უფასო ტანსაცმელი, უფასო პოლიკლინიკა, უფასო ტრანსპორტი, უპროცენტო სესხი 10 000 -დან 50 000 ლარის ფარგლებში და უფასო ფაკულტეტები _ ასეთია ოზურგეთის მერობის ოპოზიციონერი კანდიდატის შოთა გოგიბერიძის წინასაარჩევნო დაპირებები. როგორ აპირებს უფასო პროექტების განხორციელებას და ეყოფა თუ არა ოზურგეთის მერიის დაახლოებით 7 მილიონიანი ბიუჯეტი ამ ჩამონათვალს?
შოთა გოგიბერიძე "გურია ნიუსთან" საუბრისას აცხადებს, რომ მისი "პიროვნული ამ ამ პროგრამაში მხოლოდ უნივერსიტეტის თემაა".
ვის ეკუთვნის დანარჩენი დაპირებები და რამდენ წელზეა გათვლილი ის 7 პუნქტი, რომელსაც ოპოზიციონერი კანდიდატი ამომრჩეველს პირდება? ამ კითხვებზე პასუხის გაცემა თავად შოთა გოგიბერიძეს ვთხოვეთ.
_ ბატონო შოთა, თვითმმართველობის არჩევნებამდე ერთი კვირით ადრე, თქვენ დატოვეთ კოალიცია "ქართული ოცნების" რიგები და გადახვედით "პატრიოტთა ალიანსში". გადასვლისთანავე განაცხადეთ: "ქართულ ოცნებას ჯერ უნდა ვუჩვენოთ ყვითელი და შემდეგ წითელი ბარათი." ასეთი მნიშვნელოვანი იყო თქვენთვის მერის თანამდებობა? ყვითელი ბარათი საკუთარ თავსაც ხომ არ უჩვენეთ, თქვენ ხომ ამ კოალიციის წევრი ფორუმის ლიდერი იყავით ოზურგეთში?
_ მე მინდა გითხრათ, რომ კოალიციის მისამართით მანამდეც არაერთი კრიტიკული განცხადება მქონდა გაკეთებული, განსაკუთრებით მაშინ, როდესაც დაიწყო კოჰაბიტაციის პროცესი. მე მაშინ მოვაწყვე აქცია ოზურგეთში, სადაც ულტიმატუმით მივმართე მაჟორიტარ დეპუტატს, ქართულ ოცნებას და ადგილობრივ ხელმძღვანელობას და მოვუწოდე დაესრულებინათ ეს პროცესი. ამ განცხადებას მაშინ ბატონი ვახტანგ ხმალაძე და ქალბატონი მანანა კობახიძეც გამოეხმაურა და პოლიტიკურ ზეწოლად ჩათვალეს. ამაზე პასუხი მათ გავეცი და ამას დავარქვი არა პოლიტიკური ზეწოლა, არამედ პოლიტიკური კანონზომიერება.
_ აქცია, რომელზედაც თქვენ საუბრობთ, დაახლოებით ერთი წლის წინ მოაწყვეთ, თუმცა თქვენ მაინც რჩებოდით კოალიციის წევრად და აგრძელებდით მათი სახელით მოქმედებას…
_ დიახ, ვრჩებოდი კოალიციაში, როგორც ეროვნული ფორუმის ლიდერი, თუმცა მაშინ გავაკეთე კიდევ ერთი განცხადება მიხეილ სააკაშვილის საპრეზიდენტო ვადის გაგრძელების შესახებ და ეს ჩავთვალე არაკონსტიტუციურად. მე კრიტიკული განცხადებებისგან თავს არ ვიკავებდი…
_ როგორ ფიქრობთ, პარტიიდან პარტიაში გადასვლა რამდენად კარგი ჟესტია პოლიტიკოსისთვის?
_ და მე რომელი პარტიიდან რომელ პარტიაში გადავდივარ?
_ "ეროვნული ფორუმიდან" "პატრიოტთა ალიანსში", მანამდე "ნაცმოძრაობის" წევრი იყავით…
_ მე "პატრიოტთა ალიანსის" წევრი არ ვარ, უბრალოდ კენჭს ვიყრი იქედან. "ნაცმოძრაობიდან კი 2008 წელს წამოვედი…
_ ამჟამად რომელი პარტიის წევრი ხართ?
