"საქართველოს პატრიოტთა ალიანსის“ გენერალური მდივნის, ირმა ინაშვილის ბრალდებებს თბილისის საკრებულოს მოქმედი და ამავე პარტიის ყოფილი წევრი სოსო მანჯავიძე პასუხობს.
"გურია ნიუსს“ მანჯავიძე პარტიიდან წამოსვლის მიზეზებზე და ირმა ინაშვილის ბრალდებებზე ესაუბრა.
სოსო მანჯავიძის ინტერვიუს უცვლელად გთავაზობთ:
_ რა იყო პარტიიდან თქვენი წამოსვლის მიზეზი?
_ პარტიიდან წამოსვლის მიზეზი იყო მოვლენების შეფასების დიამეტრალური განსხვავებული შეფასებები, როგორც პოლიტიკურ ასევე მიმდინარე მოვლენებთან დაკავშირებით.
აქედან გამომდინარე, 6 ივლისს ნებაყოფლობით დავტოვე გენერალური მდივნის თანამდებობა და გამოვედი პოლიტსაბჭოდანაც ყოველგვარი ზედმეტი ხმაურის გარეშე. ძალიან მინდოდა რომ პარტიიდან ჩემი წამოსვლა მშვიდი, ლანძღვა-გინების და გაუგებარი, დაუსაბუთებელი ბრალდებების გარეშე მომხდარიყო. ვინაიდან, ამ ადამიანებთან მაკავშირებდა სააკაშვილის რეჟიმთან ბრძოლის პერიოდი. მაგრამ როგორც ჩანს, ასეთი რამე არ ესმით ამ ადამიანებს და ცდილობენ ტალახის სროლის ახალი ტალღის აგორებას. საინტერესო ის არის, რომ წერილში არავითარი კონკრეტიკა არ არის, არის მხოლოდ გაბრაზებული ადამიანის პოზიცია გაუგებარი არგუმენტაციით.
_ ირმა ინაშვილის წერილში აღნიშნულია, რომ პარტიის პოლიტიკური საბჭო პარტიიდან თქვენს გარიცხვას აპირებდა…
_ რას აპირებდა პოლიტიკური საბჭო და რა შეიძლება მომხდარიყო, უკანა რიცხვით საუბარი, არა მგონია, სერიოზული იყოს. მინდა ვთქვა, რომ ამის შესახებ არანაირი კომენტარის გაკეთება არ ღირს. მინდა ვთქვა, რომ არ ვაპირებ ჭუჭყის სროლის ახალ კამპანიაში მონაწილეობას. უამრავი საქმე მაქვს და თავის თავზე ჰიპერტროფირებული წარმოდგენის ადამიანებთან დისკუსიებს არ ვაპირებ.
_ წერილში ასევე აღნიშნულია, რომ მან თქვენს მაგივრად ვალები გადაიხადა. რა ვალებზეა საუბარი?
_მსგავსი რამ არ ყოფილა. ეს ფრაზა ზნეობის მიღმა გადის. ასე მეც შემიძლია იმდენი რამ ვთქვა და მოვიგონო, ან არ მოვიგონო და ისე ვთქვა, რომ ეს სკანდალის მიზეზი გახდეს. მაგრამ მე ამას არ ვიკადრებ, ვინც კადრულობს, ღმერთმა მშვიდობაში მოახმაროს მისი ეს უნარი ილაპარაკოს ის, რაც აბსოლუტურად არასწორია. წამოვედი პარტიიდან მაშინ, როდესაც პარტია კვალიფიციური გახდა და სერიოზული დაფინანსება მიიღო. ვიყავი "წინააღმდეგობის მოძრაობის“ ლიდერი და პარტიის გენერალური მდივანი. ქალბატონი ირმა ინაშვილი პარტიის გენერალური მდივანი 6 ივნისს გახდა და მას შემდეგ განუწყვეტელი სკანდალების აგორება დაიწყო. არავითარი პრეტენზია არც ამ დაფინანსებაზე და არც იმაზე, რომ პარტიას კვალიფიკაცია და პერსპექტივა აქვს, არ გამომიცხადებია. მინდოდა წავსულიყავი მშვიდად ამ პარტიიდან, რადგან არ ვეთანხმები უამრავ რამეს, რასაც პარტიის ხელმძღვანელობა აკეთებდა.
