, თუ რატომ შეუშალა ხელი მის გათავმჯდომარეობას ჟურნალისტის ზემოთ აღნიშნულმა კითხვებმა.
კოალიციის სხვა წარმომადგენლებს, რომლებიც პრესკონფერენციას ესწრებოდნენ, დიმიტრი კვერღელიძის განცხადებაზე არანაირი კომენტარი გაუკეთებიათ. თუმცა, საგულისხმოა ის ფაქტი, რომ თითოეულ მათგანს აქამდე არც არასდროს შეუტანია ეჭვი “გურია ნიუსის” მიუკერძოებლობაზე…
რა არის კერძო საიდუმლოება, სად იწყება და მთავრდება ის საჯარო მოხელისთვის და რომელ საქმეში ფიგურირებს დამარცხებული კანდიდატი, ამის შესახებ, როგორც შეგპირდით, სულ მალე ჩვენი ვებგვერდიდან შეიტყობთ.