_ ახლა არცერთი პარტიის წევრი არ ვარ, ფორუმიდან წამოვედი. ოფიციალური განცხადებით მივმართე ბატონ რევაზ შავიშვილს. მე უპარტიო გახლავართ, არავითარ პარტიიდან პარტიაში არ გადავრბივარ, მაგრამ პატრიოტთა ალიანსი იმსახურებს ჩემს კეთილგანწყობას. ეს იმას ხომ არ ნიშნავს, რომ პორტირება მოვახდინე "ნაციონალური მოძრაობიდან" "ოცნებაში ან პირიქით?
"ეროვნული ფორუმი" და "პატრიოტთა ალიანსი" ძალიან მსგავსი ორგანიზაციები არიან და მათი იდეოლოგიური საფუძვლები ძალიან ჰგავს ერთმანეთს. უბრალოდ, კოალიციის აღვირით დაბმული ეროვნული ფორუმი გახდა აბსოლუტურად ინერტული ყველა იმ პროცესის მიმართ, რომელიც მიმდინარეობდა ქვეყანაში.
_ "კოალიციის აღვირით დაბმული ეროვნული ფორუმიო" განაცხადეთ და როგორ ფიქრობთ, გუბაზ სანიკიძეს, კახა შარტავას , რეზო შავიშვილს და ფორუმის სხვა ლიდერებს მოეწონებათ ეგ განცხადება? თუ არ ვცდები, თქვენზე გაცილებით დიდი ხანია, ისინი ეროვნული მოძრაობიდან მოდიან… თან, მათ ლიდერის პოსტი განდეს ოზურგეთში…
_ არა უშავს… მე ასე აღვიქვამ. ადგილობრივმა რესპუბლიკური პარტიის ლიდერებმაც მსგავსი განცხადება გააკეთეს და მიმართეს თავიანთი პარტიის ლიდერებს და საერთოდ დატოვეს პარტია. მარინე სუნგულიამ და ტიფო მიქატაძემ უარი თქვეს "რესპუბლიკელობაზე", იმ პარტიაზე, რომელშიც მთელი სული და გული ჩადეს…
_ ბატონო შოთა, მე კარგად მახსოვს თქვენი და რესპუბლიკელების დიდი დაპირისპირებაც და პირადად თქვენი სპეციალური განცხადებაც, (შოთა გოგიბერიძე: "საზოგადოებასა და პოლიტიკური პარტნიორების საყურადღებოდ ვაცხადებ _ არაფერი გამიკეთებია და არაფერს გავაკეთებ ისეთს, რომ ტიფო მიქატაძისა და მარინა სუნგულიას მსგავსად, ჩემი ოზურგეთელებისთვის ბოდიშები მქონდეს სახდელი. ვმოქმედებდი და ვიმოქმედებ ჩემი პოლიტიკური გაერთიანების შიდა პარტიული დისციპლინით, ქვეყნის უკეთესი მომავლისათვის. "გურია ნიუსი". ავტ) ახლა ერთად ხართ?
_ ჩვენ ეთიკის ნორმებს არ გადავსულვართ, ეს იყო უბრალოდ აზრთა სხვადასხვაობა კონკრეტულ თემაზე…
ახლა მთავარი თემა ისაა, რომ საარჩევნო გარემო არ გაუმჯობესებულა, ყველაფერი დარჩა ისე, რასაც ვებრძოდით 2012 წელს და არანაირი ცვლილებები არ შესულა თუნდაც საარჩევნო სიებთან დაკავშირებით.
_ სწორედ საარჩევნო სიებზე მინდა გკითხოთ, თქვენი სოციალური ქსელით, ასევე თქვენი მომხრეების მხრიდან, ბოლო პერიოდში ვრცელდება განცხადებები იმის შესახებ, რომ თქვენი ოპონენტს თბილისიდან ჩამოჰყავს ხალხი და მათ არეგისტრირებს ოზურგეთში ხმების მიღების მიზნით. ხომ არ გაგირკვევიათ, რამდენ ადამიანზეა საუბარი?
