2012 წელი, "ქართული ოცნების" შემომწირველების მასობრივი დაბარებები კონტროლის პალატაში და სადღეღამისო დაკითხვები რეგიონებში, სასამართლო ყოველგვარი სამართლის გარეშე, ათასობით დაჯარიმებული ადამიანი და დაყადაღებული ქონება, აუქციონზე ყოველგვარი წესების გარეშე გატანილი და გასხვისებული კერძო საკუთრება…
2012 წლის გაზაფხულ–ზაფხულში, სახელმწიფო აუდიტის მოთხოვნის შესაბამისად, ქართველმა მოსამართლეებმა პარტიებისთვის უკანონო შემოწირულობის გახორციელების გამო ათეულობით მილიონობით ლარით დააჯარიმეს ათეულობით ფიზიკური და იურიდიული პირი, რომელთა აბსოლუტური უმრავლესობა ბიძინა ივანიშვილთან და "ქართულ ოცნებასთან" იყო დაკავშირებული.
"ნაციონალური მოძრაობის" თბილისის მერობის კანდიდატი ნიკა მელია, სწორედ იმ დიდი დაყადაღებებისა და აუქციონის პერიოდში ხელმძღვანელობდა აღსრულების ეროვნულ ბიუროს. უწყებას, სიდანაც იმ ყველაფრის აღსრულება ხდებოდა, რასაც კონტროლის პალატა იწყებდა და სასამართლო ასრულებდა…
პარლამენტის წევრი გიგა ბუკია ერთ-ერთი მათგანია, რომლის ქონებაც აღსრულებას გადაეცა:
"აუდიტის სამსახურმა სასამართლოში შეიტანა სარჩელი, რომ ჩემი შემოწირულობა უკანონო იყო. რეალურად, 50 000-დოლარიანი საკრედიტო ხელშეკრულება მქონდა, შემოსავლის სხვა წყაროებს რომ თავი დავანებოთ. აქედან გადავრიცხე თანხა “ქართული ოცნების” სასარგებლოდ. მოსამართლემ 7 წუთში გამომიცხადა გადაწყვეტილება და დაგვაკისრა ჯარიმა ათმაგი ოდენობით _ 350 000 ლარზე იყო საუბარი. გავასაჩივრეთ, მაგრამ იგივე გადაწყვეტილება დატოვეს ძალაში, რომელიც აღსასრულებლად გადაეცა აღსრულების ბიუროს და პირველ რიგში, ჩემი ქონება გაყიდეს."
როგორც გიგა ბუკია იხსენებს, განსახლებაც უნდა დაწყებულიყო, მაგრამ ამასობაში 2 ოქტომბრის არჩევნების შედეგები დადგა და პროცესი შეჩერდა. აღსრულების ბიუროდან მას მეორე დღესვე დაურეკეს:
"დამირეკეს და მაცნობეს, რომ ქონება ისევ ჩემს სახელზე იყო გადმოფორმებული. როცა ვკითხე, რის საფუძველზე გადმომიფორმეთ, კიდევ ერთ უკანონობას რატომ ჩადიხართ,-მეთქი, მითხრეს, თქვენთვის ქონება არასწორად იყო ჩამორთმეული, რაც ჩაითვალა არასწორად გახორციელებულ ღონისძიებადო. ეს იყო დიდი რეპრესიული მანქანა, რომელმაც პოლიტიკური დაკვეთა შეასრულა. შემდეგ, პარლამენტმა მიიღო კანონი და ამ ნიშნით ჩამორთმეულ ქონებას ამნისტია შეეხო."
სააღსრულებლო ბიურომ, რომლის ხელმძღვანელი ნიკანორ, იგივე ნიკა მელია გახლდათ, მხოლოდ 2012 წლის 3 ოქტომბერს აღმოაჩინა, რომ ასეულობით ადამიანისთვის ქონება უკანონოდ იყო ჩამორთმეული.
მანამდე კი ყოველდღიური ნიუსები სააღსრულებლო ბიუროდან ასეთი იყო: აღსრულების ეროვნულმა ბიურომ თბილისის სააპელაციო სასამართლოს მიერ 2012 წლის 20 ივნისს გაცემული სააღსრულებო ფურცლების აღსრულების უზრუნველყოფის მიზნით, ყადაღა დაადო ბიძინა ივანიშვილის აქციების 100%-ს სს "ქართუ ჯგუფში", აქციების 100%-ს _ სს "ქართუ ბანკში" და აქციების 21.7%-ს _ სს "პროგრეს ბანკში".
ივანიშვილს სასამართლომ ამომრჩევლის მოსყიდვის გამო დაახლოებით 75 მილიონი ლარი ჯარიმა დააკისრა.