რაც შეეხება ვალებს, ქალბატონმა ირმა ინაშვილმა კარგად იცის, ამის შესახებ ყველაფერი და ისეთ რამეს ლაპარაკობს, რაც ჩემთვის მიუღებელია. ვალი ვის არ აქვს? ჩემს ძმას ჰქონდა კომერციული წარუმატებლობა. ეს ვალი ჩემს თავზე ავიღე და ვიხდიდი. ეს იყო და ეს. რაც შეეხება ამის წამოძახებას, შეაფასოს საზოგადოებამ რამდენად ეთიკურია. არავინ არ იცის, სინამდვილეში როგორ იყო საქმე. მეც რომ ასეთივე ტიპის განცხადება გავაკეთო, რამდენად მართალი ვიქნები? გასაგებია მათი სურვილი, უნდათ გამსვარონ და ინტრიგებში ჩამითრიონ, მაგრამ ამას არ გავაკეთებ. ღმერთმა ხელი მოუმართოთ, დალოცოთ და გააძლიეროთ. მათ აქვთ კვალიფიციური პარტია, დაფინანსება, რაშიც ყველამ იცის ვის აქვს ლომის წვლილი.
_თქვენი დახმარებით მოხდა პარტიის დაფინანსება?
_მე ვიყავი პარტიის გენერალური მდივანი და ვისი დახმარებით მოხდებოდა? მაგრამ ამაზე ხმა არ ამომიღია არასოდეს. როცა წამოვედი ახლა თხზავენ სიბინძურეებს. თვითონ ვერ ხვდებიან, მაგრამ ეს მათ პოლიტიკურ პერსპექტივას უსპობს. რახან არ ესმის პარტიის გენერალურ მდივანს, ის შესაბამის შედეგს მოიმკის.
_შეგიძლიათ გვითხრათ, რა იყო თქვენთვის მიუღებელი პარტიაში?
_ მიუღებელი იყო, მაგალითად, საკადრო და რეგიონული პოლიტიკა, ის ცნობილი გამოკითხვა- სახალხო რეფერენდუმი, რომელიც აბსოლუტური გაუგებრობა იყო. ასევე, თბილისის მერის თანამდებობაზე ირმა ინაშვილის კანდიდატურის დაყენება, გასაგები მიზეზების და დამდგარი შედეგის გათვალისწინებით. მიუღებელია აგრეთვე ისიც, რომ ყველა გადაცემაში ბატონი დავით თარხან-მოურავია ტელევიზორში. ასევე, მისი პიროვნების განდიდების და კულტის შექმნის მცდელობები, რომელიც სახეზეა, ვინც "ობიექტივს“ უყურებს. მიუღებელი იყო კიდევ უამრავი რამე, რის შესახებაც არ მინდოდა ხმამაღლა საუბარი. ადამიანს, რომელიც განდიდებაში ხელს არ გიწყობს ამის გამო დააბრალო უამრავი სიბინძურე, ეს რამდენად ეთიკურია, საზოგადოებამ შეაფასოს.
_თქვენი კანდიდატი გყავდათ თბილისის მერის თანამდებობაზე?
_ამის გაკეთება არ შეიძლებოდა. მე მყავდა თუ არა ჩემი კანდიდატი, ეს სხვა საკითხია.
_ რაც შეეხება საკრებულოში თქვენს მოხვედრას, დაგითმოთ თუ არა დავით თარხან-მოურავმა თავისი ადგილი?
_რა სისულელეა, ეს არის შუმი ტყუილი. ქალბატონმა ირმამ კარგად იცის, რა დიდი უსიამოვნებები იყო მანამდე. საკრებულო ჩემთვის თვითმიზანი ნამდვილად არ ყოფილა და ეს ინაშვილმა კარგად იცის. საკრებულოს წევრობა ჩემთვის ეკონომიკური თვალსაზრისით ნამდვილად არ ყოფილა მიზანი. თუ ფრაქციაში არ ხარ, საკრებულოს დამოუკიდებელი წევრობა, შეუსაბამო იმ დატვირთვასთან, რომელიც ყოველდღიურია და აქტიურად ვმონაწილეობ, ეს არის 1120 ლარი. თუ ვინმეს ჰგონია, რომ მე ამ თანხის მოსაპოვებლად ვიბრძოდი სააკაშვილის რეჟიმის წინააღმდეგ, გამოუსვლელად ვმუშაობდი პარტიის ასაშენებლად, ეს მისი პრობლემაა. და არა მგონია, ასეთი ადამიანის გადარწმუნება შეიძლებოდეს, რადგან ლოგიკური აზროვნების უნარი დაკარგული აქვს.