_ დიახ, გაჟღერდა ეს თემა და ჩვენ ახლა მაგ საკითხის შესწავლის ეტაპზე ვართ. არ არის ეს ღია ინფორმაცია, ადვილად მოსაპოვებელი. რეალობას ახლა ზუსტად ვერ დაგიდასტურებთ
_ თქვენ იურისტი ბრძანდებით და ალბათ გარკვეული გაქვთ, დაახლოებით რამდენი ადამიანი უნდა დარეგისტრირდეს, რაიმე ცვლილება რომ მოახდინოს სიებზე?
_ აბა ნახეთ, არჩევნებზე მოვიდა 7 500 ამომრჩეველი. 400- ზე მეტი ბიულეტენი გაბათილებული იყო. რამდენი პროცენტია ეგ? ეს ხომ დაახლოებით 7 %-ია? ეს ხომ არის მნიშვნელოვანი რიცხვი? 600 – 700 ადამიანი თუ დარეგისტრირდა, ეს უკვე რეალური საფრთხის ნიშანი იქნება.
_ ინფორმაცია ამომრჩეველთა დარეგისტრირების შესახებ საჯაროა. მე დავინტერესდი აღნიშნული ინფორმაციით და ოფიციალური მონაცემებით 16 ივნისიდან 1 ივლისის ჩათვლით სულ 35 კაცია ოზურგეთში დარეგისტრირებული, მათგან საარჩევნო სიებში სულ 22 ამომრჩეველი მოხვდა. ეს რაიმეს შეცვლის?
_ გასაგებია, ესე იგი ამას მასობრივი ხასიათი არ აქვს და ეგ კარგია. მე ველოდებოდი ახლა ცოტა სხვა ინფორმაციას და დიდი მადლობა რომ მომაწოდეთ ეგ ინფორმაცია. ჩვენ დაახლოებით 600 კაცი ვიანგარიშეთ და შევშინდით…
_ გადავიდეთ ყველაზე მნიშვნელოვან ნაწილზე, რასაც წინასაარჩევნო დაპირებები ქვია. თქვენ გაქვთ ძალიან საინტერესო ჩამონათვალი და მოსახლეობას უფასოდ სთავაზობთ უამრავ რამეს. მათ შორის უფასო ტრანსპორტს. რა კონკრეტული გეგმა გაქვთ ამასთან დაკავშირებით და თუ გაქვთ დათვლილი, რა დაუჯდება ეს ბიუჯეტს?
_ თქვენ ალბათ პატრიოტთა ალიანსის მიერ გაჟღერებულ 5 პუნქტიან პროგრამაზე მეკითხებით. დავიწყოთ ეტაპობრივად. ამ პროგრამაში ჩადებულია არა მარტო თვითმმართველობის თემა, არამედ ზოგადად რას განახორციელებს ეს ახალშობილი პოლიტიკური პარტია შემდეგშიც, როდესაც საპარლამენტო არჩევნებს მიადგება ჯერი. აქ ჩადებულია ის პუნქტები, რისკენ ისწრაფვის პატრიოტთა ალიანსი ხელისუფლებაში მოსვლის შემთხვევაში. ეს არის 4-8 წლიანი პროგრამა, რომელიც წარადგინა ირმა ინაშვილმა დედაქალაქში და მისი პროპორციების შესაბამისად წარვადგინეთ ჩვენ რეგიონებში.
_ ანუ, პროგრამა, რომელიც თქვენ წარადგინეთ, გათვლილია საპარლამენტო არჩევნებსა და პატრიოტთა ალიანსის ხელისუფლებაში სავარაუდო მოსვლის პერსპექტივებზე?
_ ეს არის ჩვენი პოლიტიკური სტრატეგია. ასე ქვია ამ 5 პუნქტს, რომელსაც საქართველოს მოსახლეობას ვთავაზობთ. ჩვენი პრიორიტეტია ზრუნვა ადამიანზე…
რა თქმა უნდა, იმას ჩვენ ვხვდებით, რომ რასაც პატრიოტთა ალიანსი დედაქალაქში სთავაზობს მოსახლეობას 800 მილიონიანი ბიუჯეტის პირობებში, ის ოზურგეთში ვერ განხორციელდება.
გადავიდეთ უფასო ტრანსპორტის თემაზე. აქ საუბარია არა საყოველთაო უფასო ტრანსპორტზე, არამედ შიდასაქალაქო ერთ მწვანე ავტობუსზე, რომელზეც გასმული ერთი მწვანე ხაზი დააფიქსირებს, რომ ეს ერთი ავტობუსი ქალაქის ყველა მიმართულებით დღეში ორჯერ ივლის უფასოდ სწორედ იმ ადამიანთა გადასაადგილებლად, რომლებსაც 50 თეთრიც კი არ აქვთ.