2012 წლის საპარლამენტო არჩევნების შემდეგ, აღსრულების ბიუროს განცხადებების სტილი შეიცვალა:
"აღსრულების ეროვნულმა ბიურომ მიიღო გადაწყვეტილება პარტიებისთვის უკანონო შემოწირულობისთვის დაჯარიმებული ფიზიკური და იურიდიული პირებისთვის დაყადაღებული ქონების დაბრუნების შესახებ.
უკანონო შემომწირველებთან დაკავშირებით აღსრულების ეროვნული ბიუროს ხელმძღვანელმა მიიღო შესაბამისი გადაწყვეტილება. სააღსრულებლო წარმოების შესახებ საქართველოს კანონის მიხედვით, აღსრულების ეროვნული ბიუროს თავმჯდომარეს უფლება აქვს, გააუქმოს აღსრულება, თუ გადაწყვეტილება მიღებულ იქნა პროცედურული, ან სხვა ტიპის დარღვევებით…“
თუმცა, დღემდე არავინ მიუციათ პასუხისგებაში იმ "პროცედურული დარღვევების" გამო, რომელმაც ასეულობით ადამიანს მორალური ზიანი მიაყენა…
მელიას სადეკლარაციო ლაბირინთები…
ნიკა მელიას სადეკლარაციო ისტორიაში საკმაოდ საინტერესო დეტალები იყრის თავს. მაგალითად, 2011 წლის მონაცემების მიხედვით, მაშინ როდესაც ქვეყანაში მთავარი პრობლემა უმუშევრობა იყო, ნიკა მელია ერთდროულად სამ ადგილზე მუშაობდა.
1. აღსრულების ეროვნული ბიუროს ტერიტორიული ორგანოს თბილისის სააღსრულებო ბიუროს უფროსი. სამუშაოს შესრულებით წინა წლის პირველი იანვრიდან 31 დეკემბრის ჩათვლით მიღებული შემოსავალი შეადგენდა 22 431 ლარს.
2. არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მ/შ. სამუშაოს შესრულებით წინა წლის პირველი იანვრიდან 31 დეკემბრის ჩათვლით მიღებული შემოსავალი შეადგენდა 5 395 ლარს.
3. აღსრულების ეროვნული ბიუროს თავმჯდომარე. სამუშაოს შესრულებით წინა წლის პირველი იანვრიდან 31 დეკემბრის ჩათვლით მიღებული შემოსავალი შეადგენდა 13 871 ლარს.
საერთო ჯამში, ამ წელს ნიკა მელიამ სამი სხვადასხვა სამსახურიდან მთლიანობაში 41 697 ლარი მიიღო.
თუმცა, საინტერესოა, რა კრიტერიუმით იხელმძღვანელეს, როცა მას ორი ერთმანეთზე დაქვემდებარებული უწყების _ აღსრულების ეროვნული ბიუროს და აღსრულების ეროვნული ბიუროს ტერიტორიული ორგანოს თბილისის სააღსრულებო ბიუროს ხელმძღვანელობა ჩააბარეს.
ამ კითხვებზე პასუხი არ გვაქვს, რადგან ნიკა მელია ჩვენს სატელეფონო ზარებს არ პასუხობს.
კიდევ ერთი უაღრესად საინტერესო დეტალი, რომელიც ნიკა მელიას დეკლარაციას უკავშირდება, მისი სახელფასო სარგოა და სხვაობა 2011 და 2012 წლებს შორის:
2011 წელს, როდესაც ნიკა მელია აღსრულების ეროვნული ბიუროს თავმჯდომარე იყო, მისი შემოსავალი პირველი იანვრიდან 31 დეკემბრის ჩათვლით 13 871 ლარს შეადგენდა;
2012 წელს კი იმავე თანამდებობაზე მისი შემოსავალი 97 700 ლარი გახდა _ 7-ჯერ მეტი, ვიდრე 2011 წელს.
ამასთან დაკავშირებით "გურია ნიუსთან" კომენტარს აკეთებენ "ახალგაზრდა ადვოკატები":
"ზეპირად თქმა, თუ რატომ მიიღო წინა წელთან შედარებით ამდენით მეტი თანხა, რთულია, საჭიროა, გამოითხოვოთ ეს ინფორმაცია და ისე დაადგინოთ პრემიები რამდენი და როდის მიიღო. ნებისმიერ შემთხვევაში, თანხა კოლოსალურია და იმ ვითარებაში, როდესაც საზოგადოების სოციალური ფენა დაუცველია, თუნდაც კანონთან შესაბამისობაში დაკავებული თანამდებობები რამდენად ამართლებს პირის მაღალი საჯარო მოხელისთვის დაკისრებულ მორალურ ქცევას, საზოგადოების განსჯადი საკითხია…"
