“აფხაზეთის უმაღლესმა საბჭომ, ხალხის ნდობის მანდატი დაკარგა”

რეფორმებისა და მონიტორინგის საზოგადოებრივი კვლევის ცენტრმა, აფხაზეთის ა/რ უმაღლესი საბჭოს თავმჯდომარე გია გვაზავას წინააღმდეგ მთავარ პროკურატურაში სარჩელი შეიტანა.

ცენტრის განცხადებით, სარჩელი სამსახურეობრივი უფლებამოსილების გადაჭარბებისა და საბიუჯეტო სახსრების არამიზნობრივი ხარჯვის ბრალდებით არის შეტანილი.

კვლევის ცენტრის განცხადებით საქმე ეხება 2013 წლის 17 სექტემბერს საქართველოს პრეზიდენტის #735 ბრძანებულების საფუძველზე აფხაზეთის ა/რ უმაღლესი საბჭოს დეპუტატის ოლგა ნაგარნინას საქართველოს მოქალაქეობის შეწყვეტას, რის საფუძველზეც მას აფხაზეთის უმაღლესი საბჭოს რეგლამენტის მე-8 მუხლის თანახმად დეპუტატის უფლებამოსილებაც უნდა შეწყვეტოდა.

კვლევის ცენტრის განცხადებით, გია გვაზავამ დამალა ნაგარნინას მოქალაქეობა და დეპუტატის მანდატი რუსეთის მოქალაქეს გაუგრძელა, რის გამოც გვაზავას ბრალად ედება დანაშაულის ინიციატორობა და შემდგომში განხორციელება.

რეფორმებისა და მონიტორინგის საზოგადოებრივი კვლევის ცენტრმა ასევე მიმართა საქართველოს აუდიტის სამსახურს, რატა გამოძიებული იქნეს ის ფინანსური დარღვევები, რაც აღნიშნულმა ფაქტმა გამოიწვია.

თავად გია  გვაზავა აცხადებს, რომ ეს იყო უმაღლესი საბჭოს პრეზიდიუმის გადაწყვეტილება და მას ერთპიროვნულად არ უმოქმედია. მისივე თქმით ყველაფერი გაირკვევა და დამნაშავე დაისჯება.

აღნიშნულ ფაქტს არასამთავრობო ორგანიზაციის "გზა აფხაზეთისკენ" დამაარსებელი კახა შამათავა გამოეხმაურა და „გურია ნიუსთან“ საუბრისას განაცხადა:

"ძალიან არასასიამოვნო ფაქტია, მეტიც, უკვე ყოველგვარ ზღვარს სცილდება აფხაზეთის ლეგიტიმური ხელისუფლების ირგვლივ არსებული ნეგატიური ინფორმაციები, ამ ღია თუ ფარული ომის შედეგები ასახულია ჩვენზე, დევნილ საზოგადოებაზე, კიდევ ერთხელ მოვუწოდებ ხელისუფლებას, მოგვეცეს საშუალება, სამთავრობო პროგრამით გათვალისწინებული ცვლილებების განხორციელების, რათა დამთავრდეს ეს ოცწლიანი ბრძოლა სკამებისთვის, აფხაზეთის სტრუქტურებს კიდევ აქვთ დარჩენილი შანსი დადგნენ ხალხის გვერდით და გამოასწორონ წლების განმავლობაში დაშვებული შეცდომები, თუ ეს პროცესი კიდევ გაგრძელდა, დევნილი საზოგადოება აუცილებლად იტყვის თავის სათქმელს, რომელიც დაგროვდა ოცი წლის განმავლობაში, აფხაზეთის უმაღლესმა საბჭომ აბსოლუტურად დაკარგა ხალხის ნდობის მანდატი, ჩვენ არაერთხელ შევთავაზეთ მათ, ერთად გვეფიქრა ამ სიტუაციიდან გამოსავლის გზების ძიებაზე, მაგრამ ამაოდ. ქვეყანაში ცვლილებების დრო დადგა, მაგრამ როგორც ჩანს ბევრს არ უნდა მისი განხორციელება, მინდა მივმართო აფხაზეთის ლეგიტიმურ ხელისუფლებას, ბატონებო! ცვლილებები გარდაუვალი, ეს იქნება თქვენთან ერთად თუ თქვენს გარეშე, დროა დაფიქრდეთ!"

ცნობისთვის, მთავარმა პროკურატურამ რეფორმებისა და მონიტორინგის საზოგადოებრივი კვლევის ცენტრის სარჩელი წარმოებაში უკვე მიიღო.