_ უფასო პოლიკლინიკას და უფასო მუნიციპალურ ჰოსპიტალს პირდებით ამომრჩეველს და დაანგარიშებული გაქვთ, რა დაჯდება ეს პროექტი? როგორც ექსპერტები ამბობენ, საკმაოდ დიდ ხარჯებთანაა დაკავშირებული…
_ დიახ, დიახ… თქვენ ვერ ნახავთ ჩემს პროგრამაში მსგავს განცხადებას. ეს არის შემდეგი ტექსტით, რომ ჩვენ ვიფიქრებთ ამაზე…
_ ვერ დაგეთანხმებით, რადგან თქვენს პროგრამაში პირდაპირ წერია: "ოზურგეთში ამოქმედდება უფასო პოლიკლინიკა და უფასო მუნიციპალური ჰოსპიტალი.
_ ირმა ინაშვილის პროგრამაში პირდაპირ წერია 25 უფასო პოლიკლინიკა და 2 ჰოსპიტალი. ჩვენ ვამბობთ, რომ ამაზე უნდა ვიფიქროთ, რადგან სადაზღვევო კომპანიების პირობებში ადამიანებს უჭირთ მომსახურების მიღება. მე ჩემს ინტერვიუებში ამაზე ვსაუბრობ.
_ საყოველთაო ჯანდაცვის პროგრამის ფარგლებში ისედაც ძალიან ბევრ უფასო სერვისს იღებენ ადამიანები.
_ კი, ეგ ძალიან კარგია, ბრწყინვალეა, რადგან ოჯახს აღარ გაყიდის ადამიანი. მე განა არ ვიცი, რომ ძნელია ამის გაკეთება და გათანაბრებული ტრანსფერის ხარჯებით გაწეული ბიუჯეტი ამხელა ხარჯებს ვერ გასწევს. მაგრამ ჩვენ უნდა ვიბრძოლოთ და მივაღწიოთ ამას.
_ ბატონო შოთა, ამომრჩევლისთვის მნიშვნელოვანია ის კონკრეტული პროგრამა, რომლითაც თქვენ იმოქმედებთ მერად გახდომის დღიდანვე და თქვენ როდისთვის პირდებით ამომრჩეველს უფასო პოლიკლინიკას და ჰოსპიტალს, საპარლამენტო არჩევნების შემდეგ თუ მერად გახდომის შემთხვევაში?
_ კი, ბატონო, ჩვენ ყველა პუნქტის შესრულებაზე ვიმუშავებთ. ჩვენ არ ვპირდებით ამომრჩეველს უფასო პოლიკლინიკას, ჩვენ ვეუბნებით, რომ ვიმუშავებთ ამაზე და ვიფიქრებთ, როგორ მოვიძიოთ სახსრები. თორემ გავხდები ახლა მერი და ნიჩაბს დავიკავებ ხელში და ავაშენებ პოლიკლინიკას მეთქი, არ მითქვამს.
_ "მცირე და მიკრო ბიზნესის დაწყებას შეძლებს ათეულობით ოჯახი, ყოველწლიურად მიიღებს დაახლოებით 10 000 -იდან 50 000 ლარის ოდენობით ყოველგვარი გირაოს, პროცენტის და ქონებრივი პასუხისმგებლობის გარეშე" – ესეც თქვენი დაპირებაა. როგორ აპირებთ ამის განხორციელებას? ექსპერტები აცხადებენ, რომ პრაქტიკაში ამის განხორციელება წარმოუდგენელია.
_ საუბარია 10-დან 50 000 მდე ფარგლებში. ამ 50 000 -ის ფრიალი ვიღაცას აწყობს, მაგრამ არ აწყობს რეალობას. რეალობა არის სხვანაირი. ჩვენ ვამბობთ, რომ საბიუჯეტო დაფინანსების ფარგლებში თუკი მოვახსენებთ ქალაქის საკრებულოს დარწმუნებას იმაში, რომ აღარ დარიგდეს პრემიები და აღარ იმოძრაონ ჯიპებით თანამდებობის პირებმა, თუ გამოინახება სხვა თავისუფალი რესურსები ბიუჯეტის 7-8 % -ის ფარგლებში, შევქმნათ ფონდი და ქალაქის მერიამ პარტნიორობის პრინციპებით კომერციულ სტრუქტურებთან ითანამშრომლოს. ეს ჩადებულია თვითმმართველობის შესახებ კანონში. მოვარგოთ ამ კანონს ეს თანხა და დავაფინანსოთ მცირე და მიკრო ბიზნესი.
_ ფიქრობთ, რომელიმე კომერციული სტრუქტურა დათანხმდება ყოველგვარი გარანტიის გარეშე თანხა გასცეს?
_ ამას კომერციული სტრუქტურა კი არა, მერია გააკეთებს, რომელიც ითანამშრომლებს ამ სტრუქტურებთან. ეს ადამიანები, რომლებიც კრედიტს აიღებენ, უკვე კომერციული საქმიანობთ დაკავდებიან.
_ ანუ, ეს მაინც სესხი იქნება?
_ კი, ეგ იქნება სესხი, ოღონდ უპროცენტო, რომელიც უკან უნდა დაბრუნდეს 4 ან 8 წლის განმავლობაში, გააჩნია თანხის მოცულობას. 50 000 ლარი თბილისზე ორიენტირებული თანხაა, თორემ ოზურგეთში სხვა პროპორციები იქნება.
_ და რომ ვერ გადაიხადონ ეს სესხი, მერია დაფარავს?
_ ადამიანმა ეს უნდა გადაიხადოს აუცილებლად. გეთანხმებით რისკები არის, ამიტომ მიყვება ამ ადამიანს ეს ეკონომისტი და ფინანსისტი.
– უფასო ფაკულტეტებს რაც შეეხება, როგორ აპირებთ მათ გახსნას?
_ აი, ეგ უკვე ჩემი იდეაა. ანასეულში ძალიან კარგი კვლევითი ბაზა გვაქვს და მინდა იმ ბაზის საფუძველზე გაკეთდეს უფასო ფაკულტეტები და ოზურგეთი იქცეს საუნივერსიტეტო ქალაქად. უნივერსიტეტში ძალიან ბევრ ღირსეულ ადამიანთან ურთიერთობა მომცემს იმის საშუალებას, რომ ეს იდეა განვახორციელო.
_ მაგ საკითხის გადაჭრა განათლების სამინისტროს პრეროგატივაში არ შედის?
_ რა თქმა უნდა, განათლების სამინისტროს კომპეტენციაში შედის, თუმცა უნივერსიტეტი ცალკე ერთეული გახლავთ ამ საგანმანათლებლო სისტემაში. ამიტომ, თუ ქალაქიდან ამის აქტივობა იქნება, სურვილის და რესურსის შემთხვევაში, ეს შესაძლებელი გახდება. გურულებს აქვთ დაუოკებელი სწრაფვა განათლებისკენ, ამიტომ ეს არის ბრწყინვალე იდეა და ამაზე უნდა იფიქროს ქალაქის საზოგადოებამ და მერიამ.
_ მართლა ეუბნებიან თქვენი მხარდამჭერები ამომრჩევლებს, რომ თქვენ და "პატრიოტთა ალიანსს" ბიძინა ივანიშვილი აფინანსებს?
_ ჩემზე ამბობენ მაგს?
_ დიახ, ამბობენ, რომ ასეთ ხმებს ავრცელებთ…
_ რა მეტყობა მე დაფინანსებულის? მთელი ოზურგეთი ღადაობს, შურდულით ებრძვის გოლიათსო…
_ უფასო ტანსაცმლის დარიგების საკითხის მოგვარებას როგორ აპირებთ? მერიაში მოიტანენ დააწყობენ და შემდეგ ადამიანებს მერიიდან დაურიგდებათ თუ რაიმე სხვა პუნქტი გაიხსნება?
_ უფასო ტანსაცმელიო რომ ვამბობ, კვდებიან სიცილით. ამასწინათ მომაკითხა ოფისში ერთი ზორბა ტანის კაცმა და მითხრა, უფასო ტანსაცმლიზა მევედი ძამაო… მე ვუთხარი, ახლა ჩვენ შევიმუშავებთ სტანდარტებს და იმ სტანდარტებში თუ ჩაჯდები, კი მეთქი.
რა ხდება იცით? მეორადი ტანსაცმლის მოხმარებამ ძალიან ბევრი დერმატოლოგიური და კანის პრობლემები გააჩინა. ბევრ მათგანს ახლაც ვერ მკურნალობენ, ზოგს ფსორიაზი გაუჩნდა და ასე შემდეგ. ამიტომ, ჩვენ უნდა შევქმნათ პატარა სამკერვალო, სადაც ახალი ნაჭრისგან ახალ, ნორმალურ ტანისამოსს შევუკერავთ .
_ ეს თანხაც მერიის ბიუჯეტიდან წავა?
_ რა თქმა უნდა.
_ რამდენ უფასო პროგრამას შეიძლება ეყოს მერიის ბიუჯეტი დაახლოებით 7 მილიონზეა საუბარი?
_ არაფერი ეს პრობლემური არ იქნება. თუკი დაკვეთას მისცემს ქალაქის მერია და ის ორი მკერავიც შემოსავალს მიიღებს, ამით კიდევ ორი ოჯახი გადარჩება.
_ ბიუჯეტი ტრანსფერზეა მიბმული და როგორ ფიქრობთ, სახელმწიფო მხოლოდ ოზურგეთისთვის განახორციელებს ამ უფასო პროგრამებს? დისკრიმინაციული პრინციპით მიუდგება საკითხს?
_ არავითარი დისკრიმინაცია! "პატრიოტთა ალიანსის" წარმომადგენელი სადაც გაიმარჯვებს, მთელი პოლიტიკური გუნდი პარლამენტისა და მთავრობის წინაშე დაიწყებს ზონდირებას იმ თემის, რომ ეს ამ რაიონებში აუცილებლად განხორციელდეს. ჩემი პიროვნული ამ პროგრამაში მხოლოდ უნივერსიტეტის თემაა, რომელსაც ვიძახი, რომ საზოგადოებასთან ერთად მზაობის შემთხვევაში განვახორციელებთ.
_ ძალიან ბევრს საუბრობთ სოციალურად დაუცველ ფენაზე. რამდენი სოციალურად დაუცველი ოჯახი ცხოვრობს ოზურგეთში, ანუ თქვენი მერად არჩევის შემთხვევაში რამდენი ოჯახი მიიღებს უფასო ტანსაცმელს, უფასო ტრანსპორტს და სხვა უფასო მომსახურებას, რასაც თქვენ პირდებით?
_ ვაიმე, ეგ ძალიან უბედური თემაა… და თქვენ სოციალურმა სამსახურმა არ მოგცათ ინფორმაცია?
_ მე მომცა ინფორმაცია სოციალურმა სამსახურმა, უბრალოდ მაინტერესებს მერობის კანდიდატმა თუ იცის, რამდენი სოციალურად დაუცველი ოჯახი ცხოვრობს ოზურგეთში და რამდენ ადამიანს პირდებით დახმარებას.
_ მე ამას პროცესში, როცა ადამიანი მეტყვის ვერ ვიღებ დახმარებასო, მაშინ გავიგებ. მე არ ვცემ პატივს სოციალური სამსახურის მიერ შედგენილ ქულათა სისტემას.
_ განაცხადეთ, რომ საარჩევნო დაპირებებიდან თქვენი პირადი უფასო ფაკულტეტებია, ხომ არ ჯობდა, ოზურგეთელებისთვის ოზურგეთზე მორგებული და გათვლილი პროგრამა წარგედგინათ და არა "პატრიოტთა ალიანსის" სამოქმედო გეგმა?
_ 50 000 -ის გაცემაზე რეგიონის პირობებში საერთოდ არ არის ლაპარაკი, ეს იყო თბილისზე გათვლილი, მაგრამ ჩვენ წავედით ამ უხერხულობაზე. ოზურგეთში საუბარია 10 000 -იან სესხებზე… ანუ მეკითხებით დიფერენცირება რატომ არ მოხდა? რადგან ეს პოლიტიკური პროგრამა და ხედვაა, ჩვენ ყველამ ამ პროგრამის პოპულარიზაციაზე ვიმუშავეთ. ეს იყო პოლიტიკური სოლიდარობა "პატრიოტთა ალიანსის" მიმართ…
